ਲੰਡਨ, 23 ਮਈ (ਪੋਸਟ ਬਿਊਰੋ)- ਭਾਰਤੀ ਮੂਲ ਦੇ ਕਾਰੋਬਾਰੀ ਸੁਨੀਲ ਚੋਪੜਾ ਲਗਾਤਾਰ ਦੂਸਰੀ ਵਾਰ ‘ਲੰਡਨ ਬਰੋ ਆਫ਼ ਸਾਊਥਵਾਰਕ' ਦੇ ਮੇਅਰ ਚੁਣੇ ਗਏ ਹਨ। ਦਿੱਲੀ ਵਿੱਚ ਜਨਮੇ ਚੋਪੜਾ ਨੇ ‘ਸੈਂਟਰਲ ਲੰਡਨ' ਸਥਿਤ ਸਾਊਥਵਾਰਕ ਕੈਥਡ੍ਰਲ ਵਿੱਚ ਕੱਲ੍ਹ ਸਹੁੰ ਚੁੱਕੀ। ਉਹ 2014-15 ਵਿੱਚ ਵੀ ‘ਲੰਡਨ ਬਰੋ ਆਫ਼ ਸਾਊਥਵਾਰਕ' ਦੇ ਮੇਅਰ ਸਨ। ਉਹ 2013-14 ਵਿੱਚ ਇਸ ਦੇ ਡਿਪਟੀ ਮੇਅਰ ਸਨ। ਉਹ ਇਸ ਬਰੋ (ਪ੍ਰਸ਼ਾਸਨਿਕ ਖੰਡ) ਵਿੱਚ ਇਸ ਵੱਕਾਰੀ ਅਹੁਦੇ ਉੱਤੇ ਬੈਠਣ ਵਾਲੇ ਭਾਰਤੀ ਮੂਲ ਦੇ ਪਹਿਲੇ ਵਿਅਕਤੀ ਹਨ।
ਬ੍ਰਿਟੇਨ ਦੀ ਲੇਬਰ ਪਾਰਟੀ ਨੇ ਸੁਨੀਲ ਚੋਪੜਾ ਦੀ ਅਗਵਾਈ ਵਿੱਚ ਲੰਡਨ ਬ੍ਰਿਜ ਤੇ ਵੈਸਟ ਬਰਮੋਂਡਸੇ ਸੀਟ ਉੱਤੇ ਲਿਬਰਲ ਡੈਮੋਕ੍ਰੇਟਸ ਨੂੰ ਹਰਾਇਆ ਹੈ। ਇਸ ਤੋਂ ਪਹਿਲਾਂ ਇਨ੍ਹਾਂ ਸੀਟ ਉੱਤੇ ਦਹਾਕਿਆਂ ਤਕ ਵਿਰੋਧੀ ਦਲ ਦਾ ਕਬਜ਼ਾ ਸੀ। ਚੋਪੜਾ ਦੀ ਜਿੱਤ ਕਈ ਮਾਇਨੇ ਰੱਖਦੀ ਹੈ ਕਿਉਂਕਿ ‘ਲੰਡਨ ਬਰੋ ਆਫ਼ ਸਾਊਥਵਾਰਕ ਕੌਂਸਲ' ਵਿੱਚ ਭਾਰਤੀ ਮੂਲ ਦੇ ਸਿਰਫ਼ ਦੋ ਫ਼ੀਸਦੀ ਲੋਕ ਹਨ। ਸੁਨੀਲ ਚੋਪੜਾ ਨੇ 2010 ਵਿੱਚ ਬ੍ਰਿਟੇਨ ਦੀ ਸਿਆਸਤ ਵਿੱਚ ਕਦਮ ਰੱਖਿਆ ਅਤੇ ਉਹ 2014 ਵਿੱਚ ਪਹਿਲੀ ਵਾਰ ਇਸ ਬਰੋ ਦੇ ਮੇਅਰ ਚੁਣੇ ਗਏ। ਉਹ ਤਿੰਨ ਵਾਰ ਡਿਪਟੀ ਮੇਅਰ ਰਹੇ। ਉਨ੍ਹਾਂ ਦੀ ਸਿਆਸੀ ਯਾਤਰਾ 1970 ਦੇ ਦਹਾਕੇ ਵਿੱਚ ਦਿੱਲੀ ਤੋਂ ਸ਼ੁਰੂ ਹੋਈ ਸੀ। ਉਹ 1972 ਵਿੱਚ ਕਾਲਜ ਆਫ਼ ਵੋਕੇਸ਼ਨਲ ਸਟੱਡੀਜ਼, ਦਿੱਲੀ ਯੂਨੀਵਰਸਿਟੀ ਦੇ ਪਹਿਲੇ ਪ੍ਰਧਾਨ ਬਣੇ। ਉਨ੍ਹਾਂ ਨੇ 1973-74 ਵਿੱਚ ਐਲ ਐਲ ਬੀ ਦੀ ਪੜ੍ਹਾਈ ਦੇ ਦੌਰਾਨ ਵੀ ਦਿੱਲੀ ਯੂਨੀਵਰਸਿਟੀ ਵਿੱਚ ਸੁਪਰੀਮ ਕੌਂਸਲਰ ਦਾ ਅਹੁਦਾ ਸੰਭਾਲਿਆ ਸੀ।