ਟੋਰਾਂਟੋ, 23 ਮਈ (ਪੋਸਟ ਬਿਊਰੋ) : ਐਤਵਾਰ ਰਾਤ ਨੂੰ ਸ਼ਹਿਰ ਦੇ ਪੂਰਬ ਵਿੱਚ ਇੱਕ ਘਰ ਦੇ ਗੈਰਾਜ ਵਿੱਚ ਪਿੱਕਅੱਪ ਟਰੱਕ ਹਾਦਸਾਗ੍ਰਸਤ ਹੋ ਜਾਣ ਕਾਰਨ 68 ਸਾਲਾ ਵਿਅਕਤੀ ਦੀ ਮੌਤ ਹੋ ਗਈ।
ਪੁਲਿਸ ਨੇ ਦੱਸਿਆ ਕਿ ਇਹ ਹਾਦਸਾ ਰਾਤੀਂ 7:00 ਵਜੇ ਤੋਂ ਬਾਅਦ ਕੁਈਨ ਸਟਰੀਟ ਈਸਟ ਤੇ ਕਿੰਗਜ਼ਵੁੱਡ ਐਵਨਿਊ ਏਰੀਆ ਵਿੱਚ ਵਾਪਰਿਆ। ਇਸ ਹਾਦਸੇ ਕਾਰਨ ਗੈਸ ਵੀ ਲੀਕ ਕਰ ਗਈ। ਇਸ ਗੈਸ ਦੀ ਲੀਕੇਜ ਨੂੰ ਰੋਕਣ ਲਈ ਕ੍ਰਿਊਜ਼ ਨੂੰ ਸੱਦਣਾ ਪਿਆ ਤੇ ਕਾਫੀ ਮਿਹਨਤ ਤੋਂ ਬਾਅਦ ਲੀਕੇਜ ਉਤੇ ਕਾਬੂ ਪਾ ਲਿਆ ਗਿਆ। ਅਧਿਕਾਰੀਆਂ ਨੇ ਦੱਸਿਆ ਕਿ ਇਸ ਲੀਕੇਜ ਨਾਲ ਜਨਤਾ ਨੂੰ ਕੋਈ ਖਤਰਾ ਨਹੀਂ ਸੀ।
ਪੁਲਿਸ ਨੇ ਆਖਿਆ ਕਿ ਕਿੰਗਜ਼ਵੁੱਡ ਡਰਾਈਵ ਤੋਂ ਕੁਈਨਜ਼ ਸਟਰੀਟ ਈਸਟ ਵੱਲ ਜਦੋਂ ਕਾਲੇ ਰੰਗ ਦੀ ਫੋਰਡ-150 ਵਿੱਚ ਡਰਾਈਵਰ ਜਾ ਰਿਹਾ ਸੀ ਤਾਂ ਉਹ ਅਚਾਨਕ ਆਪਣਾ ਕਾਬੂ ਗੁਆ ਬੈਠਿਆ। ਇਸ ਗੱਡੀ ਵਿੱਚ ਸਿਰਫ ਡਰਾਈਵਰ ਹੀ ਮੌਜੂਦ ਸੀ ਤੇ ਕਿਸੇ ਹੋਰ ਦੇ ਜ਼ਖ਼ਮੀ ਹੋਣ ਦੀ ਖਬਰ ਨਹੀਂ ਹੈ।ਹਾਦਸੇ ਦੇ ਕਾਰਨਾਂ ਦਾ ਪਤਾ ਨਹੀਂ ਲੱਗ ਸਕਿਆ ਹੈ।