ਟੋਰਾਂਟੋ, 17 ਮਈ (ਪੋਸਟ ਬਿਊਰੋ) : ਪਿਛਲੇ ਹਫਤੇ ਅਕਸਬ੍ਰਿੱਜ ਤੋਂ ਮਿਲੇ ਮਨੁੱਖੀ ਅਵਸ਼ੇਸ਼ ਪਿਛਲੀਆਂ ਗਰਮੀਆਂ ਵਿੱਚ ਲਾਪਤਾ ਹੋਏ ਟੋਰਾਂਟੋ ਦੇ ਵਿਅਕਤੀ ਦੇ ਹਨ।
10 ਮਈ ਨੂੰ ਦੁਪਹਿਰੇ 2:40 ਵਜੇ ਇੱਕ ਤਲਾਅ ਵਿੱਚ ਤੈਰ ਰਹੇ ਬੈਗ ਵਿੱਚ ਮਨੁੱਖੀ ਅਵਸ਼ੇਸ਼ ਮਿਲਣ ਤੋਂ ਬਾਅਦ ਡੀਆਰਪੀਐਸ ਅਧਿਕਾਰੀਆਂ ਨੂੰ ਅਕਸਬ੍ਰਿੱਜ ਕਨਸੈਸ਼ਨ ਰੋਡ 6 ਤੇ ਆਲਬ੍ਰਾਈਟ ਰੋਡ ਏਰੀਆ ਵਿੱਚ ਸੱਦਿਆ ਗਿਆ। ਓਨਟਾਰੀਓ ਫੋਰੈਂਸਿਕ ਪੈਥੌਲੋਜੀ ਸਰਵਿਸਿਜ਼ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ 32 ਸਾਲਾਂ ਦੇ ਏਰੀਅਲ ਕਾਪਲਾਨ ਦੇ ਹਨ।ਇਸ ਦੌਰਾਨ ਪਬਲਿਕ ਸੇਫਟੀ ਯੂਨਿਟ ਦੇ ਨਾਲ ਨਾਲ ਯੌਰਕ ਰੀਜਨਲ ਪੁਲਿਸ ਦੀ ਡਾਈਵ ਟੀਮ ਦੇ ਮੈਂਬਰਾਂ ਵੱਲੋਂ ਜ਼ਮੀਨੀ ਪੱਧਰ ਅਤੇ ਪਾਣੀ ਵਿੱਚ ਸਰਚ ਕੀਤੀ ਗਈ।ਮੰਗਲਵਾਰ ਨੂੰ ਜਾਰੀ ਕੀਤੀ ਗਈ ਨਿਊਜ਼ ਰਲੀਜ਼ ਅਨੁਸਾਰ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।
ਜਿ਼ਕਰਯੋਗ ਹੈ ਕਿ ਕਾਪਲਾਨ ਦੇ ਪਿਛਲੇ ਸਾਲ ਅਗਸਤ 2021 ਵਿੱਚ ਲਾਪਤਾ ਹੋਣ ਦੀ ਰਿਪੋਰਟ ਲਿਖਾਈ ਗਈ ਸੀ। ਮਈ 2021 ਵਿੱਚ ਕਾਪਲਾਨ ਉੱਤੇ ਜੁਰਮ ਨਾਲ ਹਾਸਲ ਕੀਤੀ ਸੰਪਤੀ ਰੱਖਣ ਤੇ 250,000 ਡਾਲਰ ਦੇ ਸਮਾਨ ਨਾਲ ਭਰੇ ਟਰੈਕਟਰ ਟਰੇਲਰ ਨੂੰ ਚੋਰੀ ਕਰਨ ਦੇ ਦੋਸ਼ ਲੱਗੇ ਸਨ।ਦਰਹਾਮ ਪੁਲਿਸ ਦੀ ਹੋਮੀਸਾਈਡ ਯੂਨਿਟ, ਟੋਰਾਂਟੋ ਪੁਲਿਸ ਨਾਲ ਰਲ ਕੇ ਇਸ ਮਾਮਲੇ ਉੱਤੇ ਕੰਮ ਕਰ ਰਹੀਆਂ ਹਨ।