* ਨੱਕ ਨਾਲ ਲਕੀਰਾਂ ਵੀ ਕਢਵਾਈਆਂ ਗਈਆਂ
ਮਲੋਟ, 17 ਮਈ (ਪੋਸਟ ਬਿਊਰੋ)- ਅਪਣੀ ਪਤਨੀ ਦੇ ਹੁੰਦਿਆਂ ਦੂਸਰੀ ਔਰਤ ਨਾਲ ਨਾਜਾਇਜ਼ ਸਬੰਧ ਰੱਖਦੇ ਇੱਕ ਵਿਅਕਤੀ ਨੇ ਦੂਸਰੀ ਔਰਤ ਦੇ 12 ਸਾਲਾ ਬੱਚੇ ਨੂੰ ਅਲਫ ਨੰਗਾ ਕਰ ਕੇ ਡੰਡੇ ਨਾਲ ਕੁੱਟਮਾਰ ਕੀਤੀ, ਜਿਸ ਦੀ ਵੀਡੀਓ ਸੋਸ਼ਲ ਮੀਡੀਆ ਉੱਤੇ ਜਨਤਕ ਹੋਣ ਪਿੱਛੋਂ ਕਾਰਵਾਈ ਹੋ ਰਹੀ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਮਲੋਟ ਸ਼ਹਿਰ ਦੀ ਵਸਨੀਕ ਪੀੜਤ ਔਰਤ ਦੇ ਘਰ ਅਰਸ਼ਦੀਪ ਸਿੰਘ ਦਾ ਕਾਫੀ ਸਮੇਂ ਤੋਂ ਆਉਣਾ ਜਾਣਾ ਹੈ। ਉਸ ਨਾਲ ਕਾਫ਼ੀ ਸਮਾਂ ਪਹਿਲਾਂ ਨਾਜਾਇਜ਼ ਸੰਬੰਧ ਬਣ ਗਏ ਜਿਸ ਕਾਰਨ ਉਸ ਦੇ ਭੈਣ ਭਰਾ ਅਤੇ ਪਤੀ ਉਸ ਨੂੰ ਛੱਡ ਚੁੱਕੇ ਹਨ ਤੇ ਉਹ ਅਰਸ਼ਦੀਪ ਸਿੰਘ ਦੇ ਸਹਾਰੇ ਆਪਣੇ ਬੱਚਿਆਂ ਦਾ ਪਾਲਣ ਪੋਸ਼ਣ ਕਰਦੀ ਹੈ। ਬੀਤੇ ਸਾਲ ਦਸੰਬਰ ਮਹੀਨੇ ਅਰਸ਼ਦੀਪ ਦਾ ਵਿਆਹ ਹੋ ਗਿਆ ਅਤੇ ਉਹ ਆਪਣੀ ਪਤਨੀ ਨੂੰ ਲੈ ਕੇ ਉਨ੍ਹਾਂ ਦੇ ਘਰ ਆਇਆ। ਇਸ ਦੌਰਾਨ ਉਸ ਦੇ 12 ਸਾਲਾ ਬੇਟੇ ਨੇ ਅਰਸ਼ਦੀਪ ਸਿੰਘ ਦੀ ਪਤਨੀ ਦੇ ਸਰੀਰ ਨੂੰ ਹੱਥ ਲਾ ਦਿੱਤਾ ਤਾਂ ਅਰਸ਼ਦੀਪ ਸਿੰਘ ਭੜਕ ਗਿਆ ਅਤੇ ਉਸ ਨੇ 7 ਮਈ ਨੂੰ ਬੱਚੇ ਨੂੰ ਅਲਫ ਨੰਗਾ ਕਰ ਕੇ ਡੰਡੇ ਨਾਲ ਬੇਰਹਿਮੀ ਨਾਲ ਕੁੱਟਮਾਰ ਕਰ ਦਿੱਤੀ ਤੇ ਨੱਕ ਨਾਲ ਲਕੀਰਾਂ ਕੱਢਣ ਲਈ ਕਿਹਾ। ਉਹ ਆਪਣੇ ਬੱਚੇ ਦੀ ਜਾਨ ਬਖ਼ਸ਼ਣ ਲਈ ਮਿੰਨਤਾਂ ਕਰਦੀ ਰਹੀ ਜਿਸ ਪਿੱਛੋਂ ਅਰਸ਼ਦੀਪ ਸਿੰਘ ਨੇ ਉਸ ਨੂੰ ਵੀ ਬੇਰਹਿਮੀ ਨਾਲ ਕੁੱਟਿਆ। ਸਰੀਰ ਤੇ ਕੁੱਟਮਾਰ ਦੇ ਨਿਸ਼ਾਨਾਂ ਨਾਲ ਦੋਹਾਂ ਦਾ ਸਰੀਰ ਨੀਲਾ ਹੋ ਗਿਆ। ਕੁੱਟਮਾਰ ਪਿੱਛੋਂ ਅਰਸ਼ਦੀਪ ਸਿੰਘ ਨੇ ਧਮਕਾਇਆ ਕਿ ਜੇ ਉਨ੍ਹਾਂ ਨੇ ਕਿਸੇ ਨੂੰ ਦੱਸਣ ਦੀ ਕੋਸ਼ਿਸ਼ ਵੀ ਕੀਤੀ ਤਾਂ ਬੱਚਿਆਂ ਦੇ ਹੱਥ ਪੈਰ ਤੋੜ ਕੇ ਸ਼ਹਿਰ ਵਿੱਚ ਭੀਖ ਮੰਗਾਵਾਂਗਾ।
ਅਰਸ਼ਦੀਪ ਨੇ ਬੱਚੇ ਦੀ ਕੁੱਟਮਾਰ ਦੀ ਗੱਲ ਕਬੂਲ ਕਰ ਲਈ, ਪਰ ਇਹ ਕਿਹਾ ਕਿ ਐਨੀ ਗੱਲ ਹੈ ਨਹੀਂ ਸੀ ਜਿੰਨੀ ਵੀਡੀਓ ਵਾਇਰਲ ਕਰਕੇ ਬਣਾਈ ਜਾ ਰਹੀ ਹੈ। ਪੀੜਤ ਮਾਂ ਪੁੱਤ ਨੂੰ ਸਿਵਲ ਹਸਪਤਾਲ ਦਾਖ਼ਲ ਕਰਵਾ ਦਿੱਤਾ ਗਿਆ ਹੈ। ਦੋਸ਼ੀ ਦੀ ਭਾਲ ਕੀਤੀ ਜਾ ਰਹੀ ਹੈ। ਕੁੱਟਮਾਰ ਦਾ ਵੀਡੀਓ 10 ਦਿਨ ਪੁਰਾਣਾ ਹੋਣ ਦੇ ਬਾਵਜੂਦ ਬੱਚੇ ਤੇ ਔਰਤ ਦੇ ਸਰੀਰ ਤੇ ਅਜੇ ਵੀ ਸੱਟਾਂ ਦੇ ਨਿਸ਼ਾਨ ਸਾਫ਼ ਦਿਖਾਈ ਦੇ ਰਹੇ ਹਨ।