ਅੰਮ੍ਰਿਤਸਰ, 17 ਮਈ (ਪੋਸਟ ਬਿਊਰੋ)- ਕੱਲ੍ਹ ਦਿਨ-ਦਿਹਾੜੇ ਸ਼ਹਿਰ ਦੇ ਭੀੜ ਵਾਲੇ ਖੇਤਰ ਵੀ ਆਰ ਮਾਲ (ਪਹਿਲਾਂ ਟਿ੍ਰਲਿਅਮ ਮਾਲ) ਦੇ ਸਾਹਮਣੇ ਇੱਕ ਹੋਟਲ ਮਾਲਕ ਦੀ ਕਾਰ ਨੂੰ ਦੋ ਲੁਟੇਰੇ ਲੁੱਟ ਕੇ ਲੈ ਗਏ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਜਿੱਥੇ ਇਹ ਘਟਨਾ ਹੋਈ, ਉਥੇ ਕੁਝ ਦੂਰ ਪੁਲਸ ਦਾ ਇੱਕ ਬੂਥ ਬਣਿਆ ਹੋਇਆ ਹੈ।
ਇਸ ਸਾਰੀ ਘਟਨਾ ਬਾਰੇ ਮਨੀ ਨੇ ਦੱਸਿਆ ਕਿ ਉਨ੍ਹਾਂ ਦਾ ਸਟੇਸ਼ਨ ਕੋਲ ਇੱਕ ਹੋਟਲ ਹੈ ਅਤੇ ਉਹ ਸ਼ਾਮ ਦੇ ਚਾਰ ਵਜੇ ਆਪਣੇ ਕਿਸੇ ਪਛਾਣ ਦੇ ਦਫ਼ਤਰ ਵਿੱਚ ਗੱਲਬਾਤ ਕਰਨ ਆਏ ਸਨ। ਇਸ ਦੌਰਾਨ ਉਨ੍ਹਾਂ ਦਾ ਡਰਾਈਵਰ ਬਲਬੀਰ ਸਿੰਘ ਉਨ੍ਹਾਂ ਦੇ ਨਾਲ ਸੀ। ਡਰਾਈਵਰ ਨੇ ਸਾਨੂੰ ਕਾਰ ਤੋਂ ਉਤਾਰ ਕੇ ਕਾਰ ਛਾਂ ਹੇਠ ਖੜ੍ਹੀ ਕਰ ਦਿੱਤੀ। ਓਥੇ ਦੋ ਨੌਜਵਾਨ ਪੈਦਲ ਆਏ, ਜਿਨ੍ਹਾਂ ਨੇ ਆਪਣੇ ਮੂੰਹ ਉੱਤੇ ਮਾਸਕ ਲਾਇਆ ਹੋਇਆ ਸੀ।ਇਨ੍ਹਾਂ ਵਿੱਚੋਂ ਇੱਕ ਸਰਦਾਰ ਤੇ ਦੂਸਰਾ ਮੋਨਾ ਸੀ। ਉਕਤ ਨੌਜਵਾਨ ਡਰਾਈਵਰ ਬਲਬੀਰ ਸਿੰਘ ਕੋਲੋਂ ਇੱਕ ਸਰਕਾਰੀ ਦਫਤਰ ਬਾਰੇ ਪੁੱਛਣ ਲੱਗੇ। ਜਦੋਂ ਡਰਾਈਵਰ ਨੇ ਸਰਕਾਰੀ ਦਫ਼ਤਰ ਦੇ ਬਾਰੇ ਅਣਜਾਣਤਾ ਪ੍ਰਗਟਾਈ ਤਾਂ ਉਨ੍ਹਾਂ ਵਿੱਚੋਂ ਇੱਕ ਨੌਜਵਾਨ ਨੇ ਤੁਰੰਤ ਇੱਕ ਸਪਰੇਅ ਕੱਢ ਕੇ ਡਰਾਈਵਰ ਬਲਬੀਰ ਸਿੰਘ ਦੀਆਂ ਅੱਖਾਂ ਵਿੱਚ ਪਾ ਦਿੱਤੀ ਅਤੇ ਫਿਰ ਕਾਰ ਲੈ ਕੇ ਫਰਾਰ ਹੋ ਗਏ।