ਜਲੰਧਰ, 17 ਮਈ (ਪੋਸਟ ਬਿਊਰੋ)- ਭੇਦਭਰੀ ਹੈਪੇਟਾਈਟਸ ਬੀਮਾਰੀ ਪੂਰੀ ਦੁੁਨੀਆ ਲਈ ਸਮੱਸਿਆ ਬਣਦੀ ਜਾ ਰਹੀ ਹੈ। ‘ਯੂਰਪੀਨ ਸੈਂਟਰ ਫਾਰ ਡਿਜ਼ੀਜ਼ ਪ੍ਰੀਵੈਂਸ਼ਨ ਐਂਡ ਕੰਟਰੋਲ' (ਈ ਸੀ ਡੀ ਸੀ) ਦੇ ਅਨੁਸਾਰ ਪੂਰੀ ਦੁਨੀਆ ਵਿੱਚ 12 ਬੱਚਿਆਂ ਦੀ ਇਸ ਜਾਨਲੇਵਾ ਬੀਮਾਰੀ ਨਾਲ ਮੌਤ ਹੋ ਚੁੱਕੀ ਹੈ ਅਤੇ 450 ਤੋਂ ਵੱਧ ਬੀਮਾਰ ਹਨ।ਇਹ ਗਿਣਤੀ ਵਧਣੀ ਯਕੀਨੀ ਹੈ ਕਿਉਂਕਿ ਅਜੇ ਤਕ ਇਸ ਅਣਜਾਣ ਬੀਮਾਰੀ ਉੱਤੇ ਖੋਜ ਚੱਲ ਰਹੀ ਹੈ।
ਬੀਤੇ ਅਪ੍ਰੈਲ ਦੇ ਸ਼ੁਰੂ ਤੋਂ 10 ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਵਿੱਚ ਅਣਜਾਣੇ ਅਤੇ ਗੰਭੀਰ ਹੈਪੇਟਾਈਟਸ ਦਾ ਪਤਾ ਲਾਇਆ ਗਿਆ ਹੈ। ਅੱਜ ਤਕ ਇਹ 21 ਦੇਸ਼ਾਂ ਵਿੱਚ ਆਪਣੇ ਪੈਰ ਪਸਾਰ ਚੁੱਕੀ ਹੈ। ਹੈਪੇਟਾਈਟਸ ਜਿਗਰ ਦੀ ਇੱਕ ਸੋਜ਼ਿਸ਼ ਹੈ, ਜੋ ਆਮ ਤੌਰ ਉੱਤੇ ਵਾਇਰਲ ਇਨਫੈਕਸ਼ਨ ਜਾਂ ਸ਼ਰਾਬ ਪੀਣ ਨਾਲ ਜਿਗਰ ਦੇ ਨੁਕਸਾਨ ਨਾਲ ਹੁੰਦੀ ਹੈ। ਕੁਝ ਕੇਸ ਆਪਣੇ ਆਪ ਹੱਲ ਹੋ ਜਾਂਦੇ ਹਨ। ਕੁਝ ਕੇਸਾਂ ਵਿੱਚ ਇੱਕ ਜਿਗਰ ਟ੍ਰਾਂਸਟਪਲਾਂਟ ਦੀ ਲੋੜ ਹੁੰਦੀ ਹੈ। ਹੈਪੇਟਾਈਟਸ ਦਾ ਕਾਰਨ ਬਣਨ ਵਾਲੇ ਆਮ ਵਾਇਰਸਾਂ ਵਿੱਚ ਹੈਪੇਟਾਈਟਸ ਵਾਇਰਸ ਏ ਬੀ ਸੀ ਡੀ ਅਤੇ ਈ ਸ਼ਾਮਲ ਹਨ। ਦੁਨੀਆ ਵਿੱਚ ਰਿਪੋਰਟ ਕੀਤੇ ਕਿਸੇ ਕੇਸ ਵਿੱਚ ਇਸ ਅਣਜਾਣ ਬੀਮਾਰੀ ਦਾ ਪਤਾ ਨਹੀਂ ਲੱਗਾ।ਹੈਪੇਟਾਈਟਸ ਵਾਲੇ ਲੋਕਾਂ ਨੂੰ ਥਕਾਵਟ, ਭੁੱਖ ਨਾ ਲੱਗਣਾ, ਜੀ ਕੱਚਾ ਹੋਣਾ, ਉਲਟੀਆਂ, ਪੇਟ ਦਰਦ, ਗੂੜ੍ਹਾ ਪਿਸ਼ਾਬ, ਹਲਕੇ ਰੰਗ ਦਾ ਪਖਾਨਾ ਅਤੇ ਜੋੜਾਂ ਦੇ ਦਰਦ ਦਾ ਅਹਿਸਾਸ ਹੁੰਦਾ ਹੈ। ਜੇ ਚਮੜੀ ਅਤੇ ਅੱਖਾਂ ਦਾ ਰੰਗ ਪੀਲਾ ਪੈ ਜਾਂਦਾ ਹੈ ਤਾਂ ਉਹ ਪੀਲੀਆ ਤੋਂ ਪੀੜਤ ਹੋ ਸਕਦੇ ਹਨ।