ਮਾਸਕੋ, 15 ਮਈ (ਪੋਸਟ ਬਿਊਰੋ)- ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੇ ਫਿਨਲੈਂਡ ਦੇ ਰਾਸ਼ਟਰਪਤੀ ਸਾਉਲੀ ਨਿਨਿਸਤੋ ਨੂੰ ਦੇਸ਼ ਦੀ ਨਿਰਪੱਖ ਹੈਸੀਅਤ ਨਾ ਛੱਡਣ ਲਈ ਕਿਹਾ ਹੈ। ਉਨ੍ਹਾ ਕਿਹਾ ਕਿ ਫਿਨਲੈਂਡ ਦਾ ਨਾਟੋ ਵਿੱਚ ਸ਼ਾਮਲ ਹੋਣ ਦਾ ਫੈਸਲਾ ਗਲਤ ਹੈ ਤੇ ਇਸ ਕਾਰਨ ਰੂਸ ਨਾਲ ਉਸ ਦੇ ਦੁਵੱਲੇ ਸਬੰਧਾਂ ਨੂੰ ਨੁਕਸਾਨ ਹੋਵੇਗਾ।
ਵਲਾਦੀਮੀਰ ਪੁਤਿਨ ਨੇ ਇਹ ਗੱਲ ਨਿਨਿਸਤੋ ਨੂੰ ਟੈਲੀਫੋਨ ਉੱਤੇ ਕਹੀ ਹੈ। ਫਿਨਲੈਂਡ ਦੇ ਰਾਸ਼ਟਰਪਤੀ ਨਿਨਿਸਤੋ ਨੇ ਨਾਟੋ ਵਿੱਚ ਸ਼ਮਲ ਹੋਣ ਦੇ ਆਪਣੇ ਦੇਸ਼ ਦੇ ਫੈਸਲੇ ਦੀ ਜਾਣਕਾਰੀ ਦੇਣ ਲਈ ਪੁਤਿਨ ਨੂੰ ਫੋਨ ਕੀਤਾ ਸੀ। ਇਸ ਦੌਰਾਨ ਰੂਸ ਦੇ ਗੁਆਂਢੀ ਦੇਸ਼ ਫਿਨਲੈਂਡ ਨੇ ਵੀਰਵਾਰ ਨੂੰ ਅਮਰੀਕਾ ਦੀ ਅਗਵਾਈ ਵਾਲੇ ਫੌਜੀ ਸੰਗਠਨ ਵਿੱਚ ਸ਼ਾਮਲ ਹੋਣ ਲਈ ਅਪਲਾਈ ਕਰਨ ਦਾ ਐਲਾਨ ਕੀਤਾ ਸੀ। ਪ੍ਰਤੀਕਿਰਿਆ ਵਿੱਚ ਰੂਸ ਨੇ ਫਿਨਲੈਂਡ ਦੇ ਇਸ ਫੈਸਲੇ ਨੂੰ ਆਪਣੀ ਸੁਰੱਖਿਆ ਲਈ ਖਤਰਨਾਕ ਦੱਸਿਆ ਤੇ ਕਿਹਾ ਸੀ ਕਿ ਨਾਟੋ ਦੇ ਹਥਿਆਰਾਂ ਦੀ ਤੈਨਾਤੀ ਰੂਸੀ ਸਰਹੱਦ ਦੇ ਨਜ਼ਦੀਕ ਹੋ ਜਾਵੇਗੀ। ਰੂਸ ਨੇ ਫਿਨਲੈਂਡ ਖਿਲਾਫ ਜੰਗੀ ਕਾਰਵਾਈ ਦੀ ਚਿਤਾਵਨੀ ਵੀ ਦਿੱਤੀ। ਫਿਨਲੈਂਡ ਦੇ ਰਾਸ਼ਟਰਪਤੀ ਦਫਤਰ ਨੇ ਦੱਸਿਆ ਹੈ ਕਿ ਇਸ ਵਾਰਤਾ ਵਿੱਚ ਨਿਨਿਸਤੋ ਨੇ ਪੁਤਿਨ ਨੂੰ ਕਿਹਾ ਕਿ ਯੂਕਰੇਨ ਉਤੇ ਰੂਸੀ ਹਮਲੇ ਨੇ ਖੇਤਰੀ ਸੁਰੱਖਿਆ ਦੇ ਵਾਤਾਵਰਨ ਨੂੰ ਬਦਲ ਦਿੱਤਾ ਹੈ। ਉਨ੍ਹਾ ਕਿਹਾ ਕਿ ਫਿਨਲੈਂਡ ਆਪਣੇ ਗੁਆਂਢੀ ਦੇਸ਼ ਰੂਸ ਨਾਲ ਸਹੀ ਤੇ ਪੇਸ਼ੇਵਰ ਤਰੀਕੇ ਵਾਲੇ ਸਬੰਧ ਚਾਹੁੰਦਾ ਹੈ, ਜੋ ਸੁਤੰਤਰ ਨੀਤੀਆਂ ਉੱਤੇ ਆਧਾਰਤ ਹੋਣੇ ਚਾਹੀਦੇ ਹਨ। ਰੂਸ ਨੇ ਕਿਹਾ ਕਿ ਪੁਤਿਨ ਦਾ ਜ਼ੋਰ ਫਿਨਲੈਂਡ ਦੀ ਫੌਜੀ ਨਿਰਪੱਖਤਾ ਰੱਖਣ ਉਤੇ ਸੀ, ਕਿਉਂਕਿ ਫਿਨਲੈਂਡ ਦੀ ਸੁਰੱਖਿਆ ਨੂੰ ਕੋਈ ਖਤਰਾ ਨਹੀਂ। ਜੇ ਫਿਨਲੈਂਡ ਆਪਣੀ ਵਿਦੇਸ਼ ਨੀਤੀ ਵਿੱਚ ਬਦਲਾਅ ਕਰਦਾ ਹੈ ਤਾਂ ਉਸ ਦਾ ਰੂਸ ਤੇ ਫਿਨਲੈਂਡ ਦੇ ਸਬੰਧਾਂ ਉਤੇ ਗਲਤ ਅਸਰ ਪਵੇਗਾ।
ਇਸ ਦੌਰਾਨ ਰੂਸ ਦੀ ਸਭ ਤੋਂ ਵੱਡੀ ਬਿਜਲੀ ਕੰਪਨੀ ਆਰ ਏ ਓ ਨਾਰਡਿਕ ਨੇ ਕੱਲ੍ਹ ਤੋਂ ਫਿਨਲੈਂਡ ਦੀ ਬਿਜਲੀ ਸਪਲਾਈ ਰੋਕ ਦਿੱਤੀ ਹੈ। ਕੰਪਨੀ ਨੇ ਅਜਿਹਾ ਆਪਣੇ ਬਕਾਇਆ ਬਿਜਲੀ ਬਿੱਲ ਦਾ ਭੁਗਤਾਨ ਨਾ ਹੋਣ ਦੇ ਕਾਰਨ ਕੀਤਾ ਹੈ। ਫਿਨਲੈਂਡ ਦੀ ਇਲੈਕਟ੍ਰੀਸਿਟੀ ਟਰਾਂਸਮਿਸ਼ਨ ਗਰਿੱਡ ਦੇ ਆਪਰੇਟਰ ਨੇ ਦੱਸਿਆ ਕਿ ਰੂਸੀ ਕੰਪਨੀ ਨੇ ਦੁਪਹਿਰੇ ਇੱਕ ਵਜੇ ਤੋਂ ਬਿਜਲੀ ਸਪਲਾਈ ਬੰਦ ਕਰ ਦਿੱਤੀ ਹੈ। ਰੂਸੀ ਕੰਪਨੀ ਦਾ ਬਕਾਇਆ ਛੇ ਮਈ ਤੋਂ ਬਾਅਦ ਨਹੀਂ ਦਿਤਾ ਗਿਆ। ਬੀਤੇ 20 ਸਾਲ ਵਿੱਚ ਇਹ ਹਾਲਤ ਪਹਿਲੀ ਵਾਰ ਬਣੀ ਅਤੇ ਰੂਸੀ ਕੰਪਨੀ ਨੇ ਬਿਜਲੀ ਦੀ ਸਪਲਾਈ ਰੋਕ ਦਿੱਤੀ ਹੈ।