ਅਭਿਨੇਤਾ ਸੈਫ ਅਲੀ ਖਾਨ ਦਾ ਕਹਿਣਾ ਹੈ ਕਿ ਦੁਨੀਆ ਦੇ ਹਰ ਮਾਂ-ਬਾਪ ਵਾਂਗ ਉਹ ਆਪਣੇ ਪੁੱਤਰ ਇਬਰਾਹੀਮ ਅਲੀ ਖਾਨ ਦੇ ਭਵਿੱਖਿ ਬਾਰੇ ਚਿੰਤਤ ਹੈ। ਇਬਰਾਹੀਮ ਇਸ ਵੇਲੇ ਫਿਲਮ ‘ਰੌਕੀ ਔਰ ਰਾਣੀ ਕੀ ਪ੍ਰੇਮ ਕਹਾਣੀ’ ਵਿੱਚ ਕਰਣ ਜੌਹਰ ਨਾਲ ਸਹਾਇਕ ਡਾਇਰੈਕਟਰ ਵਜੋਂ ਕੰਮ ਕਰ ਰਿਹਾ ਹੈ। ਇੱਕ ਇੰਟਰਵਿਊ ਦੌਰਾਨ ਸੈਫ ਨੇ ਕਿਹਾ, ‘‘ਮੈਂ ਉਸ ਦੇ ਭਵਿੱਖ ਲਈ ਚਿੰਤਤ ਹਾਂ ਅਤੇ ਮੈਂ ਖੁਸ਼ ਹਾਂ ਕਿ ਉਹ ਮਿਹਨਤ ਕਰ ਰਿਹਾ ਹੈ। ਮੈਨੂੰ ਲੱਗਦਾ ਹੈ ਕਿ ਇਬਰਾਹੀਮ ਨੇ ਸਕੂਲ ਵਿੱਚ ਬਹੁਤ ਵਧੀਆ ਪ੍ਰਦਰਸ਼ਨ ਕੀਤਾ ਹੈ ਅਤੇ ਹਰ ਮਾਂ-ਬਾਪ ਵਾਂਗ ਮੈਨੂੰ ਉਸ ਦੇ ਭਵਿੱਖ ਦੀਚਿੰਤਾ ਹੈ।”
ਸੈਫ ਨੇ ਕਿਹਾ, ‘‘ਇੱਕ ਖਾਸ ਉਮਰ ਤੱਕ ਤੁਹਾਡਾ ਸਿੱਧਾ-ਸਾਧਾ ਤੇ ਸਾਧਾਰਨ ਹੋਣਾ ਬਹੁਤ ਸੁਭਾਵਿਕ ਗੱਲ ਹੈ, ਜੋ ਮੈਨੂੰ ਇਬਰਾਹੀਮ ਵਿੱਚ ਦਿਖਾਈ ਦਿੰਦੀ ਹੈ, ਪਰ ਇਹੀ ਆਦਤ ਵੱਡੀ ਉਮਰੇ ਹੋਣਾ ਚੰਗੀ ਗੱਲ ਨਹੀਂ।” ਇਬਰਾਹੀਮ ਅਤੇ ਉਸ ਦੀ ਭੈਣ ਸਾਰਾ ਅਲੀ, ਅੰਮ੍ਰਿਤਾ ਸਿੰਘ ਅਤੇ ਸੈਫ ਅਲੀ ਖਾਨ ਦੇ ਬੱਚੇ ਹਨ। ਪੁੱਤਰ ਦਾ ਮੜੰਗਾ ਉਸ ਵਰਗਾ ਹੋਣ ਬਾਰੇ ਸੈਫ ਨੇ ਕਿਹਾ, ‘‘ਉਹ ਵੀ ਅਕਸਰ ਇਹੀ ਕਹਿੰਦਾ ਹੈ ਕਿ ਉਹ ਜਵਾਨ ਸੈਫ ਅਲੀ ਖਾਨ ਵਰਗਾ ਦਿਸਦਾ ਹੈ।”