ਟਾਂਡਾ ਉੜਮੁੜ, 29 ਅਪ੍ਰੈਲ (ਪੋਸਟ ਬਿਊਰੋ)- ਪਿੰਡ ਕੁਰਾਲਾ ਵਿੱਚ ਭਤੀਜੇ ਨੇ ਆਪਣੇ ਚਾਚੇ ਨੂੰ ਗੋਲੀ ਮਾਰ ਕੇ ਮਾਰ ਦਿੱਤਾ ਹੈ। ਮ੍ਰਿਤਕ ਦੀ ਪਛਾਣ ਹਰਪ੍ਰੀਤ ਸਿੰਘ (49) ਪੁੱਤਰ ਸੁਰਿੰਦਰ ਸਿੰਘ ਵਾਸੀ ਕੁਰਾਲਾ ਵਜੋਂ ਹੋਈ ਹੈ।
ਮ੍ਰਿਤਕ ਦੇ ਪੁੱਤਰ ਹਰਸਿਮਰਨ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਨੇ ਆਪਣੇ ਘਰ ਵਿੱਚ ਪਸ਼ੂਆਂ ਤੋਂ ਇਲਾਵਾ 20-25 ਦੇਸੀ ਮੁਰਗੀਆਂ ਰੱਖੀਆਂ ਹੋਈਆਂ ਹਨ।ਕੱਲ੍ਹ ਸਵਰੇ ਉਸ ਦਾ ਪਿਤਾ ਢੇਰ ਉੱਤੇ ਕੂੜਾ ਸੁੱਟਣ ਗਿਆ ਤਾਂ ਓਥੇ ਕਿਸੇ ਨੇ ਮੁਰਗੇ ਮਾਰਨ ਦੀ ਦਵਾਈ ਪਾਈ ਹੋਈ ਸੀ। ਹਰਪ੍ਰੀਤ ਸਿੰਘ ਨੇ ਸ਼ਰੀਕੇ ਵਿੱਚੋਂ ਭਰਾ ਹਰਕੰਵਲ ਸਿੰਘ ਤੇ ਹਰਸਿਮਰਨ ਨੂੰ ਬੁਲਾ ਲਿਆ ਤੇ ਗੱਲਬਾਤ ਕਰਨ ਲੱਗੇ। ਏਨੇ ਨੂੰ ਸ਼ਰੀਕੇ ਵਿੱਚੋਂ ਅਮਨਦੀਪ ਸਿੰਘ ਪਹੁੰਚ ਗਿਆ। ਹਰਪ੍ਰੀਤ ਤੇ ਅਮਨਦੀਪ ਦੀ ਬਹਿਸ ਹੋ ਗਈ ਕਿਉਂਕਿ ਅਮਨਦੀਪ ਨੇ ਪਹਿਲਾਂ ਵੀ ਦੋ ਵਾਰ ਮੁਰਗੀਆਂਮਾਰਨ ਦੀ ਦਵਾਈ ਪਾਈ ਸੀ। ਅਮਨਦੀਪ ਤੈਸ਼ ਵਿੱਚ ਆਪਣੇ ਘਰ ਗਿਆ ਤੇ ਕੁਝ ਮਿੰਟਾਂ ਵਿੱਚ ਦੁਨਾਲੀ ਬੰਦੂਕ ਚੁੱਕ ਲਿਆਇਆ ਤੇਇੱਕ ਫਾਇਰ ਹਵਾ ਵਿੱਚ ਕਰ ਕੇ ਦੂਜਾ ਫਾਇਰ ਹਰਸਿਮਰਨ ਵੱਲ ਕਰਨ ਲੱਗਾ ਤਾਂ ਹਰਪ੍ਰੀਤ ਸਿੰਘ ਅੱਗੇ ਆਉਣ ਕਰ ਕੇ ਜ਼ਖਮੀ ਹੋ ਗਿਆ। ਉਸ ਨੂੰ ਟਾਂਡਾ ਦੇ ਹਸਪਤਾਲ ਲੈ ਗਏ, ਪਰ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ।