ਟੋਰਾਂਟੋ, 16 ਜਨਵਰੀ (ਪੋਸਟ ਬਿਊਰੋ) : ਐਤਵਾਰ ਰਾਤ ਤੋਂ ਸ਼ੁਰੂ ਹੋ ਕੇ ਸੋਮਵਾਰ ਤੱਕ ਟੋਰਾਂਟੋ ਤੇ ਜੀਟੀਏ ਵਿੱਚ ਭਾਰੀ ਬਰਫਬਾਰੀ ਹੋਣ ਦੀ ਚੇਤਾਵਨੀ ਜਾਰੀ ਕੀਤੀ ਗਈ ਹੈ।
ਐਨਵਾਇਰਮੈਂਟ ਕੈਨੇਡਾ ਦਾ ਕਹਿਣਾ ਹੈ ਕਿ ਸੋਮਵਾਰ ਰਾਤ ਤੱਕ 15 ਤੋਂ 20 ਸੈਂਟੀਮੀਟਰ ਤੱਕ ਬਰਫਬਾਰੀ ਹੋ ਸਕਦੀ ਹੈ। ਸੋਮਵਾਰ ਸਵੇਰੇ 2 ਤੋਂ 3 ਸੈਂਟੀਮੀਟਰ ਤੱਕ ਬਰਫਬਾਰੀ ਹੋਣ ਦੀ ਸੰਭਾਵਨਾ ਹੈ।ਏਜੰਸੀ ਅਨੁਸਾਰ ਇਸ ਨਾਲ ਆਵਾਜਾਈ ਉੱਤੇ ਵੀ ਅਸਰ ਪਵੇਗਾ। ਤੇਜ਼ ਉੱਤਰ ਪੱਛਮੀ ਹਵਾਵਾਂ, ਜੋ ਕਿ 50 ਕਿਲੋਮੀਟਰ ਪ੍ਰਤੀ ਘੰਟੇ ਦੇ ਹਿਸਾਬ ਨਾਲ ਚੱਲ ਸਕਦੀਆਂ ਹਨ, ਕਾਰਨ ਇਲਾਕੇ ਵਿੱਚ ਵਿਜ਼ੀਬਿਲਿਟੀ ਕਾਫੀ ਮਾੜੀ ਰਹਿ ਸਕਦੀ ਹੈ।
ਹਾਲਾਂਕਿ ਸਿਟੀ ਆਫ ਟੋਰਾਂਟੋ ਵੱਲੋਂ ਠੰਢ ਸਬੰਧੀ ਵੈਦਰ ਐਲਰਟ ਨੂੰ ਖ਼ਤਮ ਕਰ ਦਿੱਤਾ ਗਿਆ ਹੈ ਪਰ ਕਮਜ਼ੋਰ ਨਾਗਰਿਕਾਂ ਲਈ ਕਈ ਵਾਰਮਿੰਗ ਸੈਂਟਰਜ਼ ਖੁੱਲ੍ਹੇ ਰੱਖੇ ਜਾਣਗੇ।ਟੋਰਾਂਟੋ ਡਿਸਟ੍ਰਿਕਟ ਸਕੂਲ ਬੋਰਡ ਤੇ ਟੋਰਾਂਟੋ ਕੈਥੋਲਿਕ ਡਿਸਟ੍ਰਿਕਟ ਸਕੂਲ ਬੋਰਡ ਵੱਲੋਂ ਸੋਮਵਾਰ ਨੂੰ ਇਨ ਪਰਸਨ ਲਰਨਿੰਗ ਲਈ ਜੇ ਸਕੂਲ ਬੰਦ ਰਹਿੰਦੇ ਹਨ ਤੇ ਬੱਸਾਂ ਨਹੀਂ ਚੱਲਦੀਆਂ ਤਾਂ ਇਸ ਬਾਰੇ ਮਾਪਿਆਂ ਨੂੰ ਜਾਣਕਾਰੀ ਦੇ ਦਿੱਤੀ ਜਾਵੇਗੀ।ਅਜਿਹੀ ਸਥਿਤੀ ਵਿੱਚ ਕਲਾਸਾਂ ਵਰਚੂਅਲੀ ਲਾਈਆਂ ਜਾਣਗੀਆਂ।
ਐਤਵਾਰ ਸ਼ਾਮ ਨੂੰ ਆਨਲਾਈਨ ਸਾਂਝੇ ਕੀਤੇ ਗਏ ਬਿਆਨ ਵਿੱਚ ਦੋਵਾਂ ਬੋਰਡਜ਼ ਨੇ ਆਖਿਆ ਕਿ ਇਸ ਸਬੰਧ ਵਿੱਚ ਫੈਸਲਾ ਸਵੇਰੇ 6:00 ਵਜੇ ਲਿਆ ਜਾਵੇਗਾ।