ਪਟਿਆਲਾ, 16 ਅਕਤਬੂਰ (ਪੋਸਟ ਬਿਊਰੋ)- ਪਟਿਆਲਾ-ਪਿਹੋਵਾ ਰੋਡ ਉੱਤੇ ਪਿੰਡ ਜਗਤਪੁਰਾ ਵਿਖੇ ਟਰੈਕਟਰ-ਟਰਾਲੀ ਅਤੇ ਤੇਜ਼ ਰਫ਼ਤਾਰ ਕਾਰ ਦੀ ਟੱਕਰ ਵਿੱਚ ਪੰਜ ਵਿਅਕਤੀਆਂ ਦੀ ਮੌਤ ਹੋ ਗਈ ਅਤੇ ਲੱਗਭਗ 15 ਵਿਅਕਤੀ ਜ਼ਖ਼ਮੀ ਹੋ ਗਏ ਹਨ। ਜ਼ਖ਼ਮੀਆਂ ਨੂੰ ਸਰਕਾਰੀ ਰਜਿੰਦਰਾ ਹਸਪਤਾਲ ਦਾਖ਼ਲ ਕਰਾਇਆ ਗਿਆ ਹੈ।ਮ੍ਰਿਤਕਾਂ ਦੀ ਪਛਾਣ ਰੋਹਿਤ (8), ਨਿੱਕਾ (30), ਸੋਨੂੰ ਵਾਸੀ ਮਿਰਚ ਮੰਡੀ, ਸਨੌਰੀ ਅੱਡਾ ਪਟਿਆਲਾ ਅਤੇ ਕਾਰ ਸਵਾਰ ਕਰਮਜੋਤ ਸਿੰਘ (23) ਪਿੰਡ ਬਘੌਰਾ, ਸਮਰਾਲਾ ਤੇ ਗੁਰਪ੍ਰੀਤ ਸਿੰਘ (23) ਪਿੰਡ ਹਰਾਜ, ਮੁਕਤਸਰ ਸਾਹਿਬ ਵਜੋਂ ਹੋਈ ਹੈ। ਜ਼ਖ਼ਮੀਆਂ ਵਿੱਚ ਨੀਲਮ, ਅਰੁਣ, ਅਮਨ, ਸ਼ੌਕੀ, ਸੀਤਾ, ਸੋਨੂੰ, ਵਿਸ਼ਾਲ, ਮੋਹਿਤ, ਸਾਹਿਬਾ, ਸ਼ੇਰੋ, ਪਾਲੋ, ਅਰਜੁਨ, ਸਨੌਰੀ ਅੱਡਾ ਪਟਿਆਲਾ ਸ਼ਾਮਲ ਹਨ। ਇਨ੍ਹਾਂ ਤੋਂ ਇਲਾਵਾ ਤਿੰਨ ਜਣਿਆਂ ਦੀ ਗੰਭੀਰ ਹਾਲਤ ਕਾਰਨ ਉਨ੍ਹਾਂ ਨੂੰ ਪੀ ਜੀ ਆਈ ਭੇਜਿਆ ਗਿਆ ਹੈ।
ਇਸ ਹਾਦਸੇ ਵਿੱਚ ਮਾਰੇ ਗਏ ਕਾਰ ਸਵਾਰ ਗੁਰਪ੍ਰੀਤ ਸਿੰਘ ਅਤੇ ਕਰਮਜੋਤ ਸਿੰਘ ਦੋਵੇਂ ਦੋਸਤ ਸਨ। ਗੁਰਪ੍ਰੀਤ ਸਿੰਘ ਪੰਜਾਬੀ ਯੂਨੀਵਰਸਿਟੀ ਵਿੱਚ ਐਮਟੈਕ ਦੀ ਪੜ੍ਹਾਈ ਕਰ ਰਿਹਾ ਸੀ। ਹਾਦਸੇ ਬਾਰੇ ਹਸਪਤਾਲ ਵਿੱਚ ਜ਼ੇਰੇ ਇਲਾਜ ਮਿਰਚ ਮੰਡੀ, ਸਨੌਰੀ ਦੇ ਸੋਨੂੰ ਕੁਮਾਰ ਨੇ ਦੱਸਿਆ ਕਿ ਉਹ ਮਜ਼ਦੂਰੀ ਕਰ ਕੇ ਘਰ ਚਲਾਉਂਦੇ ਹਨ। ਉਸ ਨੇ ਦੱਸਿਆ ਕਿ ਉਸ ਨੇ ਪੁਰਾਣਾ ਟਰੈਕਟਰ ਖ਼ਰੀਦਿਆ ਸੀ ਤੇ ਉਸਦੀ ਸੁੱਖ ਲਾਹੁਣ ਲਈ ਮੁਹੱਲੇ ਦੇ 40 ਤੋਂ 50 ਵਿਅਕਤੀਆਂ ਨਾਲ ਪੱਕੇ ਪੁਲ ਕਰਨਾਲ ਵਿਖੇ ਪੀਰ ਦੀ ਦਰਗਾਹ ਉੱਤੇ ਮੱਥਾ ਟੇਕਣ ਗਏ ਸਨ। ਦੇਰ ਰਾਤ ਜਦੋਂ ਉਹ ਲੱਗਭਗ ਡੇਢ ਵਜੇ ਜੋੜੀਆਂ ਰੋਡ ਉੱਤੇ ਪਿੰਡ ਜਗਤਪੁਰਾ ਨੇੜੇ ਪੁੱਜੇ ਤਾਂ ਪਿੱਛੋਂ ਤੇਜ਼ ਰਫ਼ਤਾਰ ਨਾਲ ਆ ਰਹੀ ਕਾਰ ਨੇ ਉਨ੍ਹਾਂ ਦੀ ਟਰੈਕਟਰ ਟਰਾਲੀ ਨੂੰ ਟੱਕਰ ਮਾਰ ਦਿੱਤੀ, ਜਿਸ ਕਾਰਨ ਟਰਾਲੀ ਪਲਟ ਗਈ ਤੇ ਇਸ ਵਿੱਚ ਬੈਠੇ ਸਾਰੇ ਲੋਕ ਟਰਾਲੀ ਹੇਠਾਂ ਆ ਗਏ। ਹਾਦਸੇ ਵਿੱਚ ਉਨ੍ਹਾਂ ਨਾਲ ਬੈਠੇ ਤਿੰਨ ਜਣਿਆਂ ਦੀ ਮੌਤ ਹੋ ਗਈ ਅਤੇ ਕਈ ਹੋਰ ਜ਼ਖ਼ਮੀ ਹੋ ਗਏ।