ਓਟਵਾ, 4 ਅਕਤੂਬਰ (ਪੋਸਟ ਬਿਊਰੋ) : ਹੈਲਥ ਕੈਨੇਡਾ ਵੱਲੋਂ ਐਤਵਾਰ ਨੂੰ ਕੀਤੇ ਗਏ ਐਲਾਨ ਅਨੁਸਾਰ ਐਡਵਿਲ ਕੋਲਡ ਐਂਡ ਸਾਇਨਸ ਡੇਅ/ਨਾਈਟ ਪੈਕ ਦੇ ਕੁੱਝ ਬੈਚ ਵਾਪਿਸ ਮੰਗਵਾਏ ਜਾ ਰਹੇ ਹਨ। ਅਜਿਹਾ ਲੇਬਲਿੰਗ ਵਿੱਚ ਹੋਈ ਗੜਬੜ ਕਾਰਨ ਕੀਤਾ ਗਿਆ ਹੈ।
ਫੈਡਰਲ ਏਜੰਸੀ ਨੇ ਆਖਿਆ ਕਿ ਗਲਤ ਢੰਗ ਨਾਲ ਲੇਬਲ ਕੀਤੇ ਗਏ ਇਨ੍ਹਾਂ ਬਾਕਸ ਵਿੱਚ 36 ਕੈਪਲੈਟਸ ਹਨ ਜਿਨ੍ਹਾਂ ਵਿੱਚੋਂ ਇੱਕ ਦਾ ਲੌਟ ਨੰਬਰ ਈਆਰ 2072 ਤੇ ਦੂਜੇ ਬਾਕਸ ਦਾ ਲੌਟ ਨੰਬਰ ਈਆਰ 2069 ਹੈ। ਇਨ੍ਹਾਂ ਉੱਤੇ 2023 ਐਕਸਪਾਇਰੀ ਡੇਟ ਲਿਖੀ ਹੋਈ ਹੈ। ਇਨ੍ਹਾਂ ਵਿੱਚ ਗੜਬੜ ਇਹ ਹੋਈ ਹੈ ਕਿ ਰਾਤ ਸਮੇਂ ਲੈਣ ਵਾਲੀਆਂ ਕੈਪਲੈਟਸ ਦਿਨ ਵੇਲੇ ਲੈਣ ਵਾਲੀਆਂ ਕੈਪਲੈਟਸ ਨਾਲ ਬਦਲ ਗਈਆਂ ਹਨ। ਦਿਨ ਵਾਲੇ ਲਈਆਂ ਜਾਣ ਵਾਲੀ ਕੈਪਲੈਟਸ ਨੂੰ ਰਾਤ ਵਾਲੀਆਂ ਕੈਪਲੈਟਸ ਵਜੋਂ ਲੇਬਲ ਕੀਤਾ ਗਿਆ ਹੈ।
ਏਜੰਸੀ ਨੂੰ ਡਰ ਹੈ ਕਿ ਕੰਜਿ਼ਊਮਰਜ਼ ਗਲਤ ਲੇਬਲਿੰਗ ਕਾਰਨ ਰਾਤ ਵੇਲੇ ਲੈਣ ਵਾਲੀਆਂ ਕੈਪਲੈਟਸ ਨੂੰ ਦਿਨ ਵੇਲੇ ਤੇ ਦਿਨ ਵਾਲੀਆਂ ਕੈਪਲੈਟਸ ਨੂੰ ਰਾਤ ਵੇਲੇ ਲੈ ਸਕਦੇ ਹਨ।ਹੈਲਥ ਕੈਨੇਡਾ ਦਾ ਕਹਿਣਾ ਹੈ ਕਿ ਇਸ ਤਰ੍ਹਾਂ ਗਲਤ ਲੇਬਲਿੰਗ ਕਾਰਨ ਸਿਹਤ ਸਬੰਧੀ ਖਤਰੇ ਹੋ ਸਕਦੇ ਹਨ। ਖਾਸਤੌਰ ਉੱਤੇ ਜੇ ਕੋਈ ਰਾਤ ਸਮੇਂ ਲਈ ਜਾਣ ਵਾਲੀ ਕੈਪਲੈਟ ਦਿਨ ਸਮੇਂ ਲੈਂਦਾ ਹੈ ਤਾਂ ਉਸ ਨੂੰ ਡਰਾਈਵ ਕਰਦੇ ਸਮੇਂ ਜਾਂ ਮਸ਼ੀਨਾਂ ਆਪਰੇਟ ਕਰਦੇ ਸਮੇਂ ਕਿਸੇ ਹਾਦਸੇ ਦਾ ਖਤਰਾ ਹੋ ਸਕਦਾ ਹੈ।