ਅਭਿਨੇਤਰੀ ਰਾਧਿਕਾ ਆਪਟੇ ਨੇ ਆਪਣੀ ਅਗਲੀ ਫਿਲਮ ‘ਫੋਰੈਂਸਿਕ’ ਦੀ ਸ਼ੂਟਿੰਗ ਮੁਕੰਮਲ ਕਰ ਲਈ ਹੈ। ਸੋਹਮ ਰੌਕਸਟਾਰ ਇੰਟਰਟੇਨਮੈਂਟ ਪ੍ਰਾਈਵੇਟ ਲਿਮਟਿਡ ਅਤੇ ਮਿਨੀ ਫਿਲਮਜ਼ ਦੇ ਬੈਨਰ ਹੇਠ ਬਣਾਈ ਜਾ ਰਹੀ ਇਸ ਫਿਲਮ ਦਾ ਨਿਰਦੇਸ਼ਨ ‘ਕ੍ਰਿਮੀਨਲ ਜਸਟਿਸ’ ਲਈ ਜਾਣੇ ਜਾਂਦੇ ਵਿਸ਼ਾਲ ਫੁਰੀਆ ਨੇ ਕੀਤਾ ਹੈ। ਅਭਿਨੇਤਰੀ ਨੇ ਆਪਣੇ ਇੰਸਟਾਗ੍ਰਾਮ ਅਕਾਊਂਟ ਉੱਤੇ ਜਾਣਕਾਰੀ ਦਿੰਦਿਆਂ ਸਹਿਯੋਗੀ ਕਲਾਕਾਰ ਵਿਕਰਾਂਤ ਮੇਸੀ ਨਾਲ ਇੱਕ ਤਸਵੀਰ ਸਾਂਝੀ ਕੀਤੀ ਹੈ।
ਆਪਟੇ ਨੇ ਕੈਪਸ਼ਨ ਵਿੱਚ ਲਿਖਿਆ,‘‘ਮੇਰੇ ਲਈ ਇਹ ਫਿਲਮ ਮੁਕੰਮਲ ਹੈ।” ਸੋਹਮ ਰੌਕਸਟਾਰ ਇੰਟਰਟੇਨਮੈਂਟ ਪ੍ਰਾਈਵੇਟ ਲਿਮਟਿਡ ਦੇ ਦੀਪਕ ਮੁਕਟ ਨੇ ਮਿਨੀ ਫਿਲਮਜ਼ ਦੇ ਬੈਨਰ ਹੇਠ ਮਾਨੀਸ ਬਾਗਲਾ ਤੇ ਵਰੁਣ ਬਾਗਲਾ ਨਾਲ ਮਿਲ ਕੇ ਇਹ ਫਿਲਮ ਪੇਸ਼ ਕੀਤੀ ਹੈ। ਫਿਲਮ ਦੇ ਸਹਿ ਨਿਰਮਾਤਾ ਹੁਨਰ ਮੁਕਟ ਹਨ। ‘ਫੋਰੈਂਸਿਕ’ ਤੋਂ ਬਿਨਾ ਰਾਧਿਕਾ ਆਪਟੇ ਫਿਲਮਸਾਜ਼ ਵਸਨ ਬਾਲਾ ਦੀ ਫਿਲਮ ‘ਮੋਨਿਕਾ, ਓ ਮਾਇ ਡਾਰਲਿੰਗ’ ਵਿੱਚ ਵੀ ਦਿਖਾਈ ਦੇਵੇਗੀ। ਨੈੱਟਫਲਿਕਸ ਉੱਤੇ ਰਿਲੀਜ਼ ਹੋਣ ਵਾਲੀ ਇਸ ਫਿਲਮ ਵਿੱਚ ਰਾਜ ਕੁਮਾਰ ਰਾਓ ਅਤੇ ਹੁਮਾ ਕੁਰੈਸ਼ੀ ਨੇ ਅਹਿਮ ਭੂਮਿਕਾ ਨਿਭਾਈ ਹੈ। ਸੂਤਰਾਂ ਅਨੁਸਾਰ ਫਿਲਮ ‘ਮੋਨਿਕਾ ਓ ਮਾਇ ਡਾਰਲਿੰਗ’ ਵਿੱਚ ਸਿਕੰਦਰ ਖੇਰ ਦੀ ਐਂਟਰੀ ਹੋ ਗਈ ਹੈ। ਸਿਕੰਦਰ ਦੱਸਦੇ ਹਨ ਕਿ ‘‘ਵਸਨ ਦੀ ਫਿਲਮ ਮੇਕਿੰਗ ਸ਼ੈਲੀ ਤੋਂ ਪ੍ਰਭਾਵਤ ਹਾਂ। ਉਸ ਨਾਲ ਕੰਮ ਕਰ ਕੇ ਮਜ਼ਾ ਆਇਆ। ਉਸ ਦਾ ਲੇਖਨ-ਨਿਰਦੇਸ਼ਨ ਮਾਸਟਰਪੀਸ ਹੈ। ਉਹ ਜਿਸ ਤਰ੍ਹਾਂ ਦਾ ਅਨੋਖਾ ਸਿਨੇਮਾ ਪੇਸ਼ ਕਰਦੇ ਹਨ, ਉਹ ਫ੍ਰੈਸ਼ ਹੁੰਦਾ ਹੈ। ਇਹ ਅਨੁਭਵ ਕਿਸੇ ਸਿੱਖਣ ਦੀ ਅਵਸਥਾ ਤੋਂ ਘੱਟ ਨਹੀਂ ਹੈ। ਉਮੀਦ ਹੈ ਕਿ ਸਾਡੇ ਰਸਤੇ ਜਲਦੀ ਹੀ ਫਿਰ ਤੋਂ ਇੱਕ ਦੂਸਰੇ ਨਾਲ ਮਿਲਣਗੇ।”