ਓਟਵਾ, 15 ਸਤੰਬਰ (ਪੋਸਟ ਬਿਊਰੋ) : ਵੋਟਾਂ ਪੈਣ ਵਿੱਚ ਹੁਣ ਜਦੋਂ ਕੁੱਝ ਦਿਨ ਹੀ ਬਾਕੀ ਰਹਿ ਗਏ ਹਨ ਅਜਿਹੇ ਵਿੱਚ ਨਵੇਂ ਸਰਵੇਖਣ ਤੋਂ ਸਾਹਮਣੇ ਆਇਆ ਹੈ ਕਿ ਜੀਟੀਏ ਵਿੱਚ ਲਿਬਰਲ ਪਾਰਟੀ ਨੇ ਹੋਰਨਾਂ ਪਾਰਟੀਆਂ ਦੇ ਮੁਕਾਬਲੇ ਕਾਫੀ ਲੀਡ ਲੈ ਲਈ ਹੈ।
ਬੁੱਧਵਾਰ ਨੂੰ ਨੈਨੋਜ਼ ਰਿਸਰਚ ਵੱਲੋਂ ਜਾਰੀ ਕੀਤੀ ਗਈ ਰਲੀਜ਼ ਵਿੱਚ ਆਖਿਆ ਗਿਆ ਕਿ 18 ਤੋਂ 22 ਅਗਸਤ ਦਰਮਿਆਨ ਪੰਜ ਦਿਨਾਂ ਲਈ ਕਰਵਾਏ ਗਏ ਸਰਵੇਖਣ ਤੋਂ ਸਪਸ਼ਟ ਹੋਇਆ ਹੈ ਕਿ ਜੀਟੀਏ ਵਿੱਚ ਇਸ ਸਰਵੇਖਣ ਵਿੱਚ ਹਿੱਸਾ ਲੈਣ ਵਾਲਿਆਂ ਵਿੱਚੋਂ 44 ਫੀ ਸਦੀ ਨੇ ਲਿਬਰਲਾਂ ਨੂੰ ਆਪਣੀ ਪਹਿਲੀ ਪਸੰਦ ਦੱਸਿਆ ਹੈ, ਇਸ ਤੋਂ ਬਾਅਦ ਕੰਜ਼ਰਵੇਟਿਵਾਂ ਨੂੰ 34 ਫੀ ਸਦੀ ਸਮਰਥਨ ਹਾਸਲ ਹੁੰਦਾ ਨਜ਼ਰ ਆ ਰਿਹਾ ਹੈ ਤੇ ਐਨਡੀਪੀ ਦਾ ਸਮਰਥਨ 18 ਫੀ ਸਦੀ ਲੋਕਾਂ ਵੱਲੋਂ ਕੀਤਾ ਗਿਆ ਤੇ ਗ੍ਰੀਨ ਪਾਰਟੀ ਨੂੰ ਤਿੰਨ ਫੀ ਸਦੀ ਲੋਕਾਂ ਦੀ ਹਮਾਇਤ ਹਾਸਲ ਹੋਈ ਤੇ ਪੀਪਲਜ਼ ਪਾਰਟੀ ਆਫ ਕੈਨੇਡਾ ਨੂੰ ਸਿਰਫ ਇੱਕ ਫੀ ਸਦੀ ਲੋਕਾਂ ਦਾ ਸਮਰਥਨ ਹਾਸਲ ਹੋ ਰਿਹਾ ਹੈ।
10 ਤੋਂ 14 ਸਤੰਬਰ ਨੂੰ ਕਰਵਾਏ ਗਏ ਪੰਜ ਦਿਨਾਂ ਦੇ ਸਰਵੇਖਣ ਵਿੱਚ ਸਾਹਮਣੇ ਆਇਆ ਕਿ ਹੁਣ ਲਿਬਰਲ 47 ਫੀ ਸਦੀ ਲੋਕਾਂ ਦਾ ਸਮਰਥਨ ਹਾਸਲ ਕਰ ਰਹੇ ਹਨ ਜਦਕਿ ਕੰਜ਼ਰਵੇਟਿਵਾਂ ਦੇ ਸਮਰਥਕਾਂ ਦੀ ਗਿਣਤੀ ਘੱਟ ਕੇ 27 ਫੀ ਸਦੀ ਰਹਿ ਗਈ ਹੈ। ਇਸ ਤੋਂ ਭਾਵ ਹੈ ਕਿ ਗ੍ਰੇਟਰ ਟੋਰਾਂਟੋ ਏਰੀਆ ਵਿੱਚ ਕੰਜ਼ਰਵੇਟਿਵਾਂ ਦੇ ਮੁਕਾਬਲੇ ਲਿਬਰਲ ਪਾਰਟੀ ਦੀ ਲੀਡ ਦੁੱਗਣੀ ਹੋ ਗਈ ਹੈ। ਐਨਡੀਪੀ ਦੇ ਸਮਰਥਨ ਵਿੱਚ ਕੋਈ ਫਰਕ ਨਹੀਂ ਆਇਆ, ਉਸਨੁੰ ਮਿਲਣ ਵਾਲਾ ਸਮਰਥਨ ਪਹਿਲਾਂ ਵੀ 18 ਫੀ ਸਦੀ ਸੀ ਤੇ ਹੁਣ ਵੀ ਓਨਾਂ ਹੀ ਹੈ।
ਹੈਰਾਨੀ ਵਾਲੀ ਗੱਲ ਇਹ ਹੈ ਕਿ ਕੰਜ਼ਰਵੇਟਿਵਾਂ ਦੇ ਸਮਰਥਨ ਵਿੱਚੋਂ ਸੱਜੇ ਪੱਖੀ ਪੀਪਲਜ਼ ਪਾਰਟੀ ਆਫ ਕੈਨੇਡਾ ਨੂੰ ਕੁੱਝ ਸਮਰਥਨ ਹਾਸਲ ਹੋਇਆ ਹੈ, ਇਸ ਸਮੇਂ ਜੀਟੀਏ ਵਿੱਚ ਇਸ ਪਾਰਟੀ ਨੂੰ ਛੇ ਫੀ ਸਦੀ ਸਮਰਥਨ ਹਾਸਲ ਹੋ ਰਿਹਾ ਹੈ। ਗ੍ਰੀਨ ਪਾਰਟੀ ਦੇ ਸਮਰਥਨ ਵਿੱਚ ਇੱਕ ਜਾਂ ਦੋ ਫੀ ਸਦੀ ਕਮੀ ਦਰਜ ਕੀਤੀ ਗਈ ਹੈ।
ਦੂਜੇ ਪਾਸੇ ਪ੍ਰੋਵਿੰਸ ਪੱਧਰ ਉੱਤੇ ਜੇ ਵੇਖਿਆ ਜਾਵੇ ਤਾਂ ਜੀਟੀਏ ਨਾਲੋਂ ਉਲਟ ਲਿਬਰਲਾਂ ਦੇ ਦੋ ਅੰਕਾਂ ਵਿੱਚ ਕਟੌਤੀ ਹੋਈ ਹੈ ਤੇ ਇਸ ਸਮੇਂ ਪਾਰਟੀ ਨੂੰ 40 ਫੀ ਸਦੀ ਸਮਰਥਨ ਹਾਸਲ ਹੋ ਰਿਹਾ ਹੈ ਜਦਕਿ ਕੰਜ਼ਰਵੇਟਿਵਾਂ ਦੇ ਸਮਰਥਨ ਵਿੱਚ ਪੰਜ ਅੰਕਾਂ ਦੀ ਕਮੀ ਦਰਜ ਕੀਤੀ ਗਈ ਹੈ ਤੇ ਉਨ੍ਹਾਂ ਨੂੰ ਇਸ ਸਮੇਂ 30 ਫੀ ਸਦੀ ਸਮਰਥਨ ਹਾਸਲ ਹੋ ਰਿਹਾ ਹੈ। ਐਨਡੀਪੀ ਨੂੰ ਪ੍ਰੋਵਿੰਸ ਭਰ ਵਿੱਚ 2 ਫੀ ਸਦੀ ਅੰਕਾਂ ਦਾ ਫਾਇਦਾ ਹੋਇਆ ਹੈ ਤੇ ਪਾਰਟੀ ਨੂੰ 20 ਫੀ ਸਦੀ ਸਮਰਥਨ ਹਾਸਲ ਹੋ ਰਿਹਾ ਹੈ ਜਦਕਿ ਪੀਪਲਜ਼ ਪਾਰਟੀ ਨੂੰ ਵੀ ਛੇ ਅੰਕ ਵੱਧ ਹਾਸਲ ਹੋਣ ਨਾਲ ਇਸ ਸਮੇਂ ਪਾਰਟੀ ਪ੍ਰੋਵਿੰਸ਼ੀਅਲ ਪੱਧਰ ਉੱਤੇ ਸੱਤ ਫੀ ਸਦੀ ਸਮਰਥਨ ਹਾਸਲ ਕਰ ਚੁੱਕੀ ਹੈ। ·
ਦੇਸ਼ ਭਰ ਵਿੱਚ ਲਿਬਰਲਾਂ ਤੇ ਕੰਜ਼ਰਵੇਟਿਵਾਂ ਦਰਮਿਆਨ ਤਕੜਾ ਮੁਕਾਬਲਾ ਚੱਲ ਰਿਹਾ ਹੈ। ਇਸ ਸਮੇਂ ਕੌਮੀ ਪੱਧਰ ਉੱਤੇ ਕੰਜ਼ਰਵੇਟਿਵਾਂ ਨੂੰ 31·2 ਫੀ ਸਦੀ ਜਦਕਿ ਲਿਬਰਲਾਂ ਨੂੰ 30·5 ਫੀ ਸਦੀ ਲੋਕਾਂ ਦਾ ਸਮਰਥਨ ਹਾਸਲ ਹੋ ਰਿਹਾ ਹੈ। ਐਨਡੀਪੀ ਨੂੰ 21·4 ਫੀ ਸਦੀ ਜਦਕਿ ਬਲਾਕ ਕਿਊਬਿਕੁਆ ਤੇ ਪੀਪਲਜ਼ ਪਾਰਟੀ ਨੂੰ ਛੇ ਫੀ ਸਦੀ ਦੇ ਨੇੜੇ ਤੇੜੇ ਸਮਰਥਨ ਹਾਸਲ ਹੋ ਰਿਹਾ ਹੈ, ਗ੍ਰੀਨਜ਼ ਪਾਰਟੀ ਨੂੰ 3·7 ਫੀ ਸਦੀ ਸਮਰਥਨ ਮਿਲ ਰਿਹਾ ਹੈ।