ਫਗਵਾੜਾ, 31 ਮਾਰਚ (ਪੋਸਟ ਬਿਊਰੋ)- ਦੋਸਤਾਂ ਨਾਲ ਹੋਲੀ ਖੇਡਣ ਲਈ ਮੋਹਾਲੀ ਤੋਂ ਫਗਵਾੜਾ ਦੇ ਚਹੇੜੂ ਵਿਚਲੇ ਪੀ ਜੀ ਵਿੱਚ ਆਏ ਇੱਕ ਵਿਦਿਆਰਥੀ ਦਾ ਚਾਕੂ ਮਾਰ ਕੇ ਕਤਲ ਕਰ ਦਿੱਤੇ ਜਾਣ ਦੀ ਖਬਰ ਹੈ। ਮ੍ਰਿਤਕ ਦੀ ਪਛਾਣ ਆਸਤ ਅੰਸਾਰੀ (32) ਪੁੱਤਰ ਨਸੀਰ ਅੰਸਾਰੀ ਵਾਸੀ ਸਿਸਟਮ ਨਗਰ ਸਿੱਕਮ ਵਜੋਂ ਹੋਈ ਹੈ।
ਥਾਣਾ ਸਤਨਾਮਪੁਰਾ ਦੀ ਚਹੇੜੂ ਪੁਲਸ ਚੌਕੀ ਦੇ ਇੰਚਾਰਜ ਦਰਸ਼ਨ ਸਿੰਘ ਦੇ ਮੁਤਾਬਕ ਮ੍ਰਿਤਕ ਆਸਤ ਅੰਸਾਰੀ ਮੋਹਾਲੀ ਦੇ ਅਭੀਪੁਰ ਕਾਲਜ ਵਿੱਚ ਆਟੋਮੋਬਾਈਲ ਦਾ ਡਿਪਲੋਮਾ ਕਰ ਰਿਹਾ ਸੀ ਅਤੇ ਉਥੇ ਆਪਣੇ ਦੋਸਤ ਮੁਹੰਮਦ ਨਾਲ ਰਹਿੰਦਾ ਸੀ। ਉਨ੍ਹਾਂ ਦਾ ਇੱਕ ਦੋਸਤ ਸ਼ਸਾਂਕ ਫਗਵਾੜੇ ਦੇ ਚਹੇੜੂ ਨੇੜੇ ਲਾਅ ਗੇਟ ਨੇੜੇ ਪੀ ਜੀ ਵਿੱਚ ਰਹਿੰਦਾ ਸੀ। ਅੰਸਾਰੀ ਆਪਣੇ ਦੋਸਤ ਮੁਹੰਮਦ ਨਾਲ ਸ਼ਨੀਵਾਰ ਨੂੰ ਮੋਹਾਲੀ ਤੋਂ ਫਗਵਾੜਾ ਵਿੱਚ ਸਸ਼ਾਂਕ ਕੋਲ ਹੋਲੀ ਖੇਡਣ ਆਇਆ ਸੀ।ਪੁਲਸ ਦੇ ਮੁਤਾਬਕ ਸਸ਼ਾਂਕ ਦਾ ਟਿ੍ਰਪਲ ਐਕਸਲ ਕੈਫੇ ਹੈ ਅਤੇ ਇੱਥੇ ਰੰਜਨ ਕੁਮਾਰ ਨਾਂਅ ਦਾ ਨੌਜਵਾਨ ਸ਼ੈਫ ਦਾ ਕੰਮ ਕਰਦਾ ਸੀ। ਹੋਲੀ ਵਾਲੇ ਦਿਨ ਮੋਬਾਈਲ ਫੜਨ ਤੋਂ ਆਸਤ ਅੰਸਾਰੀ ਤੇ ਸ਼ੈਫ ਰੰਜਨ ਕੁਮਾਰ ਦਾ ਝਗੜਾ ਹੋ ਗਿਆ ਤਾਂ ਰੰਜਨ ਨੇ ਆਸਤ ਅੰਸਾਰੀ ਦੇ ਢਿੱਡ ਵਿੱਚ ਚਾਕੂ ਮਾਰ ਦਿੱਤਾ। ਆਸਤ ਨੂੰ ਜ਼ਖਮੀ ਹਾਲਤ ਵਿੱਚ ਸਿਵਲ ਹਸਪਤਾਲ ਲਿਆਂਦਾ ਗਿਆ, ਜਿੱਥੋਂ ਉਸ ਨੂੰ ਜਲੰਧਰ ਦੇ ਨਿੱਜੀ ਹਸਪਤਾਲ ਲਈ ਰੈਫਰ ਕਰ ਦਿੱਤਾ ਗਿਆ, ਪਰ ਇਲਾਜ ਦੌਰਾਨ ਉਸ ਦੀ ਮੌਤ ਹੋ ਗਈ।