Welcome to Canadian Punjabi Post
Follow us on

07

October 2022
ਬ੍ਰੈਕਿੰਗ ਖ਼ਬਰਾਂ :
ਲਾਸ ਵੇਗਸ ਵਿੱਚ ਵਾਪਰੀ ਛੁਰੇਬਾਜ਼ੀ ਦੀ ਘਟਨਾ ਵਿੱਚ 2 ਹਲਾਕ, 6 ਜ਼ਖ਼ਮੀਅਮਰੀਕਾ 'ਚ ਭਾਰਤੀ ਮੂਲ ਦੇ ਵਿਦਿਆਰਥੀ ਦਾ ਕਤਲ, ਕੋਰੀਆਈ ਰੂਮਮੇਟ ਹਿਰਾਸਤ 'ਚਇਤਿਹਾਸਕ ਮਸਜਿਦ 'ਚ ਜ਼ਬਰਦਸਤੀ ਦਾਖਲ ਹੋ ਕੇ ਕੀਤੀ ਪੂਜਾ਼, 9 ਲੋਕਾਂ 'ਤੇ ਮਾਮਲਾ ਦਰਜਚਾਈਲਡਕੇਅਰ ਸੈਂਟਰ ਵਿੱਚ ਦਾਖਲ ਹੋ ਕੇ ਗੰਨਮੈਨ ਨੇ ਚਲਾਈਆਂ ਗੋਲੀਆਂ, 24 ਬੱਚੇ, 11 ਬਾਲਗ ਹਲਾਕਕਰਨਜੀਤ ਕੌਰ ਬੈਂਸ ਨੇ ਇੱਕ ਮਿੰਟ ਵਿੱਚ ਸਭ ਤੋਂ ਵੱਧ ਬਾਡੀ ਵੇਟ ਸਕੁਐਟਸ ਕਰਕੇ ਵਿਸ਼ਵ ਰਿਕਾਰਡ ਬਣਾਇਆਪੰਜਾਬ ਨੇ ਪਹਿਲੀ ਵਾਰ 6 ਮਹੀਨਿਆਂ ਵਿੱਚ 10 ਹਜ਼ਾਰ ਕਰੋੜ ਜੀ.ਐਸ.ਟੀ. ਦਾ ਅੰਕੜਾ ਪਾਰ ਕੀਤਾ : ਚੀਮਾਆਪਣੀਆਂ ਮੰਗਾਂ ਮਨਾਉਣ ਲਈ ਅੱਧੀ ਰਾਤ ਨੂੰ ਪਾਣੀ ਵਾਲੀ ਟੈਂਕੀ `ਤੇ ਚੜ੍ਹੇ ਬੇਰੁਜ਼ਾਗਰ ਅਧਿਆਪਕਪਾਕਿਸਤਾਨ 'ਚ ਘਟੀਆ ਹਰਕਤ, ਗੁਰਦੁਆਰੇ 'ਚ ਜੁੱਤੀਆਂ ਪਾ ਕੇ ਫਿਲਮੀ ਕਲਾਕਾਰਾਂ ਨੇ ਕੀਤੀ ਸ਼ੂਟਿੰਗ, ਮਚਿਆ ਹੰਗਾਮਾ
ਸੰਪਾਦਕੀ

ਚੀਨੀ ਪੁਲੀਸ ਦਾ ਇੰਮੀਗਰੇਸ਼ਨ ਦਸਤਾਵੇਜ਼ਾਂ ਤੱਕ ਪੁੱਜਦਾ ਹੱਥ

February 26, 2021 04:17 PM

ਪੰਜਾਬੀ ਪੋਸਟ ਸੰਪਾਦਕੀ

ਬੇਸ਼ੱਕ ਜਿ਼ਆਦਾਤਰ ਕੈਨੇਡੀਅਨਾਂ ਲਈ ਇਹ ਗੱਲ ਹੈਰਾਨੀ ਭਰੀ ਹੋ ਸਕਦੀ ਹੈ ਪਰ ਸਾਡੀ ਫੈਡਰਲ ਸਰਕਾਰ ਨੂੰ ਇਸ ਸੋਮਵਾਰ ਤੱਕ ਇਸ ਗੱਲ ਦੀ ਭਿਣਕ ਤੱਕ ਨਹੀਂ ਸੀ ਕਿ ਚੀਨ ਦੀ ਰਾਜਧਾਨੀ ਬੀਜਿੰਗ ਵਿੱਚ ਕੈਨੇਡੀਅਨ ਵੀਜ਼ਾ ਅਰਜ਼ੀਆਂ ਨੂੰ ਪ੍ਰਾਸੈਸ ਕਰਨ ਕਰਨ ਵਾਲੀ ਕੰਪਨੀ ਦੀ ਅਸਲੀ ਮਾਲਕ ਬੀਜਿੰਗ ਪੁਲੀਸ ਦੀ ਮਲਕੀਅਤ ਵਾਲੀ ਇੱਕ ਕੰਪਨੀ ਹੈ। ਇਹ ਭੇਦ ਉਸ ਵੇਲੇ ਉਜਾਗਰ ਹੋਇਆ ਜਦੋਂ ਇਸ ਹਫ਼ਤੇ ਪਾਰਲੀਮੈਂਟ ਦੀ ਸਿਟੀਜ਼ਨਸਿ਼ੱਪ ਅਤੇ ਇੰਮੀਗਰੇਸ਼ਨ ਕਮੇਟੀ ਸਾਹਮਣੇ ਪੇਸ਼ ਹੋਏ VFS Global ਦੀ ਕੈਨੇਡੀਅਨ ਬਰਾਂਚ ਦੇ ਚੀਫ ਅਪਰੇਟਿੰਗ ਅਫ਼ਸਰ ਜਿਤੇਨ ਵਿਆਸ ਨੇ ਇਸ ਹਕੀਕਤ ਨੂੰ ਕਬੂਲ ਕੀਤਾ। ਕੰਪਨੀ ਮੁਤਾਬਕ VFS Global ਵੱਲੋਂ ਕਿਸੇ ਸਥਾਨਕ ਕੰਪਨੀ ਦੀ ਭਾਈਵਾਲੀ ਨਾਲ ਕੰਮ ਕਰਨਾ ਚੀਨ ਦੇ ਕਾਨੂੰਨ ਮੁਤਾਬਕ ਲਾਜ਼ਮੀ ਹੈ। ਦੂਜੇ ਪਾਸੇ ਕੈਨੇਡਾ ਦੀਆਂ ਸੇਵਾਵਾਂ ਅਤੇ ਖਰੀਦਦਾਰੀ ਲਈ ਜੁੰਮੇਵਾਰ ਮਹਿਕਮੇ Public Services and Procurement Canada ਦੇ ਬੁਲਾਰੇ ਅਨੁਸਾਰ ਕੈਨੇਡੀਅਨ ਅਧਿਕਾਰੀਆਂ ਨੂੰ VFS Global ਦੀ ਚੀਨ ਵਿੱਚ ਕਾਰਪੋਰੇਟ ਬਣਤਰ ਅਤੇ ਇਸਦੇ ਬੀਜਿੰਗ ਪਬਲਿਕ ਸਿਕਿਉਰਿਟੀ ਬਿਊਰੋ ਨਾਲ ਕਿਸੇ ਕਿਸਮ ਦੇ ਸਬੰਧਾਂ ਬਾਰੇ ਕੋਈ ਅਤਾ ਪਤਾ ਨਹੀਂ ਸੀ।

VFS Global ਹੈ ਕਿਸ ਬਲਾ ਦਾ ਨਾਮ? VFS Global ਦਾ ਦਾਅਵਾ ਹੈ ਕਿ ਉਹ ਵਿਸ਼ਵ ਭਰ ਵਿੱਚ ਸਰਕਾਰਾਂ ਅਤੇ ਡਿਪਲੋਮੈਟਿਕ ਮਿਸ਼ਨਾਂ ਨੂੰ ਵੀਜ਼ਾ ਸੇਵਾਵਾਂ ਅਤੇ ਤਕਨਾਲੋਜੀ ਪ੍ਰਦਾਨ ਕਰਨ ਵਾਲੀ ਸੱਭ ਤੋਂ ਵੱਡੀ ਕੰਪਨੀ ਹੈ। ਇਸ ਕੰਪਨੀ ਦੇ ਵਿਸ਼ਵ ਦੇ ਵੱਖ 2 ਹਿੱਸਿਆਂ ਵਿੱਚ 143 ਦੇਸ਼ਾਂ ਵਿੱਚ 3490 ਅਰਜ਼ੀ ਕੇਂਦਰ ਹਨ। ਇਸਦੇ ਕਾਰਜ ਖੇਤਰ ਦਾ ਇਸ ਗੱਲ ਤੋਂ ਅੰਦਾਜ਼ਾ ਲਾਇਆ ਜਾ ਸਕਦਾ ਹੈ ਕਿ 2001 ਤੋਂ ਆਰੰਭ ਕਰਕੇ ਇਸਨੇ 22 ਕਰੋੜ 70 ਲੱਖ ਵੀਜ਼ਾ, ਪਾਸਪੋਰਟ ਅਰਜ਼ੀਆਂ ਅਤੇ 9 ਕਰੋੜ 92 ਲੱਖ ਲੋਕਾਂ ਦੇ ਹੱਥਾਂ ਦੇ ਨਿਸ਼ਾਨ ਪ੍ਰਾਪਤ ਕੀਤੇ ਹਨ। ਇੰਗਲੈਂਡ ਦੇ ਪ੍ਰਸਿੱਧ ਅਖ਼ਬਾਰ ਇੰਡੀਪੈਂਡੈਂਟ ਅਤੇ ਜਾਂਚ ਆਧਾਰਿਤ ਪਤੱਰਕਾਰੀ ਦੇ ਮੋਹਰੀ ਅਦਾਰੇ Finance Uncovered ਵੱਲੋਂ ਬੀਤੇ ਦਿਨੀਂ ਸਨਸਨੀਖੇਜ ਖੁਲਾਸੇ ਕੀਤੇ ਗਏ। ਇਹਨਾਂ ਮੁਤਾਬਕ VFS Global ਨੂੰ 2001 ਵਿੱਚ ਸਵਿਟਜ਼ਰਲੈਂਡ ਦੇ ਇੱਕ ਲਗਜ਼ਰੀ ਟਰੈਵਲ ਗਰੁੱਪ Kuoni ਨੇ ਆਪਣੀ ਬਰਾਂਚ ਵਜੋਂ ਸਥਾਪਿਤ ਕੀਤਾ ਸੀ। ਅਗਲੇ 20 ਸਾਲਾਂ ਵਿੱਚ ਇਹ ਕੰਪਨੀ ਭੇਦਭਰੇ ਢੰਗ ਨਾਲ ਢਾਈ ਬਿਲੀਅਨ ਅਮਰੀਕਰਨ ਡਾਲਰ ਦੀ ਕੰਪਨੀ ਬਣ ਚੁੱਕੀ ਹੈ। ਸ਼ੁਰੂਆਤ ਵਿੱਚ ਇਸਦਾ ਹੈੱਡਕੁਆਰਟਰ ਭਾਰਤ ਵਿੱਚ ਹੁੰਦਾ ਸੀ ਜੋ ਅੱਜ ਕੱਲ ਦੁਬਈ ਵਿੱਚ ਚਲਾ ਗਿਆ ਹੈ ਪਰ ਇਸਦੇ ਹੈਡਕੁਆਰਟਰ ਦੀਆਂ ਜੜਾਂ ਸਵਟਿਜ਼ਰਲੈਂਡ ਵਿੱਚ ਵੀ ਹਨ। VFS Global ਦੀ ਪੇਰੈਂਟ ਕੰਪਨੀ VF Worldwide Holdings ਹੈ ਜਿਸਦਾ ਪਹਿਲਾਂ ਹੈਡਕੁਆਰਟਰ ਮਾਰੀਸ਼ੀਸ਼ਸ ਵਿੱਚ ਹੁੰਦਾ ਸੀ ਜਿਸਨੂੰ ਵਿਸ਼ਵ ਭਰ ਵਿੱਚ ਟੈਕਸ ਬਚਾਉਣ ਦੇ ਸਵਰਗ (tax haven ਵਜੋਂ ਜਾਣਿਆ ਜਾਂਦਾ ਹੈ।

ਕੈਨੇਡੀਅਨ ਪਾਰਲੀਮੈਂਟ ਦੀ ਸਿਟੀਜ਼ਨਸਿ਼ੱਪ ਅਤੇ ਇੰਮੀਗਰੇਸ਼ਨ ਕਮੈਟੀ ਵਿੱਚ ਐਨ ਡੀ ਪੀ ਦੀ ਇੰਮੀਗਰੇਸ਼ਨ ਆਲੋਚਕ ਜੈਨੀ ਕਵਾਨ ਅਤੇ ਕੰਜ਼ਰਵੇਟਿਵ ਆਲੋਚਕ ਜਸਰਾਜ ਸਿੰਘ ਹੱਲਣ ਨੇ VFS ਅਧਿਕਾਰੀਆਂ ਕੋਲੋਂ ਵਾਰ 2 ਪੁੱਛਣਾ ਚਾਹਿਆ ਕਿ ਉਹਨਾਂ ਨੇ ਫੈਡਰਲ ਸਰਕਾਰ ਨੂੰ ਕੰਪਨੀ ਦੇ ਚੀਨੀ ਪੁਲੀਸ ਨਾਲ ਸਬੰਧਾਂ ਬਾਰੇ ਕਦੋਂ ਜਾਣਕਾਰੀ ਦਿੱਤੀ। ਕੰਪਨੀ ਅਧਿਕਾਰੀ ਅਜਿਹੇ ਨਿਕਲੇ ਕਿ ਉਹ ਕੋਈ ਸਿੱਧਾ ਜਵਾਬ ਦੇਣ ਦੀ ਥਾਂ ਵਾਰ ਵਾਰ ਸਿਰਫ਼ ਇਹ ਆਖਦੇ ਰਹੇ ਕਿ ਸਾਡੇ ਕੋਲ ਆਈ ਹਰ ਕਿਸਮ ਦੀ ਜਾਣਕਾਰੀ ਨੂੰ ਗੁਪਤ ਢੰਗ ਨਾਲ ਰੱਖਿਆ ਜਾਂਦਾ ਹੈ। ਵਰਨਣਯੋਗ ਹੈ ਕਿ 2009 ਤੋਂ 2019 ਦਰਮਿਆਨ ਕੈਨੇਡਾ ਸਰਕਾਰ ਨੇ VFS Globalਨੂੰ ਵੀਜ਼ਾ ਅਰਜ਼ੀਆਂ ਅਤੇ ਬਾਇਓਮੈਟਰਿਕਸ (ਹੱਥਾਂ ਅੱਖਾਂ ਦੇ ਨਿਸ਼ਾਨ) ਦੀਆਂ ਸੇਵਾਵਾਂ ਦੇਣ ਲਈ 18 ਕਰੋੜ 32 ਲੱਖ ਤੋਂ ਵੱਧ ($183,204,308) ਡਾਲਰ ਦਾ ਬਿਜਸਨ ਦਿੱਤਾ ਹੈ ਜੋ 200 ਮਿਲੀਅਨ ਡਾਲਰ ਦੇ ਕਰੀਬ ਬਣਦਾ ਹੈ।

ਸੁਆਲ ਕੰਪਨੀ ਦੇ ਚੀਨ ਵਿੱਚ ਪੁਲੀਸ ਨਾਲ ਸਬੰਧਾਂ ਤੱਕ ਸੀਮਤ ਨਹੀਂ ਸਗੋਂ ਕੈਨੇਡੀਅਨ ਸਿਸਟਮ ਦੀ ਪੁਖਤਗੀ ਅਤੇ ਭਰੋਸੇਯੋਗਤਾ ਦਾ ਹੈ। ਸੁਰੱਖਿਆ ਮਾਹਰਾਂ ਮੁਤਾਬਕ VFS ਦੀ ਭਰੋਸੇਯੋਗਤਾ ਬਾਰੇ ਉੱਠਦੇ ਸ਼ੰਕੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੀ ਸਰਕਾਰ ਲਈ ਚਿੰਤਾ ਦਾ ਵਿਸ਼ਾ ਹੋਣੇ ਚਾਹੀਦੇ ਹਨ। The Canadian Security Intelligence Service (CSIS) ਦੇ ਸਾਬਕਾ ਡਾਇਰੈਕਟਰ ਵਾਰਡ ਈਲੌਕ ਦਾ ਬੀਤੇ ਦਿਨੀਂ ਆਇਆ ਬਿਆਨ ਗੌਰ ਮੰਗਦਾ ਹੈ। ਉਸਨੇ ਕਿਹਾ ਹੈ ਕਿ ਫੈਡਰਲ ਸਰਕਾਰ ਤੋਂ ਫੰਡ ਪ੍ਰਾਪਤ ਕਰਨ ਵਾਲੀ ਇਸ ਕੰਪਨੀ ਦੇ ਹੋਰ ਮੁਲਕਾਂ ਵਿੱਚ ਕੰਮਕਾਜ ਦੀ ਵਿਧੀ ਦਾ ਗਹੁ ਨਾਲ ਮੁਲਾਂਕਣ ਕੀਤਾ ਜਾਣਾ ਚਾਹੀਦਾ ਹੈ। ਪ੍ਰਸਿੱਧ ਇੰਮੀਗਰੇਸ਼ਨ ਵਕੀਲ ਰਿਚਰਡ ਕੁਰਲੈਂਡ ਨੇ ਵੀ ਇਸ ਕੰਪਨੀ ਬਾਰੇ ਖਦਸ਼ਾ ਜਾਹਰ ਕੀਤਾ ਹੈ। ਉਸ ਅਨੁਸਾਰ ਜੇ ਕਿਸੇ ਕੈਨੇਡੀਅਨ ਨੇ VFS ਵਿਰੁੱਧ ਸਿ਼ਕਾਇਤ ਕਰਨੀ ਹੋਵੇ ਤਾਂ ਉਸਦੀ ਚਾਰਾਜੋਈ ਦਾ ਰੱਬ ਹੀ ਰਾਖਾ ਹੈ । ਕੁਰਲੈਂਡ ਨੂੰ ਡਰ ਹੈ ਕਿ ਬੇਸ਼ੱਕ ਸਰਕਾਰ ਦਾ VFS Global ਨਾਲ ਇਕਰਾਰਨਾਮਾ ਕੈਨੇਡਾ ਵਿੱਚ ਹੋਇਆ ਹੈ ਪਰ ਜਿਸ ਕੰਪਨੀ ਦੀਆਂ ਬਰਾਂਚਾ ਅਣਗਿਣਤ ਮੁਲਕਾਂ ਵਿੱਚ ਹਨ ਅਤੇ ਹੈਡਕੁਆਰਟਰ ਸਵਟਿਜ਼ਰਲੈਂਡ, ਦੁਬਈ ਆਦਿ ਵਿੱਚ ਖਿੱਲਰਿਆ ਹੋਇਆ ਹੈ, ਉਸਦਾ ਕੈਨੇਡੀਅਨ ਕਾਨੂੰਨ ਮੁਤਾਬਕ ਪਿੱਛਾ ਕਿਵੇਂ ਕੀਤਾ ਜਾ ਸਕੇਗਾ? ਚੰਗੀ ਗੱਲ ਹੈ ਕਿ ਮੀਡੀਆ ਵਿੱਚ ਉੱਠੇ ਤੁਫ਼ਾਨ ਤੋਂ ਬਾਅਦ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਇੰਮੀਗੇਰਸ਼ਨ ਮੰਤਰੀ ਨੂੰ ਕੈਨੇਡਾ ਵੀਜ਼ਾ ਅਰਜ਼ੀ ਸਿਸਟਮ ਨੂੰ ਸੁਧਾਰਨ ਦਾ ਸੁਝਾਅ ਦਿੱਤਾ ਹੈ ਪਰ ਲੋੜ ਸੁਝਾਵਾਂ ਤੋਂ ਅੱਗੇ ਵੱਧ ਕੇ ਕੁੱਝ ਠੋਸ ਕੀਤੇ ਜਾਣ ਦੀ ਹੈ।

 

Have something to say? Post your comment