ਲੁਧਿਆਣਾ, 17 ਜਨਵਰੀ (ਪੋਸਟ ਬਿਊਰੋ)- ਦੁਕਾਨਦਾਰ ਉੱਤੇ ਨਸ਼ੇ ਦਾ ਝੂਠਾ ਕੇਸਪਾਉਣ ਦੀ ਧਮਕੀ ਨਾਲ ਰਿਸ਼ਵਤ ਲੈਣ ਦੇ ਦੋਸ਼ ਵਿੱਚ ਥਾਣਾ ਬਸਤੀ ਜੋਧੇਵਾਲ ਪੁਲਸ ਨੇ ਸਲੇਮ ਟਾਬਰੀ ਥਾਣੇ ਦੇ ਏ ਐਸ ਆਈ ਉੱਤੇਕੇਸ ਦਰਜ ਕਰ ਕੇ ਉਸ ਨੂੰ ਗ੍ਰਿਫਤਾਰ ਕਰ ਲਿਆ ਹੈ। ਦੋਸ਼ੀ ਦੀ ਪਛਾਣ ਏ ਐਸ ਆਈ ਸੁਰਿੰਦਰ ਕੁਮਾਰ ਵਜੋਂ ਹੋਈ ਹੈ।
ਇਸ ਬਾਰੇ ਦੁਕਾਨਦਾਰ ਗੌਰਵ ਦੱਤ ਨੇ ਪੁਲਸ ਨੂੰ ਦੱਸਿਆ ਕਿ ਉਹ ਪਾਰਸ ਮੈਡੀਕੇਅਰ ਨਾਂਅ ਦੇ ਮੈਡੀਕਲ ਸਟੋਰ ਉੱਤੇ ਨੌਕਰੀ ਕਰਦਾ ਹੈ। ਬੀਤੀ 14 ਜਨਵਰੀ ਦੀ ਦੁਪਹਿਰ ਉਹ ਦੁਕਾਨ ਉੱਤੇ ਇਕੱਲਾ ਸੀ। ਇਸ ਦੌਰਾਨ ਦੋਸ਼ੀ ਥਾਣੇਦਾਰ ਦੁਕਾਨ ਉੱਤੇ ਆਇਆ ਤੇ ਕਿਹਾ ਕਿ ਤੁਸੀਂ ਨਸ਼ੇ ਦੀਆਂ ਦਵਾਈਆਂ ਵੇਚਣ ਦਾ ਧੰਦਾ ਕਰਦੇ ਹੋ। ਗੌਰਵ ਨੇ ਕਿਹਾ ਕਿ ਉਹ ਦੁਕਾਨ ਉੱਤੇ ਇਹੋ ਜਿਹੀ ਕੋਈ ਦਵਾਈ ਨਹੀਂ ਰੱਖਦੇ। ਦੋਸ਼ੀ ਏ ਐਸ ਆਈ ਬੋਲਿਆ ਕਿ ਉਸ ਨੂੰ ਪੰਜਾਹ ਹਜ਼ਾਰ ਰੁਪਏ ਦੇਵੇ, ਨਹੀਂ ਤਾਂ ਦੁਕਾਨ ਉੱਤੇ ਨਸ਼ੇ ਦਵਾਈ ਰਖਵਾ ਕੇ ਕੇਸ ਦਰਜ ਕਰ ਦੇਵੇਗਾ। ਇਸ ਦੌਰਾਨ ਡਰਾ-ਧਮਕਾ ਕੇ ਉਹ ਉਸ ਕੋਲੋਂ ਉਸ ਦਿਨ 22 ਹਜ਼ਾਰ ਰੁਪਏ ਲੈ ਗਿਆ ਅਤੇ ਕਿਹਾ ਕਿ ਬਾਕੀ ਪੈਸੇ ਬਾਅਦ ਵਿੱਚ ਲੈ ਜਾਏਗਾ। ਗੌਰਵ ਨੇ ਆਪਣੇ ਮਾਲਕ ਗਗਨਦੀਪ ਨੂੰ ਦੱਸਿਆ, ਜਿਨ੍ਹਾਂ ਨੇ ਉਚ ਅਧਿਕਾਰੀਆਂ ਨੂੰ ਇਸ ਦੀ ਸੂਚਨਾ ਦਿੱਤੀ। ਉਨ੍ਹਾਂ ਮਿਲ ਕੇ ਦੋਸ਼ੀ ਦਾ ਟ੍ਰੈਪ ਲਵਾਇਆ ਅਤੇ ਇਸੇ ਦੌਰਾਨ ਉਸ ਨੂੰ ਪੰਜ ਹਜ਼ਾਰ ਰੁਪਏ ਦੇਣ ਲਈ ਬੁਲਾ ਲਿਆ ਅਤੇ ਰੰਗੇ ਹੱਥੀਂ ਕਾਬੂ ਕਰ ਲਿਆ।