ਸਾਲ 2003 ਵਿੱਚ ਰਿਲੀਜ਼ ਹੋਈ ‘ਮੁੰਨਾਭਾਈ ਐੱਮ ਬੀ ਬੀ ਐੱਸ’ ਬੋਮਨ ਇਰਾਨੀ ਦੇ ਕਰੀਅਰ ਲਈ ਸਭ ਤੋਂ ਅਹਿਮ ਫਿਲਮ ਸਾਬਿਤ ਹੋਈ। ਖਾਸ ਗੱਲ ਇਹ ਹੈ ਕਿ ਵਿਧੂ ਵਿਨੋਦ ਚੋਪੜਾ ਨੇ ਉਨ੍ਹਾਂ ਨੂੰ ਇਸ ਫਿਲਮ ਲਈ ਸਾਈਨਿੰਗ ਅਮਾਊਂਟ ਅੱਠ ਮਹੀਨੇ ਪਹਿਲਾਂ ਦੇ ਦਿੱਤਾ ਸੀ। ਬੋਮਨ ਦੱਸਦੇ ਹਨ, ‘‘ਵਿਧੂ ਨੇ ਮੇਰੀ ਫਿਲਮ ‘ਲੇਟਸ ਸਟਾਪ’ ਦੇਖੀ ਸੀ। ਇਸ ਦੇ ਬਾਅਦ ਉਨ੍ਹਾਂ ਨੇ ਮੈਨੂੰ ‘ਮੁੰਨਾਭਾਈ ਐੱਮ ਬੀ ਬੀ ਐੱਸ’ ਲਈ ਸਾਈਨਿੰਗ ਅਮਾਊਂਟ ਦੇ ਦਿੱਤਾ ਸੀ। ਤਦ ਇਹ ਵੀ ਤੈਅ ਨਹੀਂ ਸੀ ਕਿ ਇਸ ਨਾਂਅ ਨਾਲ ਕੋਈ ਫਿਲਮ ਬਣਨੀ ਹੈ। ਅੱਠ ਮਹੀਨੇ ਬਾਅਦ ਮੈਨੂੰ ਫੋਨ ਆਇਆ ਕਿ ‘ਮੁੰਨਾਭਾਈ ਐੱਮ ਬੀ ਬੀ ਐੱਸ’ ਬਣਾ ਰਿਹਾ ਹਾਂ। ਫਿਲਮ ਦਾ ਨਾਂਅ ਸੁਣ ਕੇ ਮੈਨੂੰ ਲੱਗਾ ਕਿ ਇਹ ਕੋਈ ਨਾਂਅ ਹੈ। ਮੈਂ ਫਿਲਮ ਦੇ ਬਾਰੇ ਹੋਰ ਜਾਣਕਾਰੀ ਮੰਗੀ ਤਾਂ ਉਨ੍ਹਾਂ ਨੇ ਰਾਜਕੁਮਾਰ ਹਿਰਾਨੀ ਨੂੰ ਮਿਲਣ ਲਈ ਕਿਹਾ। ਮੈਨੂੰ ਜਦ ਉਨ੍ਹਾਂ ਨੇ ਕਹਾਣੀ ਸੁਣਾਈ ਤਾਂ ਮੈਂ ਤੈਅ ਕਰ ਲਿਆ ਕਿ ਇਹ ਫਿਲਮ ਕਰਨੀ ਹੈ।”
‘ਮੁੰਨਾਭਾਈ ਐਮ ਬੀ ਬੀ ਐਸ' ਵਿੱਚ ਆਪਣੇ ਲੁਕ ਦੇ ਬਾਰੇ ਬੋਮਨ ਦੱਸਦੇ ਹਨ, ‘‘ਫਿਲਮ ਵਿੱਚ ਮੇਰੇ ਕਿਰਦਾਰ ਡਾਕਟਰ ਅਸਥਾਨਾ ਲਈ ਕਈ ਟੈਸਟ ਕੀਤੇ ਗਏ, ਪਰ ਸਭ ਬੇਕਾਰ ਸਨ। ਮੈਂ ਰਾਜੂ ਯਾਨੀ ਰਾਜਕੁਮਾਰ ਹਿਰਾਨੀ ਨੂੰ ਕਿਹਾ ਕਿ ਤੂੰ ਦਫਤਰ ਜਾ, ਮੈਂ ਲੁਕ ਬਾਰੇ ਸੋਚ ਕੇ ਫੋਨ ਕਰਦਾ ਹਾਂ। ਮੈਂ ਆਪਣੇ ਵਾਲ ਕਟਵਾ ਦਿੱਤੇ। ਇੱਕ ਮੇਕਅਪ ਆਰਟਿਸਟ ਤੋਂ ਤਿਆਰ ਹੋਇਆ ਅਤੇ ਸੂਟ ਪਹਿਨ ਕੇ ਰਾਜੂ ਦੇ ਦਫਤਰ ਪਹੁੰਚ ਗਿਆ। ਮੈਂ ਉਨ੍ਹਾਂ ਦੀ ਕਾਰ ਦੇ ਸਾਹਮਣੇ ਖੜ੍ਹਾ ਸੀ ਤਾਂ ਉਨ੍ਹਾਂ ਨੇ ਇਸ਼ਾਰੇ ਨਾਲ ਮੈਨੂੰ ਸਾਈਡ ਦੇਣ ਲਈ ਕਿਹਾ। ਜਦ ਉਹ ਦਫਤਰ ਵੱਲ ਵਧੇ ਤਾਂ ਮੈਂ ਉਨ੍ਹਾਂ ਦੇ ਪਿੱਛੇ ਜਾਣ ਲੱਗਾ। ਉਹ ਮੈਨੂੰ ਪਛਾਣ ਨਹੀਂ ਸਕੇ, ਜਦ ਮੈਂ ਉਨ੍ਹਾਂ ਨੂੰ ਦੱਸਿਆ ਕਿ ਇਹ ਡਾਕਟਰ ਅਸਥਾਨਾ ਦਾ ਲੁਕ ਹੈ ਤਾਂ ਉਹ ਲੁਕ ਉਨ੍ਹਾਂ ਨੂੰ ਬੇਹੱਦ ਪਸੰਦ ਆਇਆ। ‘ਮੁੰਨਾਭਾਈ ਐੱਮ ਬੀ ਬੀ ਐੱਸ’ ਇੱਕ ਬਹੁਤ ਹੀ ਸਾਧਾਰਨ ਫਿਲਮ ਸੀ। ਜਾਦੂ ਦੀ ਝੱਪੀ ਵਿੱਚ ਭਾਰਤੀ ਸੰਸਕ੍ਰਿਤੀ ਦੀ ਝਲਕ ਦਿਸਦੀ ਸੀ।”