ਟੋਰਾਂਟੋ, 30 ਜੂਨ (ਪੋਸਟ ਬਿਊਰੋ) : ਡਾਊਨਟਾਊਨ ਵਿੱਚ ਤੁਰੇ ਜਾਂਦੇ ਇੱਕ 19 ਸਾਲਾ ਲੜਕੇ ਨੂੰ ਕੱੁਝ ਵਿਅਕਤੀਆਂ ਨੇ ਲੁੱਟ ਲਿਆ ਤੇ ਉਸ ਉੱਤੇ ਪੇਚਕਸ ਨਾਲ ਕਈ ਵਾਰ ਵੀ ਕੀਤੇ ਗਏ। ਇਹ ਜਾਣਕਾਰੀ ਪੁਲਿਸ ਨੇ ਦਿੱਤੀ।
ਪੁਲਿਸ ਨੇ ਦੱਸਿਆ ਕਿ ਇਹ ਲੜਕਾ ਮੰਗਲਵਾਰ ਨੂੰ ਰਾਤੀਂ 12:25 ਉਤੇ ਜੌਹਨ ਸਟਰੀਟ ਨੇੜੇ ਫਰੰਟ ਸਟਰੀਟ ਉੱਤੇ ਤੁਰਿਆ ਜਾ ਰਿਹਾ ਸੀ ਜਦੋਂ ਪੰਜ ਵਿਅਕਤੀਆਂ ਨੇ ਉਸ ਉੱਤੇ ਹਮਲਾ ਕਰ ਦਿੱਤਾ ਤੇ ਉਸ ਨੂੰ ਲੁੱਟ ਲਿਆ। ਹਮਲੇ ਦੌਰਾਨ ਇਸ ਲੜਕੇ ਦੇ ਸ਼ਰੀਰ ਦੇ ਉੱਪਰਲੇ ਹਿੱਸੇ ਉੱਤੇ ਪੇਚਕਸ ਨਾਲ ਕਈ ਵਾਰ ਕੀਤੇ ਗਏ। ਉਸ ਨੂੰ ਗੰਭੀਰ ਜ਼ਖ਼ਮੀ ਹਾਲਤ ਵਿੱਚ ਹਸਪਤਾਲ ਲਿਜਾਇਆ ਗਿਆ।
ਪੁਲਿਸ ਵੱਲੋਂ ਇਸ ਲੁੱਟਮਾਰ ਵਿੱਚ ਸ਼ਾਮਲ ਪੰਜ ਮਸ਼ਕੂਕਾਂ ਦਾ ਵੇਰਵਾ ਵੀ ਜਾਰੀ ਕੀਤਾ ਗਿਆ ਹੈ:
· ਇਕ ਮਸ਼ਕੂਕ ਜੋ ਕਿ ਸਿਆਹ ਨਸਲ ਦਾ ਸੀ, ਛੇ ਫੱੁਟ ਤੋਂ ਘੱਟ ਸੀ ਤੇ ਉਸ ਨੇ ਕਾਲੇ ਰੰਗ ਦੀ ਲੰਮੀਆਂ ਬਾਹਾਂ ਵਾਲੀ ਸ਼ਰਟ, ਖਾਖੀ ਪੈਂਟ ਤੇ ਚਿੱਟੇ ਰੰਗ ਦਾ ਸਰਜੀਕਲ ਮਾਸਕ ਪਾਇਆ ਹੋਇਆ ਸੀ।
· ਦੂਜਾ ਮਸ਼ਕੂਕ ਛੇ ਫੁੱਟ ਤੋਂ ਨਿੱਕਾ, ਗੋਰਾ ਵਿਅਕਤੀ ਸੀ ਜਿਸ ਨੇ ਲੰਮੀਆਂ ਬਾਹਾਂ ਵਾਲੀ ਹੁਡੀ ਵਾਲੀ ਸ਼ਰਟ, ਗੂੜ੍ਹੇ ਰੰਗ ਦੀਆਂ ਸ਼ੌਰਟਸ, ਪੁੱਠੀ ਬਾਲ ਕੈਪ ਪਾਈ ਹੋਈ ਸੀ ਤੇ ਉਸ ਨੇ ਕਾਲੇ ਰੰਗ ਦਾ ਏਅਰ ਜੌਰਡਨ ਦਾ ਬੈਗ ਗਲ ਵਿੱਚ ਪਾਇਆ ਹੋਇਆ ਸੀ ਤੇ ਚਿੱਟੇ ਰੰਗ ਦੇ ਸਨੀਕਰਜ ਤੇ ਕਾਲੀਆਂ ਜੁਰਾਬਾਂ ਪਾਈਆਂ ਹੋਈਆਂ ਸਨ।
· ਤੀਜਾ ਵਿਅਕਤੀ ਵੀ ਛੇ ਫੁੱਟ ਤੋਂ ਘੱਟ ਗੋਰਾ ਵਿਅਕਤੀ ਸੀ, ਉਸ ਨੇ ਸੋਨੇ ਦੀ ਚੇਨ, ਕਾਲੀ ਟੀ-ਸ਼ਰਟ, ਕਾਲੀ ਕੈਪ ਟੇਢੀ,ਕਾਲੀ ਪੈਂਟ ਪਾਈ ਹੋਈ ਸੀ, ਉਸ ਕੋਲ ਰੰਗਦਾਰ ਬੈਗ ਸੀ।
· ਚੌਥਾ ਮਸ਼ਕੂਕ ਲੱਗਭਗ ਛੇ ਫੁੱਟ ਦਾ ਸੀ, ਉਹ ਸਿਆਹ ਨਸਲ ਦਾ ਵਿਅਕਤੀ ਸੀ, ਉਸ ਦੇ ਵਾਲ ਕਾਲੇ ਸਨ, ਉਸ ਨੇ ਚਿੱਟੀ ਟੀ-ਸ਼ਰਟ ਪਾਈ ਸੀ ਜਿਸ ਉੱਤੇ ਗੂੜ੍ਹੇ ਰੰਗ ਦੀ ਮਾਰਕਿੰਗ ਸੀ ਤੇ ਨੀਲੇ ਰੰਗ ਦੀ ਜੀਨਜ਼ ਨਾਲ ਹਲਕੇ ਸਨੀਕਰਜ਼ ਪਾਏ ਹੋਏ ਸਨ।
· ਪੰਜਵਾਂ ਵਿਅਕਤੀ, ਜੋ ਕਿ ਗੋਰਾ ਸੀ, ਛੇ ਫੱੁਟ ਦੇ ਲੱਗਭਗ ਸੀ, ਉਸ ਦੇ ਵਾਲ ਭੂਰੇ ਸਨ, ਉਸ ਨੇ ਚਿੱਟੀ ਟੀ-ਸ਼ਰਟ, ਨੀਲੇ ਰੰਗ ਦੀ ਜੀਨਜ਼-ਜੋ ਕਿ ਸੱਜੇ ਗੋਡੇ ਤੋਂ ਰਿੱਪਡ ਸੀ, ਗੂੜ੍ਹੇ ਰੰਗ ਦੇ ਸਨੀਕਰਜ਼ ਤੇ ਗੂੜ੍ਹੇ ਰੰਗ ਦਾ ਬੈਗ ਗਲ ਵਿੱਚ ਪਾਇਆ ਹੋਇਆ ਸੀ।