ਓਟਵਾ, 2 ਅਪਰੈਲ (ਪੋਸਟ ਬਿਊਰੋ) : ਕੋਵਿਡ 19 ਮਹਾਮਾਰੀ ਕਾਰਨ ਵਿਦੇਸ਼ਾਂ ਵਿੱਚ ਫਸੇ ਕੈਨੇਡੀਅਨਾਂ ਨੂੰ ਦੇਸ਼ ਵਾਪਿਸ ਲਿਆਉਣ ਲਈ ਸਰਕਾਰ ਪੂਰਾ ਜ਼ੋਰ ਲਾ ਰਹੀ ਹੈ। ਪਰ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਚੇਤਾਵਨੀ ਦਿੱਤੀ ਕਿ ਉਹ ਪੂਰੇ ਦੇਸ਼ ਲਈ ਖਤਰਾ ਹੋ ਸਕਦੇ ਹਨ।
ਵੀਰਵਾਰ ਨੂੰ ਆਪਣੀ ਰਿਹਾਇਸ਼ਗਾਹ ਦੇ ਬਾਹਰੋਂ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਟਰੂਡੋ ਨੇ ਆਖਿਆ ਕਿ ਅਸੀਂ ਬਾਹਰੋਂ ਆਉਣ ਵਾਲੇ ਸਾਰੇ ਲੋਕਾਂ ਲਈ ਇਹ ਯਕੀਨੀ ਬਣਾਵਾਂਗੇ ਕਿ ਉਹ ਚੰਗੀ ਤਰ੍ਹਾਂ ਆਈਸੋਲੇਟ ਹੋਣ। ਪਿਛਲੇ ਦੋ ਕੁ ਹਫਤਿਆਂ ਵਿੱਚ ਕਈ ਕੈਨੇਡੀਅਨ ਵਿਦੇਸ਼ਾਂ ਤੋਂ ਦੇਸ਼ ਪਰਤੇ ਹਨ ਤੇ ਅਜੇ ਕੁੱਝ ਹੋਰ ਵਾਪਿਸ ਆਉਣੇ ਬਾਕੀ ਹਨ। ਵਿਦੇਸ਼ ਮੰਤਰੀ ਫਰੈਂਕੌਇਸ ਫਿਲਿਪ ਸੈ਼ਂਪੇਨ ਨੇ ਇੱਕ ਵੱਖਰੀ ਪ੍ਰੈੱਸ ਕਾਨਫਰੰਸ ਵਿੱਚ ਦੱਸਿਆ ਕਿ ਅੰਦਾਜ਼ਨ 30 ਦੇਸ਼ਾਂ ਤੋਂ 40 ਉਡਾਨਾਂ ੳੱੁਤੇ ਹਜ਼ਾਰਾਂ ਦੀ ਗਿਣਤੀ ਵਿੱਚ ਕੈਨੇਡੀਅਨ ਵਾਪਿਸ ਆ ਚੁੱਕੇ ਹਨ।
ਆਉਣ ਵਾਲੇ ਦਿਨਾਂ ਵਿੱਚ ਕੱੁਝ ਹੋਰ ਉਡਾਨਾ ਰਾਹੀਂ ਕੈਨੇਡੀਅਨਾਂ ਨੂੰ ਪੇਰੂ, ਕੋਲੰਬੀਆ, ਭਾਰਤ, ਪਾਕਿਸਤਾਨ, ਪੋਲੈਂਡ, ਕਿਊਬਾ, ਤ੍ਰਿਨੀਦਾਦ ਤੇ ਟੋਬੈਗੋ ਦੇ ਨਾਲ ਨਾਲ ਵੱਖ ਵੱਖ ਅਫਰੀਕੀ ਦੇਸ਼ਾਂ ਤੋਂ ਕੈਨੇਡਾ ਵਾਪਿਸ ਲਿਆਂਦਾ ਜਾਵੇਗਾ। ਇਨ੍ਹਾਂ ਕੈਨੇਡੀਅਨਾਂ ਨੂੰ 14 ਦਿਨਾਂ ਲਈ ਸੈਲਫ ਆਈਸੋਲੇਸ਼ਨ ਵਿੱਚ ਰਹਿਣਾ ਹੋਵੇਗਾ। ਉਨ੍ਹਾਂ ਨੂੰ ਏਅਰਪੋਰਟ ਤੋਂ ਸਿੱਧਾ ਆਪਣੇ ਘਰਾਂ ਨੂੰ ਜਾਣਾ ਹੋਵੇਗਾ। ਨਾ ਉਹ ਗਰੌਸਰੀ ਦੀ ਸ਼ਾਪਿੰਗ ਲਈ, ਨਾ ਹੀ ਫਾਰਮੇਸੀ ਜਾਂ ਹੋਰਨਾਂ ਜਨਤਕ ਥਾਂਵਾਂ ਉੱਤੇ ਕਿਤੇ ਰੁਕ ਸਕਣਗੇ।
ਜਦੋਂ ਆਊਟਬ੍ਰੇਕ ਪਹਿਲਾਂ ਹੋਈ ਤਾਂ ਟਰੈਵਲ ਹੀ ਵਾਇਰਸ ਦੇ ਫੈਲਣ ਦਾ ਸੱਭ ਤੋਂ ਵੱਡਾ ਸਰੋਤ ਸੀ। ਇੱਕ ਹਫਤੇ ਪਹਿਲਾਂ ਹੀ ਕਮਿਊਨਿਟੀ ਸਪਰੈੱਡ ਵਿੱਚ ਵਾਧਾ ਹੋਇਆ ਹੈ। ਕੈਨੇਡਾ ਦੇ ਚੀਫ ਪਬਲਿਕ ਹੈਲਥ ਅਧਿਕਾਰੀਆਂ ਡਾ. ਥਰੇਸਾ ਟੈਮ ਨੇ ਉਸ ਸਮੇਂ ਆਖਿਆ ਸੀ ਕਿ ਹੁਣ ਇਹ ਵਾਇਰਸ ਕੈਨੇਡਾ ਦੇ ਅੰਦਰ ਹੀ ਫੈਲਣਾ ਸੁ਼ਰੂ ਹੋ ਚੱੁਕਿਆ ਹੈ। ਪਰ ਟਰੂਡੋ ਨੂੰ ਡਰ ਹੈ ਕਿ ਅਜੇ ਵੀ ਵਿਦੇਸ਼ਾਂ ਤੋਂ ਪਰਤਣ ਵਾਲਿਆਂ ਰਾਹੀਂ ਇਹ ਵਾਇਰਸ ਫੈਲਣ ਦਾ ਡਰ ਜਿ਼ਆਦਾ ਹੈ।