ਲੰਡਨ, 5 ਦਸੰਬਰ (ਪੋਸਟ ਬਿਊਰੋ)- ਇੰਟਰਨੈੱਟ ਉੱਤੇ ਮਹਾਰਾਣੀ ਐਲਿਜ਼ਾਬੇਥ ਦਾ ਇਕ ਵੀਡੀਓ ਵਾਇਰਲ ਹੋ ਰਿਹਾ ਹੈ। ਇਸ ਵੀਡੀਓ ਵਿਚ ਉਨ੍ਹਾਂ ਨਾਲ ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਅਤੇ ਉਨ੍ਹਾਂ ਦੀ ਪਤਨੀ ਮੇਲਾਨੀਆ ਟਰੰਪ ਨਜ਼ਰ ਆ ਰਹੀ ਹੈ। ਵੀਡੀਓ ਵਿਚ ਨਜ਼ਰ ਆ ਰਿਹਾ ਹੈ ਕਿ ਬ੍ਰਿਟੇਨ ਦੀ ਰਾਜਕੁਮਾਰੀ ਐਨੀ, ਰਾਸ਼ਟਰਪਤੀ ਡੋਨਾਲਡ ਟਰੰਪ ਦਾ ਠੀਕ ਤਰ੍ਹਾਂ ਸਵਾਗਤ ਨਹੀਂ ਕਰ ਸਕੀ। ਸਾਹਮਣੇ ਆਈ ਵੀਡੀਓ ਬਕਿੰਘਮ ਪੈਲੇਸ ਦੀ ਹੈ।
ਮਹਾਰਾਣੀ ਐਲੀਜ਼ਾਬੈਥ ਨੇ ਮੰਗਲਵਾਰ ਨਾਟੋ ਲੀਡਰਾਂ ਲਈ ਰਿਸੈਪਸ਼ਨ ਦਾ ਪ੍ਰਬੰਧ ਕੀਤਾ ਸੀ। ਫੁਟੇਜ ਵਿੱਚ ਸਾਫ ਦਿੱਸਦਾ ਹੈ ਕਿ ਇਸ ਗੱਲ ਬਾਰੇ ਮਹਾਰਾਣੀ ਤੇ ਉਸ ਦੀ ਇਕਲੌਤੀ ਬੇਟੀ ਰਾਜਕੁਮਾਰੀ ਐਨੀ ਦੇ ਵਿਚਾਲੇ ਹਲਕੀ-ਫੁਲਕੀ ਨੋਕ-ਝੋਕ ਹੋ ਰਹੀ ਹੈ। ਡੇਲੀ ਮੇਲ ਦੇ ਮੁਤਾਬਕ ਵੀਡੀਓ ਵਿਚ ਮਹਾਰਾਣੀ ਆਪਣੇ ਬੇਟੇ ਪ੍ਰਿੰਸ ਚਾਰਲਸ ਤੇ ਉਸ ਦੀ ਪਤਨੀ ਕੈਮਿਲਾ, ਜਿਸ ਨੂੰ ਡੱਚਿਜ਼ ਆਫ ਕਾਰਨਵਾਲ ਕਹਿੰਦੇ ਹਨ, ਨਾਲ ਡੋਨਾਲਡ ਟਰੰਪ ਅਤੇ ਮੇਲਾਨੀਆ ਦਾ ਸਵਾਗਤ ਕਰ ਰਹੀ ਹੈ। ਸ਼ਾਹੀ ਪਰਿਵਾਰ ਦੇ ਲੋਕ ਜਿਥੇ ਟਰੰਪ ਤੇ ਉਨ੍ਹਾਂ ਦੀ ਪਤਨੀ ਨਾਲ ਹੱਥ ਮਿਲਾਉਂਦੇ ਹਨ, ਉਥੇ ਰਾਜਕੁਮਾਰੀ ਐਨੀ ਪੈਲੇਸ ਦੇ ਸਟੇਟ ਰੂਮਸ ਵਿਚ ਜਾਣ ਲਈ ਦਰਵਾਜ਼ੇ ਕੋਲ ਖੜੀ ਇੰਤਜ਼ਾਰ ਕਰ ਰਹੀ ਹੈ।
ਟਰੰਪ ਜੋੜੇ ਦਾ ਸਵਾਗਤ ਕਰਨ ਤੋਂ ਬਾਅਦ ਮਹਾਰਾਣੀ ਆਪਣੀ ਬੇਟੀ ਵੱਲ ਦੇਖਦੀ ਹੈ ਤੇ ਜੋੜੇ ਦਾ ਸਵਾਗਤ ਕਰਨ ਲਈ ਕਹਿੰਦੀ ਹੈ ਤੇ 69 ਸਾਲਾ ਰਾਜਕੁਮਾਰੀ ਆਪਣੀ ਮਾਂ ਨੂੰ ਕੁਝ ਕਹਿੰਦੀ ਹੈ। ਇਹ ਸਾਫ ਨਹੀਂ ਹੁੰਦਾ ਕਿ ਰਾਜਕੁਮਾਰੀ ਨੇ ਕੀ ਕਿਹਾ, ਪਰ ਗੱਲਬਾਤ ਨੋਕ-ਝੋਕ ਵਾਲੀ ਲੱਗਦੀ ਹੈ। ਇਸ ਵੀਡੀਓ ਵਿਚ ਬ੍ਰਿਟੇਨ, ਕੈਨੇਡਾ, ਫਰਾਂਸ ਅਤੇ ਨੀਦਰਲੈਂਡ ਦੇ ਨੇਤਾ ਟਰੰਪ ਦਾ ਮਜ਼ਾਕ ਉਡਾਉਂਦੇ ਹੋਏ ਵੀ ਨਜ਼ਰ ਆ ਰਹੇ ਹਨ।