ਫਰੀਦਕੋਟ, 20 ਮਈ (ਪੋਸਟ ਬਿਊਰੋ)- ਸੀ ਆਈ ਏ ਸਟਾਫ ਫਰੀਦਕੋਟ ਦੇ ਇੰਚਾਰਜ ਇੰਸਪੈਕਟਰ ਨਰਿੰਦਰ ਸਿੰਘ ਨੇ ਕੱਲ੍ਹ ਸ਼ਾਮ ਆਪਣੇ ਦਫਤਰ ਪਹੁੰਚ ਕੇ ਆਪਣੀ ਅਸਾਲਟ ਰਾਈਫਲ ਨੂੰ ਠੋਡੀ ਦੇ ਨਾਲ ਲਾ ਕੇ ਫਾਇਰ ਕਰਦੇ ਹੋਏ ਆਪਣੀ ਜਾਨ ਦੇ ਦਿੱਤੀ, ਪਰ ਇਸ ਦਾ ਕਾਰਨ ਪਤਾ ਨਹੀਂ ਲੱਗ ਸਕਿਆ।
ਲੋਕ ਸਭਾ ਚੋਣਾਂ ਕਾਰਨ ਕੱਲ੍ਹ ਉਨ੍ਹਾਂ ਦੀ ਡਿਊਟੀ ਪੈਟਰੋਲਿੰਗ ਪਾਰਟੀ ਵਿੱਚ ਸੀ। ਸ਼ਾਮ ਕਰੀਬ ਪੰਜ ਵਜੇ ਡਿਊਟੀ ਵਿਚਾਲੇ ਛੱਡ ਕੇ ਉਹ ਬੱਸ ਸਟੈਂਡ ਨਾਲ ਲੱਗਦੇ ਸੀ ਆਈ ਏ ਸਟਾਫ ਪਹੁੰਚੇ ਅਤੇ ਇਹ ਕਦਮ ਚੁੱਕਿਆ ਅਤੇ ਉਨ੍ਹਾਂ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ। ਮ੍ਰਿਤਕ ਇੰਸਪੈਕਟਰ ਜ਼ੀਰਾ (ਫਿਰੋਜ਼ਪੁਰ) ਦੇ ਪਿੰਡ ਮਰਸਈ ਦੇ ਰਹਿਣ ਵਾਲੇ ਸੀ। ਪਰਵਾਰ ਵਿੱਚ ਪਤਨੀ ਸਮੇਤ ਇਕ ਬੇਟਾ ਤੇ ਇਕ ਬੇਟੀ ਹੈ। ਬੇਟੀ ਕੈਨੇਡਾ ਵਿੱਚ ਹੈ, ਜਦ ਕਿ ਬੇਟਾ 12ਵੀਂ ਦਾ ਵਿਦਿਆਰਥੀ ਹੈ।
ਪੁਲਸ ਦੇ ਅਨੁਸਾਰ ਇੰਸਪੈਕਟਰ ਨਰਿੰਦਰ ਸਿੰਘ, ਪਿਛਲੇ ਲੰਮੇ ਸਮੇਂ ਤੋਂ ਫਰੀਦਕੋਟ ਤੇ ਮੁਕਤਸਰ ਜ਼ਿਲਿਆਂ ਦੇ ਵੱਖ-ਵੱਖ ਥਾਣਿਆਂ ਵਿੱਚ ਇੰਚਾਰਜ ਅਤੇ ਇੰਚਾਰਜ ਸੀ ਆਈ ਏ ਸੇਵਾਵਾਂ ਨਿਭਾ ਰਹੇ ਸਨ। ਫਰੀਦਕੋਟ ਦੇ ਸੀ ਆਈ ਏ ਸਟਾਫ ਵਿੱਚ ਇੰਚਾਰਜ ਇੰਸਪੈਕਟਰ ਨਰਿੰਦਰ ਸਿੰਘ ਨੂੰ ਲੋਕ ਸਭਾ ਚੋਣਾਂ ਲਈ ਮੁੱਖ ਪੈਟਰੋਲਿੰਗ ਪਾਰਟੀ ਦਾ ਇੰਚਾਰਜ ਬਣਾਇਆ ਗਿਆ ਸੀ, ਜਿਸ ਨੂੰ ਜ਼ਿਲੇ ਵਿੱਚ ਕਿਤੇ ਵੀ ਹਿੰਸਾ ਹੋਣ ਉੱਤੇ ਤੁਰੰਤ ਕਾਰਵਾਈ ਕਰਨ ਦੀ ਜ਼ਿੰਮੇਵਾਰੀ ਸੌਂਪੀ ਗਈ ਸੀ। ਸ਼ਾਮ ਨੂੰ ਇੰਸਪੈਕਟਰ ਨਰਿੰਦਰ ਸਿੰਘ ਅਚਾਨਕ ਡਿਊਟੀ ਛੱਡ ਕੇ ਦਫਤਰ ਪਹੁੰਚੇ ਅਤੇ ਦਫਤਰ ਵਿੱਚ ਰੱਖੀ ਆਪਣੀ ਅਸਾਲਟ ਨਾਲ ਗੋਲੀ ਮਾਰ ਕੇ ਜਾਨ ਦੇ ਦਿੱਤੀ। ਐਸ ਐਸ ਪੀ ਰਾਜਬਚਨ ਸਿੰਘ ਨੇ ਕਿਹਾ ਕਿ ਇੰਸਪੈਕਟਰ ਦੇ ਖੁਦਕੁਸ਼ੀ ਕਰਨ ਦੇ ਕਾਰਨਾਂ ਦਾ ਅਜੇ ਤੱਕ ਕੁਝ ਪਤਾ ਨਹੀਂ ਲੱਗ ਸਕਿਆ ਹੈ ਅਤੇ ਪੁਲਸ ਵੱਲੋਂ ਮ੍ਰਿਤਕ ਅਧਿਕਾਰੀ ਦੇ ਫੋਨ ਕਾਲ ਡਿਟੇਲ ਨੂੰ ਖੰਗਾਲਿਆ ਜਾ ਰਿਹਾ ਹੈ।