ਓਟਵਾ, 12 ਸਤੰਬਰ (ਪੋਸਟ ਬਿਊਰੋ) : ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਜਹਾਜ਼ ਵਿੱਚ ਆਏ ਮੇਨਟੇਨੈਂਸ ਦੇ ਮੁੱਦੇ ਦੇ ਠੀਕ ਹੋਣ ਤੋਂ ਬਾਅਦ ਆਖਿਰਕਾਰ ਕੈਨੇਡਾ ਲਈ ਰਵਾਨਾ ਹੋ ਗਏ ਹਨ। ਜਹਾਜ਼ ਵਿੱਚ ਗੜਬੜੀ ਹੋਣ ਕਾਰਨ ਟਰੂਡੋ ਦੋ ਦਿਨ ਲਈ ਭਾਰਤ ਹੀ ਫਸੇ ਰਹੇ।
ਇੱਕ ਹਫਤੇ ਪਹਿਲਾਂ ਟਰੂਡੋ ਨੇ ਇਹ ਦੌਰਾ ਸ਼ੁਰੂ ਕੀਤਾ ਸੀ। ਆਸੀਆਨ ਸਿਖਰ ਵਾਰਤਾ ਵਿੱਚ ਹਿੱਸਾ ਲੈਣ ਲਈ ਟਰੂਡੋ ਜਕਾਰਤਾ ਗਏ ਸਨ ਜਿੱਥੇ ਉਨ੍ਹਾਂ ਸਿੰਗਾਪੁਰ ਜਾਣ ਤੋਂ ਪਹਿਲਾਂ ਉਨ੍ਹਾਂ ਸਾਊਥਈਸਟ ਏਸ਼ੀਅਨ ਆਗੂਆਂ ਨਾਲ ਟਰੇਡ ਵਾਰਤਾ ਕੀਤੀ। ਪਿਛਲੇ ਸੁ਼ੱਕਰਵਾਰ ਟਰੂਡੋ ਜੀ-20 ਸਿਖਰ ਵਾਰਤਾ ਵਿੱਚ ਹਿੱਸਾ ਲੈਣ ਲਈ ਨਵੀਂ ਦਿੱਲੀ ਪਹੁ਼ੰਚੇ ਸਨ। ਟਰੂਡੋ ਦਾ ਜਹਾਜ਼ ਐਤਵਾਰ ਨੂੰ ਓਟਵਾ ਰਵਾਨਾ ਹੋਣਾ ਸੀ। ਪਰ ਜਹਾਜ਼ ਵਿੱਚ ਗੜਬੜੀ ਹੋਣ ਕਾਰਨ ਇਹ ਉਡਾਨ ਹੀ ਨਹੀਂ ਭਰ ਸਕਿਆ।
ਫਿਰ ਟਰੂਡੋ ਨੂੰ ਕੈਨੇਡਾ ਲਿਆਉਣ ਦੀਆਂ ਤਿਆਰੀਆਂ ਹੋਣ ਲੱਗੀਆਂ। ਰੌਇਲ ਕੈਨੇਡੀਅਨ ਏਅਰ ਫੋਰਸ ਨੇ ਭਾਰਤ ਤੋਂ ਟਰੂਡੋ ਤੇ ਉਨ੍ਹਾਂ ਦੇ ਵਫਦ ਨੂੰ ਐਤਵਾਰ ਨੂੰ ਕੈਨੇਡਾ ਲਿਆਉਣ ਲਈ ਸੀਸੀ-150 ਪੋਲਾਰਿਸ ਭੇਜਿਆ। ਇਸ ਦੌਰਾਨ ਇੱਕ ਤਕਨੀਸ਼ੀਅਨ ਜਹਾਜ਼ ਦਾ ਵਿਗੜਿਆ ਹੋਇਆ ਹਿੱਸਾ ਲੈ ਕੇ ਕਮਰਸ਼ੀਅਲ ਫਲਾਈਟ ਰਾਹੀਂ ਨਵੀਂ ਦਿੱਲੀ ਪਹੁੰਚਿਆ। ਫਿਰ ਜਹਾਜ਼ ਦੀ ਗੜਬੜੀ ਦੂਰ ਹੋ ਗਈ ਤੇ ਉਸ ਨੂੰ ਉੱਡਣ ਦੀ ਇਜਾਜ਼ਤ ਦੇ ਦਿੱਤੀ ਗਈ। ਸਕਿਊਰਿਟੀ ਕਾਰਨਾਂ ਕਰਕੇ ਪ੍ਰਧਾਨ ਮੰਤਰੀ ਕਮਰਸ਼ੀਅਲ ਜਹਾਜ਼ ਰਾਹੀਂ ਸਫਰ ਨਹੀਂ ਕਰਦੇ।