ਓਟਵਾ, 22 ਮਈ (ਪੋਸਟ ਬਿਊਰੋ) : ਵੈਸਟਜੈੱਟ ਤੇ ਪਾਇਲਟਸ ਦੀ ਨੁਮਾਇੰਦਗੀ ਕਰਨ ਵਾਲੀ ਯੂਨੀਅਨ ਦਰਮਿਆਨ ਹੋਏ ਸਮਝੌਤੇ ਨਾਲ ਬਜਟ ਏਅਰਲਾਈਨ ਸਵੂਪ ਦਾ ਖ਼ਾਤਮਾ ਹੋ ਜਾਵੇਗਾ।
ਕਈ ਸਰੋਤਾਂ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਏਅਰਲਾਈਨ ਤੇ ਏਅਰ ਲਾਈਨ ਪਾਇਲਟਸ ਐਸੋਸਿਏਸ਼ਨ (ਐਲਪਾ) ਦਰਮਿਆਨ ਹੋਏ ਸਮਝੌਤੇ ਦੀ ਇੱਕ ਸ਼ਰਤ ਇਹ ਵੀ ਸੀ ਕਿ ਅਕਤੂਬਰ 2024 ਤੱਕ ਸਵੂਪ ਨੂੰ ਪੂਰੀ ਤਰ੍ਹਾਂ ਵੈਸਟਜੈੱਟ ਵਿੱਚ ਰਲਾ ਦਿੱਤਾ ਜਾਵੇਗਾ।ਇੱਕ ਬਿਆਨ ਵਿੱਚ ਵੈਸਟਜੈੱਟ ਨੇ ਆਖਿਆ ਕਿ ਅਜੇ ਇਸ ਸਮਝੌਤੇ ਦੀ ਪੁਸ਼ਟੀ ਨਹੀਂ ਕੀਤੀ ਗਈ ਹੈ ਇਸ ਲਈ ਫਾਈਨਲ ਸ਼ਰਤਾਂ ਬਾਰੇ ਵਿਚਾਰ ਵਟਾਂਦਰਾ ਨਹੀਂ ਕੀਤਾ ਜਾ ਸਕਦਾ।
ਜਿ਼ਕਰਯੋਗ ਹੈ ਕਿ ਵੀਕੈਂਡ ਉੱਤੇ ਪੂਰੀ ਤਰ੍ਹਾਂ ਕੰਮਕਾਜ ਠੱਪ ਹੋਣ ਤੋਂ ਬਚਣ ਲਈ ਵੈਸਟਜੈੱਟ ਨੇ ਇਸ ਡੀਲ ਦਾ ਐਲਾਨ ਕੀਤਾ। ਅੱਠ ਮਹੀਨੇ ਤੱਕ ਚੱਲੀ ਗੱਲਬਾਤ ਤੋਂ ਬਾਅਦ ਇਹ ਸਮਝੌਤਾ ਸਿਰੇ ਚੜ੍ਹਿਆ। ਕੈਲਗਰੀ ਸਥਿਤ ਏਅਰਲਾਈਨ ਵੈਸਟਜੈੱਟ ਦੀ ਸਬਸਿਡਰੀ ਸਵੂਪ 2018 ਤੋਂ ਕੰਮ ਕਰ ਰਹੀ ਹੈ ਤੇ ਇਹ 32 ਥਾਂਵਾਂ ਲਈ ਉਡਾਨ ਭਰਦੀ ਹੈ। ਇਸ ਸਮੇਂ ਸਵੂਪ ਦੇ ਬੈਨਰ ਹੇਠ ਕੰਮ ਕਰਨ ਵਾਲੇ ਪਾਇਲਟਸ ਨੂੰ ਘੱਟ ਤਨਖਾਹ ਮਿਲਦੀ ਹੈ।