ਓਟਵਾ, 9 ਮਾਰਚ (ਪੋਸਟ ਬਿਊਰੋ) : ਵਿਦੇਸ਼ੀ ਦਖ਼ਲ ਦੇ ਮਾਮਲੇ ਦੀ ਸੁਣਵਾਈ ਦੌਰਾਨ ਵਿਦੇਸ਼ ਮੰਤਰੀ ਮਿਲੇਨੀ ਜੋਲੀ ਉੱਤੇ ਕੰਜ਼ਰਵੇਟਿਵ ਐਮਪੀ ਵੱਲੋਂ ਕੀਤੀਆਂ ਟਿੱਪਣੀਆਂ ਉੱਤੇ ਲਿਬਰਲ ਤੇ ਐਨਡੀਪੀ ਐਮਪੀਜ਼ ਵੱਲੋਂ ਸਖ਼ਤ ਇਤਰਾਜ਼ ਪ੍ਰਗਟਾਇਆ ਗਿਆ ਹੈ। ਇਨ੍ਹਾਂ ਐਮਪੀਜ਼ ਦਾ ਕਹਿਣਾ ਹੈ ਕਿ ਕੰਜ਼ਰਵੇਟਿਵ ਐਮਪੀ ਮਾਈਕਲ ਕੂਪਰ ਵੱਲੋਂ ਜੋਲੀ ਖਿਲਾਫ ਕੀਤੀ ਗਈ ਟਿੱਪਣੀ ਬੇਹੱਦ ਸ਼ਰਮਨਾਕ ਹੈ ਤੇ ਇਸ ਨੂੰ ਸਵੀਕਾਰਿਆ ਨਹੀਂ ਜਾ ਸਕਦਾ।
ਵੀਰਵਾਰ ਨੂੰ ਪ੍ਰੋਸੀਜ਼ਰ ਐਂਡ ਹਾਊਸ ਅਫੇਅਰਜ਼ ਕਮੇਟੀ (ਪੀਆਰਓਸੀ) ਦੀ ਹੋਈ ਮੀਟਿੰਗ ਦੌਰਾਨ ਕੂਪਰ ਨੇ ਜੋਲੀ ਨੂੰ ਮੁਖ਼ਾਤਬ ਹੁੰਦਿਆਂ ਆਖਿਆ ਕਿ ਤੁਸੀਂ ਆਪਣੇ ਬੀਜਿੰਗ ਦੇ ਹਮਰੁਤਬਾ ਅਧਿਕਾਰੀ ਨਾਲ ਕਾਫੀ ਸਖ਼ਤੀ ਨਾਲ ਪੇਸ਼ ਆਏ। ਇੱਥੋਂ ਤੱਕ ਕਿ ਤੁਸੀਂ ਉਸ ਦੀਆਂ ਅੱਖਾਂ ਵਿੱਚ ਅੱਖਾਂ ਪਾ ਕੇ ਵੇਖਿਆ ਤੇ ਯਕੀਨਨ ਉਹ ਡਰ ਵੀ ਗਿਆ ਹੋਵੇਗਾ। ਇੱਥੇ ਦੱਸਣਾ ਬਣਦਾ ਹੈ ਕਿ ਕਮੇਟੀ ਦੀ ਗੁਜ਼ਾਰਿਸ਼ ਉੱਤੇ ਜੋਲੀ ਤੇ ਇੰਟਰਗਵਰਮੈਂਟਲ ਅਫੇਅਰਜ਼ ਮਨਿਸਟਰ ਡੌਮੀਨਿਕ ਲੀਬਲੈਂਕ ਗਵਾਹੀ ਦੇਣ ਲਈ ਪਹੁੰਚੇ ਸਨ।
ਇਸ ਦੌਰਾਨ ਜੋਲੀ ਨੇ ਦੱਸਿਆ ਕਿ ਉਸ ਨੇ ਆਪਣੇ ਚੀਨੀ ਹਮਰੁਤਬਾ ਅਧਿਕਾਰੀ ਕਿਨ ਗੈਂਗ ਨਾਲ ਗੱਲਬਾਤ ਦੌਰਾਨ ਇਹ ਸਪਸ਼ਟ ਕੀਤਾ ਕਿ ਅਸੀਂ ਆਪਣੀ ਜਮਹੂਰੀਅਤ ਤੇ ਅੰਦਰੂਨੀ ਮਾਮਲਿਆਂ ਵਿੱਚ ਕਿਸੇ ਤਰ੍ਹਾਂ ਦੀ ਵਿਦੇਸ਼ੀ ਦਖ਼ਲ ਨੂੰ ਬਰਦਾਸ਼ਤ ਨਹੀਂ ਕਰਾਂਗੇ ਤੇ ਦੂਜਾ ਅਸੀਂ ਆਪਣੀ ਖੁਦਮੁਖ਼ਤਿਆਰੀ ਵਿੱਚ ਕਿਸੇ ਤਰ੍ਹਾਂ ਦੀ ਸੰਨ੍ਹ ਨਹੀਂ ਜਰ ਸਕਦੇ। ਜੋਲੀ ਨੇ ਆਖਿਆ ਕਿ ਇਸ ਲਈ ਇਸ ਤਰ੍ਹਾਂ ਦੀ ਸਖ਼ਤ ਗੱਲਬਾਤ ਕਾਫੀ ਅਹਿਮ ਹੈ। ਸਾਨੂੰ ਇਸ ਤਰ੍ਹਾਂ ਕਰਨ ਨਾਲ ਕੋਈ ਖੁਸ਼ੀ ਨਹੀਂ ਮਿਲਦੀ ਪਰ ਕੈਨੇਡੀਅਨਜ਼ ਲਈ ਇਹ ਬਹੁਤ ਜ਼ਰੂਰੀ ਹੈ।
ਕੂਪਰ ਦੀ ਟਿੱਪਣੀ ਉੱਤੇ ਜੋਲੀ ਨੇ ਆਖਿਆ ਕਿ ਤੁਸੀਂ ਤਾਂ ਚੀਨ ਨੂੰ ਬਹੁਤ ਚੰਗੀ ਤਰ੍ਹਾਂ ਜਾਣਦੇ ਹੋਵੋਂਗੇ ਕਿਉਂਕਿ ਅਤੀਤ ਵਿੱਚ ਪਾਰਲੀਆਮੈਂਟੇਰੀਅਨ ਦੀ ਹੈਸੀਅਤ ਨਾਲ ਚੀਨ ਜਾ ਚੁੱਕੇ ਹੋਂ। ਇਸ ਲਈ ਤੁਸੀਂ ਇਹ ਸਮਝ ਸਕਦੇ ਹੋਂ ਕਿ ਜਦੋਂ ਅਸੀਂ ਵੰਡੀਆਂ ਵਿੱਚ ਪੈ ਜਾਂਦੇ ਹਾਂ ਤਾਂ ਚੀਨ ਵਰਗੇ ਦੇਸ਼ ਦੇ ਸਿ਼ਕੰਜੇ ਵਿੱਚ ਫਸ ਸਕਦੇ ਹਾਂ। ਕੂਪਰ ਵੱਲੋਂ ਜੋਲੀ ਤੋਂ ਕੁੱਝ ਮਿੰਟਾਂ ਲਈ ਪੁੱਛਗਿੱਛ ਕੀਤੀ ਜਾਂਦੀ ਰਹੀ ਪਰ ਬਾਅਦ ਵਿੱਚ ਲਿਬਰਲ ਤੇ ਐਨਡੀਪੀ ਦੇ ਐਮਪੀਜ਼ ਨੇ ਜੋਲੀ ਨਾਲ ਗਲਤ ਢੰਗ ਨਾਲ ਪੇਸ਼ ਆਉਣ ਉੱਤੇ ਕੂਪਰ ਨੂੰ ਮੰਤਰੀ ਤੋਂ ਮੁਆਫੀ ਮੰਗਣ ਲਈ ਆਖਿਆ।