ਓਟਵਾ, 8 ਮਾਰਚ (ਪੋਸਟ ਬਿਊਰੋ) : ਯੂਰਪੀਅਨ ਕਮਿਸ਼ਨ ਦੇ ਪ੍ਰੈਜ਼ੀਡੈਂਟ ਉਰਸੁਲਾ ਵੌਨ ਡੇਰ ਲੇਯੇਨ ਦੀ ਹਾਜ਼ਰੀ ਵਿੱਚ ਮੰਗਲਵਾਰ ਨੂੰ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਯੂਕਰੇਨ ਲਈ ਹੋਰ ਮਦਦ ਤੇ ਯੂਰਪ ਨਾਲ ਨਵਾਂ ਹਾਈਡਰੋਜਨ ਸਮਝੌਤਾ ਕਰਨ ਦਾ ਐਲਾਨ ਕੀਤਾ।
ਕੈਨੇਡਾ ਯੂਕਰੇਨ ਨੂੰ ਇੰਜੀਨੀਅਰਿੰਗ ਟਰੇਨਿੰਗ ਮੁਹੱਈਆ ਕਰਵਾਉਣ ਲਈ ਆਪਰੇਸ਼ਨ ਯੂਨੀਫੌਰ ਮਿਸ਼ਨ ਵਿੱਚ ਘੱਟੋ ਘੱਟ ਅਕਤੂਬਰ ਤੱਕ ਵਾਧਾ ਕਰੇਗਾ।ਇਸ ਤੋਂ ਇਲਾਵਾ ਕੈਨੇਡੀਅਨ ਮੈਡੀਕਲ ਟਰੇਨਰਜ਼ ਨੂੰ ਯੂਕਰੇਨੀਅਨ ਸੈਨਾਵਾਂ ਨੂੰ ਮੈਡੀਕਲ ਸਕਿੱਲਜ਼ ਸਿਖਾਉਣ ਵਿੱਚ ਮਦਦ ਲਈ ਵੀ ਭੇਜਿਆ ਜਾਵੇਗਾ। ਇਸ ਮੌਕੇ ਕਿੰਗਸਟਨ, ਓਨਟਾਰੀਓ ਵਿੱਚ ਟਰੂਡੋ ਨਾਲ ਇੱਕ ਸਾਂਝੀ ਪ੍ਰੈੱਸ ਕਾਨਫਰੰਸ ਦੌਰਾਨ ਵੌਨ ਡੇਰ ਲੇਯੇਨ ਨੇ ਆਖਿਆ ਕਿ ਕੈਨੇਡਾ ਹੋਰਨਾਂ ਦੇਸ਼ਾਂ ਦੇ ਮੁਕਾਬਲੇ ਪਹਿਲਾਂ ਹੀ ਯੂਕਰੇਨ ਲਈ ਕਾਫੀ ਕੁੱਝ ਕਰ ਰਿਹਾ ਹੈ ਤੇ ਇਸ ਵੱਲੋਂ ਆਪਣੇ ਵਿੱਤ ਤੋਂ ਬਾਹਰ ਹੋ ਕੇ ਯੂਕਰੇਨ ਦੀ ਮਦਦ ਕੀਤੀ ਜਾ ਰਹੀ ਹੈ। ਇਸ ਲਈ ਅਸੀਂ ਕੈਨੇਡਾ ਦਾ ਧੰਨਵਾਦ ਕਰਨਾ ਚਾਹੁੰਦੇ ਹਾਂ।
ਉਨ੍ਹਾਂ ਆਖਿਆ ਕਿ 2015 ਵਿੱਚ ਕੈਨੇਡਾ ਵੱਲੋਂ ਯੂਕਰੇਨ ਵਿੱਚ ਜਿਹੜਾ ਫੌਜੀ ਟਰੇਨਿੰਗ ਆਪਰੇਸ਼ਨ ਸ਼ੁਰੂ ਕੀਤਾ ਗਿਆ ਸੀ ਉਸ ਸਦਕਾ ਹੀ ਫਰਵਰੀ 2022 ਵਿੱਚ ਰੂਸ ਵੱਲੋਂ ਯੂਕਰੇਨ ਉੱਤੇ ਕੀਤੀ ਚੜ੍ਹਾਈ ਦੌਰਾਨ ਉੱਥੋਂ ਦੀਆਂ ਫੌਜੀ ਟੁਕੜੀਆਂ ਬਿਹਤਰ ਢੰਗ ਨਾਲ ਸਥਿਤੀ ਨਾਲ ਨਜਿੱਠ ਸਕੀਆਂ। ਟਰੂਡੋ ਨੇ ਐਲਾਨ ਕੀਤਾ ਕਿ ਓਟਵਾ ਲੈਂਡਮਾਈਨਜ਼ ਤੇ ਅਣਚੱਲੇ ਬੰਬ ਆਦਿ ਨੂੰ ਹਟਾਉਣ ਲਈ 3 ਮਿਲੀਅਨ ਡਾਲਰ ਨਾਲ ਯੂਕਰੇਨ ਦੀ ਮਦਦ ਕਰੇਗਾ। ਇਸ ਤੋਂ ਇਲਾਵਾ ਲੈਂਡਮਾਈਨਜ਼ ਹਟਾਉਣ ਲਈ ਪਹਿਲਾਂ ਹੀ ਕੈਨੇਡਾ ਵੱਲੋਂ 32 ਮਿਲੀਅਨ ਡਾਲਰ ਦੇਣ ਦੀ ਗੱਲ ਆਖੀ ਜਾ ਚੁੱਕੀ ਹੈ। ਇਸ ਮਕਸਦ ਲਈ ਯੂਰਪੀਅਨ ਯੂਨੀਅਨ ਵੱਲੋਂ 43 ਮਿਲੀਅਨ ਯੂਰੋਜ਼ ਦਿੱਤੇ ਜਾਣਗੇ।
ਇੱਥੇ ਇਹ ਵੀ ਦੱਸਣਾ ਬਣਦਾ ਹੈ ਕਿ ਯੂਕਰੇਨੀਅਨ ਇਲੈਕਟ੍ਰੀਕਲ ਗ੍ਰਿੱਡ ਦੀ ਮਦਦ ਲਈ ਕੈਨੇਡੀਅਨ ਐਨਰਜੀ ਟਰਾਂਸਫਾਰਮਰਜ਼ ਵੀ ਭੇਜੇ ਜਾਣਗੇ। ਟਰੂਡੋ ਨੇ ਆਖਿਆ ਕਿ ਭਾਵੇਂ ਸੰਘਰਸ਼ ਨੂੰ ਕਿੰਨਾਂ ਹੀ ਸਮਾਂ ਕਿਉਂ ਨਾ ਲੱਗ ਜਾਵੇ ਅਸੀਂ ਯੂਕਰੇਨ ਲਈ ਆਪਣੇ ਯੂਰਪੀਅਨ ਭਾਈਵਾਲਾਂ ਦੇ ਮੋਢੇ ਨਾਲ ਮੋਢਾ ਜੋੜ ਕੇ ਖੜ੍ਹੇ ਰਹਾਂਗੇ।