ਓਟਵਾ, 2 ਮਾਰਚ (ਪੋਸਟ ਬਿਊਰੋ) : ਨੌਰਡਸਟਰੌਮ ਇਨਕਾਰਪੋਰੇਸ਼ਨ ਵੱਲੋਂ ਆਪਣੇ ਸਾਰੇ ਕੈਨੇਡੀਅਨ ਸਟੋਰਜ਼ ਬੰਦ ਕੀਤੇ ਜਾ ਰਹੇ ਹਨ ਤੇ ਇਸ ਦੇ ਨਾਲ ਹੀ 2500 ਮੁਲਾਜ਼ਮਾਂ ਦੀ ਛਾਂਗੀ ਵੀ ਕੀਤੀ ਜਾ ਰਹੀ ਹੈ।
ਸੀਆਟਲ ਸਥਿਤ ਰੀਟੇਲਜ਼ ਦੇ ਛੇ ਨੌਰਡਸਟਰੌਮ ਤੇ ਸੱਤ ਨੌਰਡਸਟਰੌਮ ਰੈਕ ਸਟੋਰ ਕੈਨੇਡਾ ਵਿੱਚ ਹਨ ਤੇ ਵੀਰਵਾਰ ਨੂੰ ਕੰਪਨੀ ਨੇ ਆਪਣੇ ਸਾਰੇ ਕੈਨੇਡੀਅਨ ਸਟੋਰ ਇਸ ਸਾਲ ਜੂਨ ਤੱਕ ਬੰਦ ਕਰਨ ਦਾ ਐਲਾਨ ਕਰ ਦਿੱਤਾ। ਕੰਪਨੀ ਵੱਲੋਂ ਆਪਣਾ ਈ-ਕਾਮਰਸ ਬਿਜ਼ਨਸ ਵੀ ਬੰਦ ਕੀਤਾ ਜਾ ਰਿਹਾ ਹੈ। ਇਸ ਦੌਰਾਨ ਕੰਪਨੀ ਦੇ ਚੀਫ ਐਗਜ਼ੈਕਟਿਵ ਐਰਿਕ ਨੌਰਡਸਟਰੌਮ ਨੇ ਦੱਸਿਆ ਕਿ ਕੰਪਨੀ ਵੱਲੋਂ ਨਿਯਮਿਤ ਤੌਰ ਉੱਤੇ ਕੀਤੇ ਜਾਣ ਵਾਲੇ ਮੁਲਾਂਕਣ ਕਾਰਨ ਹੀ ਕੈਨੇਡਾ ਵਿੱਚ ਇਸ ਨੂੰ ਬੰਦ ਕਰਨ ਦਾ ਫੈਸਲਾ ਕੀਤਾ ਗਿਆ ਹੈ।
ਇੱਕ ਬਿਆਨ ਜਾਰੀ ਕਰਕੇ ਉਨ੍ਹਾਂ ਆਖਿਆ ਕਿ ਸਾਰੀਆਂ ਕੋਸਿ਼ਸ਼ਾਂ ਕਰਨ ਦੇ ਬਾਵਜੂਦ ਆਪਣੇ ਕੈਨੇਡੀਅਨ ਕਾਰੋਬਾਰ ਲਈ ਅਸੀਂ ਮੁਨਾਫੇ ਵਾਲਾ ਰਾਹ ਨਹੀਂ ਲੱਭ ਸਕੇ। ਨੌਰਡਸਟਰੌਮ ਇੱਕ ਡਿਪਾਰਟਮੈਂਟ ਸਟੋਰ ਚੇਨ ਹੈ ਜੋ ਕਿ ਡਿਜ਼ਾਈਨਰ ਵਸਤਾਂ ਵੇਚਦਾ ਹੈ।ਸੱਭ ਤੋਂ ਪਹਿਲਾਂ ਇਸ ਨੇ 2012 ਵਿੱਚ ਕੈਨੇਡਾ ਵਿੱਚ ਕਾਰੋਬਾਰ ਦੇ ਪਸਾਰ ਦਾ ਐਲਾਨ ਕੀਤਾ ਸੀ ਤੇ ਆਪਣਾ ਸੱਭ ਤੋਂ ਪਹਿਲਾ ਸਟੋਰ ਕੈਲਗਰੀ ਵਿੱਚ ਸਤੰਬਰ 2014 ਵਿੱਚ ਸੀਐਫ ਚਿਨੂਕ ਸੈਂਟਰ ਵਿਖੇ ਖੋਲ੍ਹਿਆ ਸੀ।
ਇਸ ਤੋਂ ਬਾਅਦ ਕੰਪਨੀ ਨੇ ਤੇਜ਼ੀ ਨਾਲ ਓਟਵਾ ਵਿੱਚ ਸੀਐਫ ਰਿਡੂ ਸੈਂਟਰ, ਵੈਨਕੂਵਰ ਵਿੱਚ ਸੀਐਫ ਪੈਸੇਫਿਕ ਸੈਂਟਰ, ਤੇ ਸੀਐਫ ਈਟਨ ਸੈਂਟਰ, ਯੌਰਕਡੇਲ ਸ਼ਾਪਿੰਗ ਸੈਂਟਰ ਤੇ ਟੋਰਾਂਟੋ ਵਿੱਚ ਸੀਐਫ ਸੇ਼ਰਵੇਅ ਗਾਰਡਨਜ਼ ਵਿੱਚ ਆਪਣੇ ਸਟੋਰ ਖੋਲ੍ਹੇ।