ਓਟਵਾ, 24 ਫਰਵਰੀ (ਪੋਸਟ ਬਿਊਰੋ) : ਮਹਾਰਾਣੀ ਐਲਿਜ਼ਾਬੈੱਥ ਦੋਇਮ ਦੀਆਂ ਅੰਤਿਮ ਰਸਮਾਂ ਦੌਰਾਨ ਕੈਨੇਡੀਅਨ ਸਰਕਾਰ ਵੱਲੋਂ ਹੋਟਲ ਦੇ ਕਮਰਿਆਂ ਵਿੱਚ ਠਹਿਰਣ ਲਈ 400,000 ਡਾਲਰ ਦੇ ਨੇੜੇ ਤੇੜੇ ਖਰਚ ਕੀਤੇ ਗਏ। ਇਸ ਵਿੱਚ 6000 ਡਾਲਰ ਦਾ ਇੱਕ ਸੁਈਟ ਵੀ ਸ਼ਾਮਲ ਸੀ।
19 ਸਤੰਬਰ ਨੂੰ ਹੋਈਆਂ ਇਨ੍ਹਾਂ ਅੰਤਿਮ ਰਸਮਾਂ ਵਿੱਚ ਹਿੱਸਾ ਲੈਣ ਲਈ ਗਏ ਕੈਨੇਡੀਅਨ ਵਫਦ ਵਿੱਚ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਤੇ ਉਨ੍ਹਾਂ ਦੀ ਪਤਨੀ, ਗਵਰਨਰ ਜਨਰਲ ਮੈਰੀ ਸਾਇਮਨ, ਸਾਬਕਾ ਪ੍ਰਧਾਨ ਮੰਤਰੀ ਕਿੰਮ ਕੈਂਪਬੈਲ, ਜੀਨ ਕ੍ਰੈਚੀਅਨ, ਪਾਲ ਮਾਰਟਿਨ, ਸਟੀਫਨ ਹਾਰਪਰ ਤੇ ਓਲੰਪੀਅਨ ਮਾਰਕ ਟਿਊਕਸਬਰੀ ਤੋਂ ਇਲਾਵਾ ਅਦਾਕਾਰਾ ਸੈਂਡਰਾ ਓਹ ਸ਼ਾਮਲ ਸਨ।ਕੈਨੇਡੀਅਨ ਸਰਕਾਰ ਵੱਲੋਂ ਇਸ ਗੱਲ ਦਾ ਖੁਲਾਸਾ ਨਹੀਂ ਕੀਤਾ ਗਿਆ ਹੈ ਕਿ ਕੌਰਿੰਥੀਆ ਲੰਡਨ ਹੋਟਲ ਦੇ 6000 ਡਾਲਰ ਦੇ ਸੁਈਟ ਵਿੱਚ ਕੌਣ ਠਹਿਰਿਆ ਸੀ।ਹੋਟਲ ਦੀ ਵੈੱਬਸਾਈਟ ਅਨੁਸਾਰ ਇਸ ਸੁਈਟ ਵਿੱਚ ਰਹਿਣ ਵਾਲੇ ਨੂੰ ਬਟਲਰ ਸਰਵਿਸ ਤੇ ਰਿਵਰ ਟੇਮਜ਼ ਦਾ ਨਜ਼ਾਰਾ ਵੀ ਵੇਖਣ ਨੂੰ ਮਿਲਦਾ ਹੈ। ਇਸ ਸੁਈਟ ਨੂੰ ਪੰਜ ਰਾਤਾਂ ਲਈ ਵਰਤਿਆ ਗਿਆ।
ਪ੍ਰਾਪਤ ਜਾਣਕਾਰੀ ਅਨੁਸਾਰ 11 ਤੋਂ 20 ਸਤੰਬਰ ਤੱਕ ਕੌਰਿੰਥੀਆ ਲੰਡਨ ਹੋਟਲ ਵਿੱਚ ਰਹਿਣ ਲਈ ਕੈਨੇਡੀਅਨ ਸਰਕਾਰ ਵੱਲੋਂ 356,981·70 ਡਾਲਰ ਖਰਚੇ ਗਏ।ਹੋਰਨਾਂ ਡੈਲੀਗੇਟਸ ਨੂੰ ਠਹਿਰਾਉਣ ਲਈ ਫੈਡਰਲ ਸਰਕਾਰ ਨੇ ਲੰਡਨ ਦੇ ਸਟੈਨਸਟੈਡ ਏਅਰਪੋਰਟ ਨੇੜੇ ਹਿਲਟਨ ਦੇ ਹੈਂਪਟਨ ਹੋਟਲ ਵਿੱਚ 40,861·11 ਡਾਲਰ ਦੀ ਰਕਮ ਖਰਚ ਕੇ ਕਮਰੇ ਬੁੱਕ ਕਰਵਾਏ ਗਏ। ਇਹ ਸੈਂਟਰਲ ਲੰਡਨ ਤੋਂ ਇੱਕ ਘੰਟੇ ਦੀ ਡਰਾਈਵ ਉੱਤੇ ਸਥਿਤ ਹੈ।
ਗਲੋਬਲ ਅਫੇਅਰਜ਼ ਕੈਨੇਡਾ ਅਨੁਸਾਰ ਕੈਨੇਡਾ ਦੇ ਵਫਦ ਦੇ ਠਹਿਰਣ ਲਈ ਫੈਡਰਲ ਸਰਕਾਰ ਵੱਲੋਂ 313, 614·00 ਬ੍ਰਿਟਿਸ਼ ਪਾਊਂਡ (397,842·81 ਕੈਨੇਡੀਅਨ ਡਾਲਰ) ਖਰਚ ਕੀਤੇ ਗਏ।