ਓਟਵਾ, 6 ਫਰਵਰੀ (ਪੋਸਟ ਬਿਊਰੋ) : ਸਾਬਕਾ ਲਿਬਰਲ ਐਮਪੀ ਰਾਜ ਗਰੇਵਾਲ ਵੱਲੋਂ ਆਪਣੇ ਖਿਲਾਫ ਲਾਏ ਗਏ ਦੋ ਕ੍ਰਿਮੀਨਲ ਚਾਰਜਿਜ਼ ਨੂੰ ਰੱਦ ਕਰਨ ਦੀ ਮੰਗ ਕੀਤੀ ਜਾ ਰਹੀ ਹੈ।
ਰਾਜ ਗਰੇਵਾਲ ਦੇ ਵਕੀਲ ਨੇ ਤਰਕ ਦਿੰਦਿਆਂ ਆਖਿਆ ਕਿ ਵਿਸ਼ਵਾਸ ਤੋੜਨ ਦੇ ਦੋ ਮਾਮਲਿਆਂ ਵਿੱਚ ਪ੍ਰੌਸੀਕਿਊਟਰ ਉਨ੍ਹਾਂ ਦੇ ਮੁਵੱਕਿਲ ਖਿਲਾਫ ਦੋਸ਼ ਸਿੱਧ ਕਰਨ ਲਈ ਲੋੜੀਂਦੇ ਸਬੂਤ ਮੁਹੱਈਆ ਨਹੀਂ ਕਰਵਾ ਸਕੇ। ਇਸ ਤਰ੍ਹਾਂ ਦੀਆਂ ਲੱਭਤਾਂ ਨੂੰ ਸਿੱਧ ਕਰਨ ਵਿੱਚ ਕ੍ਰਾਊਨ ਵੀ ਅਸਫਲ ਰਹੇ ਹਨ।ਜਿ਼ਕਰਯੋਗ ਹੈ ਕਿ ਕ੍ਰਾਊਨ ਵੱਲੋਂ ਇਹ ਸਿੱਧ ਕੀਤਾ ਜਾਣਾ ਸੀ ਕਿ ਗਰੇਵਾਲ ਨੇ ਨਿਜੀ ਫਾਇਦੇ ਲਈ ਆਪਣੇ ਸਿਆਸੀ ਆਫਿਸ ਦੀ ਵਰਤੋਂ ਕੀਤੀ ਹੈ। ਇਸ ਦੌਰਾਨ ਵੱਡੇ ਲੋਨ ਦੇ ਬਦਲੇ ਪ੍ਰਧਾਨ ਮੰਤਰੀ ਦੇ ਈਵੈਂਟਸ ਤੱਕ ਲੋਕਾਂ ਦੀ ਪਹੁੰਚ ਕਰਵਾਈ ਤੇ ਇਮੀਗ੍ਰੇਸ਼ਨ ਫਾਈਲਜ਼ ਵਿੱਚ ਵੀ ਮਦਦ ਕੀਤੀ। ਬਾਅਦ ਵਿੱਚ ਇਸ ਪੈਸੇ ਨਾਲ ਜੂਏ ਕਾਰਨ ਚੜ੍ਹਿਆ ਆਪਣਾ ਕਰਜ਼ਾ ਚੁਕਾਇਆ।
ਪਰ ਸੋਮਵਾਰ ਨੂੰ ਜੱਜ ਸਾਹਮਣੇ ਬੋਲਦਿਆਂ ਗਰੇਵਾਲ ਦੇ ਡਿਫੈਂਸ ਲਾਇਰ ਨਾਦਰ ਹਸਨ ਨੇ ਆਖਿਆ ਕਿ ਇਸ ਪੂਰੇ ਮਾਮਲੇ ਦੀਆਂ ਪ੍ਰੋਸੀਡਿੰਗਜ਼ ਦੌਰਾਨ ਜਿੰਨੇ ਵੀ ਤੱਥ ਤੇ ਸਬੂਤ ਪੇਸ਼ ਕੀਤੇ ਗਏ ਸਰਕਾਰੀ ਵਕੀਲ ਚਾਹੁੰਦੇ ਹਨ ਕਿ ਜੱਜ ਉਨ੍ਹਾਂ ਨੂੰ ਅੱਖੋਂ ਪਰੋਖੇ ਕਰ ਦੇਣ। ਗਰੇਵਾਲ ਵੀਡੀਓ ਕਾਨਫਰੰਸ ਰਾਹੀਂ ਅਦਾਲਤ ਵਿੱਚ ਪੇਸ਼ ਹੋਏ ਤੇ ਉਨ੍ਹਾਂ ਦੇ ਵਕੀਲ ਵੱਲੋਂ ਉਨ੍ਹਾਂ ਨੂੰ ਸਾਰੇ ਦੋਸ਼ਾਂ ਤੋਂ ਬਰੀ ਕਰਨ ਦੀ ਅਪੀਲ ਕੀਤੀ।