ਓਟਵਾ, 14 ਨਵੰਬਰ (ਪੋਸਟ ਬਿਊਰੋ) : ਸਾਹ ਸਬੰਧੀ ਬਿਮਾਰੀਆਂ ਵਿੱਚ ਹੋਏ ਵਾਧੇ ਦੇ ਚੱਲਦਿਆਂ ਮਾਪਿਆਂ ਨੂੰ ਆਪਣੇ ਬੱਚਿਆਂ ਲਈ ਦਰਦ ਤੇ ਬੁਖਾਰ ਸਬੰਧੀ ਦਵਾਈਆਂ ਲੱਭਣ ਵਾਸਤੇ ਸੰਘਰਸ਼ ਕਰਨਾ ਪੈ ਰਿਹਾ ਹੈ। ਪਰ ਇਸ ਦੌਰਾਨ ਸੋਮਵਾਰ ਨੂੰ ਹੈਲਥ ਕੈਨੇਡਾ ਨੇ ਐਲਾਨ ਕੀਤਾ ਕਿ ਉਸ ਵੱਲੋਂ ਬੱਚਿਆਂ ਦੀ ਐਸੇਟਾਮੀਨੋਫੈਨ ਦਵਾਈ ਦੀ ਸਪਲਾਈ ਵਿਦੇਸ਼ ਤੋਂ ਮੰਗਵਾਉਣ ਦਾ ਪ੍ਰਬੰਧ ਕਰ ਲਿਆ ਗਿਆ ਹੈ।
ਆਉਣ ਵਾਲੇ ਹਫਤਿਆਂ ਵਿੱਚ ਇਹ ਸਪਲਾਈ ਰੀਟੇਲ ਖਰੀਦ ਲਈ ਉਪਲਬਧ ਹੋਵੇਗੀ ਤੇ ਮਾਪੇ ਕਮਿਊਨਿਟੀ ਫਾਰਮੇਸੀਜ਼ ਤੋਂ ਵੀ ਇਸ ਨੂੰ ਹਾਸਲ ਕਰ ਸਕਣਗੇ। ਇਸ ਸਪਲਾਈ ਤੋਂ ਇਲਾਵਾ ਹੈਲਥ ਕੈਨੇਡਾ ਵੱਲੋਂ ਪਿੱਛੇ ਜਿਹੇ ਨਵਜੰਮੇਂ ਬੱਚਿਆਂ ਤੇ ਨਿੱਕੇ ਬੱਚਿਆਂ ਲਈ ਇਬੂਪ੍ਰੋਫਨ ਤੇ ਐਸੇਟਾਮੀਨੋਫੈਨ ਦਵਾਈਆਂ ਦੀ ਸਪਲਾਈ ਕੈਨੇਡਾ ਦੇ ਹਸਪਤਾਲਾਂ ਲਈ ਉਪਲਬਧ ਕਰਵਾਉਣ ਸਬੰਧੀ ਇਸ ਨੂੰ ਇੰਪੋਰਟ ਕਰਨ ਦੀ ਵੀ ਮਨਜ਼ੂਰੀ ਦੇ ਦਿੱਤੀ ਹੈ। ਏਜੰਸੀ ਨੇ ਇਹ ਦਾਅਵਾ ਵੀ ਕੀਤਾ ਹੈ ਕਿ ਇਬੂਪੋ੍ਰਫਨ ਦੀ ਸਪਲਾਈ ਇੰਪੋਰਟ ਕਰ ਲਈ ਗਈ ਹੈ ਤੇ ਇਸ ਦੀ ਵੰਡ ਕੀਤੀ ਜਾ ਰਹੀ ਹੈ।
ਇਸ ਦੌਰਾਨ ਹੈਲਥ ਕੈਨੇਡਾ ਵੱਲੋਂ ਮਾਪਿਆਂ ਨੂੰ ਇਹ ਵੀ ਅਪੀਲ ਕੀਤੀ ਗਈ ਹੈ ਕਿ ਸਟੋਰ ਦੀਆਂ ਸ਼ੈਲਫਾਂ ਉੱਤੇ ਦਵਾਈਆਂ ਦੀ ਸਪਲਾਈ ਨਜ਼ਰ ਆਉਣ ਤੋਂ ਬਾਅਦ ਉਸ ਨੂੰ ਇੱਕਠਾ ਨਾ ਕਰਨ ਲੱਗ ਜਾਣ ਕਿਉਂਕਿ ਅਜੇ ਵੀ ਇਨ੍ਹਾਂ ਦਵਾਈਆਂ ਦੀ ਕਮੀ ਪਾਈ ਜਾ ਰਹੀ ਹੈ ਤੇ ਇਸ ਨਾਲ ਹੋਰਨਾਂ ਲੋੜਵੰਦ ਮਾਪਿਆਂ ਨੂੰ ਪਰੇਸ਼ਾਨੀ ਹੋ ਸਕਦੀ ਹੈ। ਏਜੰਸੀ ਦਾ ਇਹ ਵੀ ਕਹਿਣਾ ਹੈ ਕਿ ਜੇ ਕੋਈ ਦਵਾਈ ਕੇਅਰਗਿਵਰਜ਼ ਨੂੰ ਨਹੀਂ ਮਿਲਦੀ ਹੈ ਤਾਂ ਫਾਰਮਾਸਿਸਟਸ ਤੋਂ ਉਸ ਦਵਾਈ ਦਾ ਬਦਲ ਮੰਗਿਆ ਜਾਵੇ।