ਓਟਵਾ, 30 ਅਕਤੂਬਰ (ਪੋਸਟ ਬਿਊਰੋ) : ਓਟਵਾ ਪੁਲਿਸ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਉਸਾਰੀ ਅਧੀਨ ਵੇਨੀਅਰ ਅਪਾਰਟਮੈਂਟ ਬਿਲਡਿੰਗ ਵਿੱਚੋਂ ਮਿਲਿਆ ਮਨੁੱਖੀ ਪਿੰਜਰ ਲਾਪਤਾ ਇਨੁਕ ਮਹਿਲਾ ਦਾ ਹੈ। ਇਸ ਮਹਿਲਾ ਨੂੰ ਆਖਰੀ ਵਾਰੀ ਪੰਜ ਸਾਲ ਪਹਿਲਾਂ ਓਟਵਾ ਈਸਟ ਵਿੱਚ ਵੇਖਿਆ ਗਿਆ ਸੀ।
ਡੈਸ਼ਕੈਂਪਸ ਐਵਨਿਊ ਸਥਿਤ ਤਿੰਨ ਮੰਜਿ਼ਲਾ ਬਿਲਡਿੰਗ ਵਿੱਚ ਕੰਮ ਕਰ ਰਹੇ ਵਰਕਰਜ਼ ਨੂੰ 28 ਸਤੰਬਰ ਨੂੰ ਮਨੁੱਖੀ ਪਿੰਜਰ ਮਿਲਿਆ ਸੀ। 29 ਸਤੰਬਰ ਨੂੰ ਪੁਲਿਸ ਵੱਲੋਂ ਇਹ ਬਿਆਨ ਜਾਰੀ ਕੀਤਾ ਗਿਆ ਸੀ ਕਿ ਇਸ ਬਿਲਡਿੰਗ ਲਈ ਜਦੋਂ ਜ਼ਮੀਨ ਪੁੱਟਣ ਦਾ ਕੰਮ ਕੀਤਾ ਜਾ ਰਿਹਾ ਸੀ ਤਾਂ ਵਰਕਰਜ਼ ਨੂੰ ਇੱਥੇ ਪਿੰਜਰ ਵਰਗੀ ਕੋਈ ਚੀਜ਼ ਮਿਲੀ।ਐਤਵਾਰ ਨੂੰ ਓਟਵਾ ਪੁਲਿਸ ਸਰਵਿਸ ਹੋਮੀਸਾਈਡ ਯੂਨਿਟ ਨੇ ਇਸ ਮਨੁੱਖੀ ਪਿੰਜਰ ਦੀ ਪਛਾਣ ਮੈਰੀ ਪਾਪਾਤਸੀ ਵਜੋਂ ਕੀਤੀ।
2017 ਵਿੱਚ ਜਦੋਂ ਪਾਪਾਤਸੀ ਲਾਪਤਾ ਹੋਈ ਤਾਂ ਉਹ 39 ਸਾਲਾਂ ਦੀ ਸੀ। ਪੁਲਿਸ ਨੇ ਦੱਸਿਆ ਕਿ ਪਾਪਾਤਸੀ ਨੂੰ ਆਖਰੀ ਵਾਰੀ ਜਿਊਂਦਿਆਂ 27 ਅਪਰੈਲ, 2017 ਨੂੰ ਵੇਨੀਆਰ ਇਲਾਕੇ ਵਿੱਚ ਵੇਖਿਆ ਗਿਆ ਸੀ। ਪੁਲਿਸ ਨੇ ਬਿਆਨ ਜਾਰੀ ਕਰਕੇ ਪਾਪਾਤਸੀ ਦੇ ਪਰਿਵਾਰ ਤੇ ਰਿਸ਼ਤੇਦਾਰਾਂ ਨਾਲ ਦੁੱਖ ਸਾਂਝਾ ਕੀਤਾ।
ਪੁਲਿਸ ਨੇ ਦੱਸਿਆ ਕਿ ਜੁਲਾਈ 2017 ਵਿੱਚ ਮੇਜਰ ਕ੍ਰਾਈਮ ਯੂਨਿਟ ਵੱਲੋਂ ਮਾਮਲੇ ਦੀ ਜਾਂਚ ਆਪਣੇ ਹੱਥ ਲੈ ਲਈ ਗਈ ਸੀ ਕਿਉਂਕਿ ਪਾਪਾਤਸੀ ਦੇ ਲਾਪਤਾ ਹੋਣ ਦੇ ਮਾਮਲੇ ਨੂੰ ਜਾਂਚਕਾਰ ਸ਼ੱਕੀ ਮੰਨ ਕੇ ਚੱਲ ਰਹੇ ਸਨ। ਉਹ ਮੂਲ ਰੂਪ ਵਿੱਚ ਨੂਨਾਵਤ ਤੋਂ ਸੀ ਤੇ ਫਿਰ ਓਟਵਾ ਆ ਗਈ ਸੀ। ਉਹ 10 ਬੱਚਿਆਂ ਦੀ ਮਾਂ ਸੀ।