ਓਟਵਾ, 27 ਅਕਤੂਬਰ (ਪੋਸਟ ਬਿਊਰੋ) : ਅਮਰੀਕਾ ਦੇ ਵਿਦੇਸ਼ ਮੰਤਰੀ ਐਂਟਨੀ ਬਲਿੰਕਨ ਅੱਜ ਓਟਵਾ ਵਿੱਚ ਹਨ, ਜਿੱਥੇ ਉਹ ਕੈਨੇਡਾ ਦੀ ਵਿਦੇਸ਼ ਮੰਤਰੀ ਮਿਲੇਨੀ ਜੋਲੀ ਤੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨਾਲ ਮੁਲਾਕਾਤ ਕਰਨਗੇ।
ਇਹ ਤਿੰਨੇ ਅਧਿਕਾਰੀ ਇਰਾਨ ਵਿੱਚ ਮਨੁੱਖੀ ਅਧਿਕਾਰਾਂ ਤੇ ਨੌਰਥ ਅਮੈਰੀਕਨ ਰਫਿਊਜੀ ਪਾਲਿਸੀ ਦੇ ਨਾਲ ਨਾਲ ਯੂਕਰੇਨ ਪ੍ਰਤੀ ਸਮਰਥਨ ਨੂੰ ਹੋਰ ਮਜ਼ਬੂਤ ਕਰਨ ਲਈ ਰਸਮੀ ਤੌਰ ਉੱਤੇ ਗੱਲਬਾਤ ਕਰਨਗੇ। ਇਹ ਸਾਰੇ ਹਾਇਤੀ ਵਿੱਚ ਮਨੁੱਖਤਾ ਸਬੰਧੀ ਸੰਕਟ ਬਾਰੇ ਵੀ ਗੱਲ ਕਰਨਗੇ। ਜਿ਼ਕਰਯੋਗ ਹੈ ਕਿ ਹਾਇਤੀ ਵੱਲੋਂ ਦੇਸ਼ ਵਿੱਚ ਪੈਦਾ ਹੋਏ ਸੰਕਟ ਨਾਲ ਨਜਿੱਠਣ ਲਈ ਹੋਰਨਾਂ ਦੇਸ਼ਾਂ ਦੀ ਫੌਜ ਤੋਂ ਦਖਲਅੰਦਾਜ਼ੀ ਦੀ ਮੰਗ ਕੀਤੀ ਜਾ ਰਹੀ ਹੈ।
ਇਸ ਦੌਰਾਨ ਜੋਲੀ ਨੇ ਆਖਿਆ ਕਿ ਵਾਸਿ਼ੰਗਟਨ ਤੇ ਓਟਵਾ ਅਗਲੇ ਮਹੀਨੇ ਹੋਣ ਜਾ ਰਹੀ ਜੀ-20 ਤੇ ਏਸ਼ੀਆ ਪੈਸੇਫਿਕ ਇਕਨੌਮਿਕ ਕੋਆਪਰੇਸ਼ਨ ਫੋਰਮਜ਼ ਸਬੰਧੀ ਸਿਖਰ ਵਾਰਤਾ ਤੋਂ ਪਹਿਲਾਂ ਸਬੰਧਾਂ ਨੂੰ ਹੋਰ ਮਜ਼ਬੂਤ ਕਰਨਾ ਚਾਹੁੰਦੇ ਹਨ। ਬਲਿੰਕਨ ਦੀ ਇਹ ਦੋ ਰੋਜ਼ਾ ਫੇਰੀ ਮਾਂਟਰੀਅਲ ਵਿੱਚ ਖ਼ਤਮ ਹੋਵੇਗੀ ਜਿੱਥੇ ਉਹ ਲਿਥੀਅਮ ਰੀਸਾਈਕਲਿੰਗ ਪਲਾਂਟ ਦਾ ਦੌਰਾ ਕਰਨਗੇ ਤੇ ਟਰੇਡ ਅਤੇ ਇਲੈਕਟ੍ਰਿਕ ਗੱਡੀਆਂ ਉੱਤੇ ਧਿਆਨ ਕੇਂਦਰਿਤ ਕਰਨਗੇ।