ਓਟਵਾ, 20 ਸਤੰਬਰ (ਪੋਸਟ ਬਿਊਰੋ) :ਹਾਊਸ ਆਫ ਕਾਮਨਜ਼ ਵਿੱਚ ਵਿਰੋਧੀ ਧਿਰ ਦੇ ਆਗੂ ਵਜੋਂ ਆਪਣੀ ਪਾਰੀ ਦੀ ਸੁ਼ਰੂਆਤ ਕਰਦਿਆਂ ਕੰਜ਼ਰਵੇਟਿਵ ਲੀਡਰ ਪਿਏਰ ਪੌਲੀਏਵਰ ਨੇ ਪ੍ਰਸ਼ਨ ਕਾਲ ਦੌਰਾਨ ਸਰਕਾਰ ਨੂੰ ਲੰਮੇਂ ਹੱਥੀਂ ਲਿਆ। ਰਹਿਣ ਸਹਿਣ ਉੱਤੇ ਆ ਰਹੀ ਲਾਗਤ ਤੇ ਮਹਿੰਗਾਈ ਨਾਲ ਨਜਿੱਠਣ ਵਿੱਚ ਅਸਫਲ ਰਹੀ ਲਿਬਰਲ ਸਰਕਾਰ ਨੂੰ ਪੌਲੀਏਵਰ ਨੇ ਕਟਹਿਰੇ ਵਿੱਚ ਖੜ੍ਹਾਇਆ।
ਫਰੈਚ ਵਿੱਚ ਗੱਲ ਕਰਦਿਆਂ ਪੌਲੀਏਵਰ ਨੇ ਲਿਬਰਲਾਂ ਨੂੰ ਪੁੱਛਿਆ ਕਿ ਕੀ ਉਹ ਨਿਰਧਾਰਤ ਟੈਕਸਾਂ ਵਿੱਚ ਵਾਧੇ ਨੂੰ ਰੱਦ ਕਰਨਗੇ? ਉਨ੍ਹਾਂ ਆਖਿਆ ਕਿ ਕੈਨੇਡਾ ਪੈਨਸ਼ਨ ਪਲੈਨ ਤੇ ਇੰਪਲੌਇਮੈਂਟ ਇੰਸ਼ੋਰੈਂਸ ਪ੍ਰੀਮੀਅਮਜ਼ ਵਿੱਚ ਵਾਧੇ ਨੂੰ ਕੈਨੇਡੀਅਨਜ਼ ਅਦਾ ਕਰਨ ਦੇ ਸਮਰੱਥ ਨਹੀਂ ਹਨ। ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੇ ਇਸ ਸਮੇਂ ਸੰਯੁਕਤ ਰਾਸ਼ਟਰ ਦੀ ਜਨਰਲ ਅਸੈਂਬਲੀ ਵਿੱਚ ਹਿੱਸਾ ਲੈਣ ਲਈ ਨਿਊ ਯੌਰਕ ਹੋਣ ਕਾਰਨ ਉਨ੍ਹਾਂ ਦੀ ਥਾਂ ਉੱਤੇ ਲਿਬਰਲਾਂ ਦਾ ਪੱਖ ਰੱਖਣ ਦੀ ਜਿ਼ੰਮੇਵਾਰੀ ਐਸੋਸਿਏਟ ਮਨਿਸਟਰ ਆਫ ਫਾਇਨਾਂਸ ਐਂਡ ਟੂਰਿਜ਼ਮ ਰੈਂਡੀ ਬੌਇਜੋ਼ਨਾਲਟ ਨੇ ਨਿਭਾਈ। ਉਨ੍ਹਾਂ ਇਸ ਸਵਾਲ ਦਾ ਫਰੈਂਚ ਵਿੱਚ ਹੀ ਜਵਾਬ ਦਿੰਦਿਆਂ ਆਖਿਆ ਕਿ ਪੂਰੇ ਸੈਸ਼ਨ ਦੌਰਾਨ ਤੁਹਾਨੂੰ ਦੋ ਮੁੱਦਿਆਂ ਉੱਤੇ ਸਰਕਾਰ ਦਾ ਨਜ਼ਰੀਆ ਵੇਖਣ ਨੂੰ ਮਿਲੇਗਾ। ਸਰਕਾਰ ਉਨ੍ਹਾਂ ਕੈਨੇਡੀਅਨਜ਼ ਦੀ ਮਦਦ ਲਈ ਕੰਮ ਕਰ ਰਹੀ ਹੈ ਜਿਹੜੇ ਸੱਭ ਤੋਂ ਵੱਧ ਲੋੜਵੰਦ ਹਨ। ਦੂਜੇ ਪਾਸੇ ਕੰਜ਼ਰਵੇਟਿਵ ਪਾਰਟੀ ਤੇ ਇਸ ਦੇ ਮੈਂਬਰ ਹਨ ਜਿਨ੍ਹਾਂ ਨੂੰ ਕੈਨੇਡੀਅਨਜ਼ ਦੀ ਜਮ੍ਹਾਂ ਨਹੀਂ ਪਈ।
ਟਰੂਡੋ ਤੇ ਪੌਲੀਏਵਰ ਦਾ ਸਾਹਮਣਾ ਪਹਿਲੀ ਵਾਰੀ ਵੀਰਵਾਰ ਨੂੰ ਹੋਣ ਦੀ ਸੰਭਾਵਨਾ ਹੈ। ਪੌਲੀਏਵਰ ਨੇ ਆਖਿਆ ਕਿ ਗਰੌਸਰੀ, ਗੈਸ ਦੀਆਂ ਕੀਮਤਾਂ ਤੇ ਹਾਊਸਿੰਗ ਦੀਆਂ ਅਸਮਾਨੀ ਛੋਹ ਰਹੀਆਂ ਕੀਮਤਾਂ ਕਾਰਨ ਕੈਨੇਡੀਅਨਾਂ ਨੂੰ ਵੱਡੀ ਆਰਥਿਕ ਮਾਰ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਉਨ੍ਹਾਂ ਆਖਿਆ ਕਿ ਮਹਿੰਗਾਈ ਦੇ ਇਸ ਦੌਰ ਵਿੱਚ ਲਿਬਰਲ ਸਰਕਾਰ ਕੈਨੇਡੀਅਨਜ਼ ਲਈ ਕੁੱਝ ਨਹੀਂ ਕਰ ਰਹੀ। ਇਸ ਦੇ ਜਵਾਬ ਵਿੱਚ ਲਿਬਰਲਾਂ ਨੇ ਆਖਿਆ ਕਿ ਸਰਕਾਰ ਵੱਲੋਂ ਮੰਗਲਵਾਰ ਨੂੰ ਦੋ ਬਿੱਲ ਪੇਸ਼ ਕੀਤੇ ਗਏ ਹਨ ਜਿਨ੍ਹਾਂ ਵਿੱਚੋਂ ਇੱਕ ਘੱਟ ਤੋਂ ਦਰਮਿਆਨੀ ਆਮਦਨ ਵਾਲੇ ਪਰਿਵਾਰਾਂ ਲਈ ਜੀਐਸਟੀ ਛੋਟ ਨੂੰ ਦੁੱਗਣਾ ਕਰਨ ਬਾਰੇ ਹੈ ਤੇ ਦੂਜਾ ਡੈਂਟਲ ਤੇ ਹਾਊਸਿੰਗ ਬੈਨੇਫਿਟਸ ਦੇ ਸਬੰਧ ਵਿੱਚ ਹੈ।