ਓਟਵਾ, 27 ਜੁਲਾਈ (ਪੋਸਟ ਬਿਊਰੋ) : ਹਾਕੀ ਕੈਨੇਡਾ ਦੇ ਚੀਫ ਫਾਇਨਾਂਸ਼ੀਅਲ ਆਫੀਸਰ ਨੇ ਦੱਸਿਆ ਕਿ 1989 ਤੋਂ ਲੈ ਕੇ 9 ਸੈਟਲਮੈਂਟਸ ਵਿੱਚ ਗਵਰਨਿੰਗ ਬਾਡੀ ਨੇ 7·6 ਮਿਲੀਅਨ ਡਾਲਰ ਅਦਾ ਕੀਤੇ ਹਨ। ਇਨ੍ਹਾਂ ਵਿੱਚੋਂ ਸੱਭ ਤੋਂ ਵੱਧ ਰਕਮ ਜਿਨਸੀ ਸੋ਼ਸ਼ਕ ਗ੍ਰਾਹਮ ਜੇਮਜ਼ ਦੇ ਪੀੜਤਾਂ ਨੂੰ ਚੁਕਾਈ ਗਈ।
ਇਹ ਖੁਲਾਸਾ ਜਿਨਸੀ ਹਮਲੇ ਦੇ ਦੋਸ਼ਾਂ ਨੂੰ ਗਵਰਨਿੰਗ ਬਾਡੀ ਵੱਲੋਂ ਕਿਸ ਤਰ੍ਹਾਂ ਸਾਂਭਿਆ ਜਾਂਦਾ ਰਿਹਾ ਹੈ, ਇਸ ਬਾਰੇ ਹਾਊਸ ਆਫ ਕਾਮਨਜ਼ ਦੀ ਹੈਰੀਟੇਜ ਕਮੇਟੀ ਦੀ ਚੱਲ ਰਹੀ ਜਾਂਚ ਦੌਰਾਨ ਹੋਇਆ।ਜਿ਼ਕਰਯੋਗ ਹੈ ਕਿ ਜੇਮਜ਼ ਨੂੰ 1980ਵਿਆਂ ਦੇ ਅਖੀਰ ਤੇ 90ਵਿਆਂ ਦੇ ਸ਼ੁਰੂ ਵਿੱਚ ਵੈਸਟਰਨ ਹਾਕੀ ਲੀਗ ਦੇ ਸਵਿਫਟ ਕਰੰਟ ਬ੍ਰੌਂਕੌਸ ਦੇ ਆਪਣੇ ਛੇ ਸਾਬਕਾ ਖਿਡਾਰੀਆਂ ਉੱਤੇ ਜਿਨਸੀ ਹਮਲਾ ਕਰਨ ਦੇ ਮਾਮਲੇ ਵਿੱਚ ਦੋਸ਼ੀ ਪਾਇਆ ਗਿਆ ਸੀ।
ਮਈ ਵਿੱਚ ਇਹ ਖਬਰ ਸਾਹਮਣੇ ਆਉਣ ਤੋਂ ਬਾਅਦ ਹਾਕੀ ਕੈਨੇਡਾ ਦੀ ਕਾਫੀ ਨੁਕਤਾਚੀਨੀ ਹੋ ਰਹੀ ਸੀ ਕਿ 2018 ਦੀ ਵਰਲਡ ਜੂਨੀਅਰ ਟੀਮ ਦੇ ਮੈਂਬਰਾਂ ਵੱਲੋਂ ਲੰਡਨ, ਓਨਟਾਰੀਓ ਵਿੱਚ ਇੱਕ ਗਾਲਾ ਈਵੈਂਟ ਦੌਰਾਨ ਜਿਨਸੀ ਹਮਲਾ ਕੀਤਾ ਸੀ। ਇਸ ਮਾਮਲੇ ਵਿੱਚ ਪੁਲਿਸ ਵੱਲੋਂ ਕੋਈ ਚਾਰਜਿਜ਼ ਨਹੀਂ ਸਨ ਲਾਏ ਗਏ, ਪਰ ਇਸ ਹਮਲੇ ਦੀ ਸਿ਼ਕਾਇਤ ਕਰਨ ਵਾਲੀ ਮਹਿਲਾ ਵੱਲੋਂ ਹਾਕੀ ਕੈਨੇਡਾ, ਕੈਨੇਡੀਅਨ ਹਾਕੀ ਲੀਗ ਤੇ ਕਈ ਖਿਡਾਰੀਆਂ ਉੱਤੇ ਮੁਕੱਦਮਾ ਦਰਜ ਕਰਵਾ ਦਿੱਤਾ ਸੀ।
ਇਹ ਵੀ ਪਤਾ ਲੱਗਿਆ ਸੀ ਕਿ ਹਾਕੀ ਕੈਨੇਡਾ ਨੇ ਅਣਦੱਸੀ ਰਕਮ ਦੇ ਕੇ ਇਸ ਮਾਮਲੇ ਨੂੰ ਬਾਹਰੋ ਬਾਹਰ ਹੀ ਰਫਾ-ਦਫਾ ਕਰ ਦਿੱਤਾ ਸੀ। ਹੁਣ ਕਮੇਟੀ ਵਿੱਚ ਸ਼ਾਮਲ ਐਮਪੀਜ਼ ਇਹ ਪਤਾ ਲਾਉਣ ਦੀ ਕੋਸਿ਼ਸ਼ ਕਰ ਰਹੇ ਹਨ ਕਿ ਇਨ੍ਹਾਂ ਦੋਸ਼ਾਂ ਤੇ ਮੁਕੱਦਮੇਂ ਨਾਲ ਹਾਕੀ ਕੈਨੇਡਾ ਨੇ ਕਿਵੇਂ ਨਜਿੱਠਿਆ ਸੀ।