ਓਟਵਾ, 24 ਜੂਨ (ਪੋਸਟ ਬਿਊਰੋ) : ਕੰਜ਼ਰਵੇਟਿਵ ਲੀਡਰਸਿ਼ਪ ਦੌੜ ਦੇ ਮੁੱਖ ਦਾਅਵੇਦਾਰ ਮੰਨੇ ਜਾ ਰਹੇ ਉਮੀਦਵਾਰ ਪਿਏਰ ਪੌਲੀਏਵਰ ਵੱਲੋਂ 312,000 ਮੈਂਬਰ ਬਣਾਉਣ ਦੇ ਕੀਤੇ ਜਾ ਰਹੇ ਦਾਅਵੇ ਨੂੰ ਦੋ ਹੋਰ ਫੈਡਰਲ ਕੰਜ਼ਰਵੇਟਿਵ ਉਮੀਦਵਾਰਾਂ ਵੱਲੋਂ ਸ਼ੱਕੀ ਦੱਸਿਆ ਜਾ ਰਿਹਾ ਹੈ। ਇੱਕ ਉਮੀਦਵਾਰ ਵੱਲੋਂ ਤਾਂ ਪੌਲੀਏਵਰ ਦੀ ਇਸ ਗੁੰਮਰਾਹਕੁੰਨ ਈਮੇਲ ਦੀ ਜਾਂਚ ਕਰਵਾਉਣ ਦੀ ਵੀ ਮੰਗ ਕੀਤੀ ਗਈ ਹੈ।
ਵੀਰਵਾਰ ਨੂੰ ਪੈਟ੍ਰਿਕ ਬ੍ਰਾਊਨ ਦੀ ਟੀਮ ਵੱਲੋਂ ਇਹ ਸਿ਼ਕਾਇਤ ਕੀਤੀ ਗਈ ਕਿ ਪੌਲੀਏਵਰ ਦੀ ਕੈਂਪੇਨ ਵੱਲੋਂ ਅਜਿਹੀ ਬਿਆਨਬਾਜ਼ੀ ਕਰਕੇ ਭੰਬਲਭੂਸੇ ਵਾਲੀ ਸਥਿਤੀ ਪੈਦਾ ਕੀਤੀ ਗਈ ਹੈ ਤੇ ਉਨ੍ਹਾਂ ਦੇ ਮੈਂਬਰਾਂ ਵਿੱਚ ਡਰ ਦਾ ਮਾਹੌਲ ਵੀ ਹੈ। ਇੱਕ ਪੱਤਰ ਵਿੱਚ ਬ੍ਰਾਊਨ ਦੀ ਨੈਸ਼ਨਲ ਕੈਂਪੇਨ ਦੇ ਕੋ-ਚੇਅਰ ਜੌਹਨ ਰੇਅਨੌਲਡਜ਼ ਨੇ ਆਖਿਆ ਕਿ ਈਮੇਲਜ਼ ਵਿੱਚ ਕੀਤੀ ਗਈ ਸੰਭਾਵੀ ਘਪਲੇਬਾਜ਼ੀ ਦੀ ਜਾਂਚ ਹੋਣੀ ਚਾਹੀਦੀ ਹੈ। ਉਨ੍ਹਾਂ ਆਖਿਆ ਕਿ ਹੋ ਸਕਦਾ ਹੈ ਕਿ ਸੈਂਕੜੇ ਸਮਰਥਕ ਇਸ ਲਈ ਹੀ ਦੂਜੀ ਮੈਂਬਰਸਿ਼ਪ ਖਰੀਦੀ ਜਾ ਰਹੇ ਹੋਣ ਕਿ ਸ਼ਾਇਦ ਉਨ੍ਹਾਂ ਦੀ ਪਹਿਲੀ ਖਰੀਦੀ ਮੈਂਬਰਸਿ਼ਪ ਕੰਮ ਨਾ ਕਰੇ।
ਉਨ੍ਹਾਂ ਲਿਖਿਆ ਕਿ ਸਾਡੀ ਕੈਂਪੇਨ ਨੂੰ ਵੱਡੀ ਗਿਣਤੀ ਵਿੱਚ ਸਿ਼ਕਾਇਤਾਂ ਮਿਲੀਆਂ ਹਨ ਕਿ ਉਹ ਪਹਿਲਾਂ ਹੀ ਮੈਂਬਰਸਿ਼ਪ ਖਰੀਦ ਚੁੱਕੇ ਹਨ ਪਰ ਰਸਮੀ ਤੌਰ ਉੱਤੇ ਭੇਜੀ ਗਈ ਚੇਤਾਵਨੀ ਵਰਗੀ ਈਮੇਲ ਕਾਰਨ ਉਹ ਮੁੜ ਮੈਂਬਰਸਿ਼ਪ ਖਰੀਦਣ ਲਈ ਮਜਬੂਰ ਹਨ।ਗੁੰਮਰਾਹ ਹੋਣ ਕਾਰਨ ਮੈਂਬਰਾਂ ਵਿੱਚ ਰੋਸ ਵੀ ਪਾਇਆ ਜਾ ਰਿਹਾ ਹੈ।
ਇਸੇ ਦੌਰਾਨ ਜੀਨ ਚਾਰੈਸਟ ਦੀ ਟੀਮ ਵੱਲੋਂ ਵੀ ਸਿ਼ਕਾਇਤੀ ਕੀਤੀ ਗਈ ਤੇ ਉਨ੍ਹਾਂ ਪੌਲੀਏਵਰ ਦੀ ਟੀਮ ਕੋਲੋਂ ਅੰਤਰਿਮ ਮੈਂਬਰਸਿ਼ਪ ਦੇ ਸਹੀ ਅੰਕੜੇ ਜਾਰੀ ਕਰਨ ਦੀ ਮੰਗ ਵੀ ਕੀਤੀ।