ਫਗਵਾੜਾ, 24 ਮਈ (ਪੋਸਟ ਬਿਊਰੋ)- ਪੰਜਾਬ ਵਿੱਚ ਆਏ ਦਿਨ ਲੋਕਾਂ ਨੂੰ ਫੋਨ ਕਰ ਕੇ ਲੱਖਾਂ ਦੀ ਠੱਗੀ ਕੀਤੀ ਜਾ ਰਹੀ ਹੈ। ਇਸੇ ਤਰ੍ਹਾਂ ਦਾ ਇੱਕ ਕੇਸ ਫਗਵਾੜਾ ਦੇ ਹਦੀਆਬਾਦ ਇਲਾਕੇ ਵਿੱਚ ਹੋ ਗਿਆ ਹੈ। ਇੱਕ ਠੱਗ ਨੇ ਪੀੜਤ ਨੂੰ ਆਪਣਾ ਰਿਸ਼ਤੇਦਾਰ ਦੱਸ ਕੇ ਉਸ ਕੋਲੋਂ ਦੋ ਲੱਖ ਰੁਪਏ ਠੱਗ ਲਏ।
ਪੀੜਤ ਵਿਮਲ ਕੁਮਾਰ ਨੇ ਦੱਸਿਆ ਕਿ ਪਰਸੋਂ ਉਨ੍ਹਾਂ ਨੂੰ ਯੂ ਕੇ ਇੰਗਲੈਂਡ ਦੇ ਨੰਬਰ ਤੋਂ ਫੋਨ ਆਇਆ ਕਿ ਮੈਂ ਤੁਹਾਡਾ ਰਿਸ਼ਤੇਦਾਰ ਬੋਲ ਰਿਹਾ ਹਾਂ। ਵਿਮਲ ਨੇ ਕਿਹਾ ਕਿ ਕੀ ਉਹ ਮੇਰੇ ਸਾਂਢੂ ਦਾ ਦੋਸਤ ਬੋਲਦਾ ਹੈ ਤਾਂ ਠੱਗ ਬੋਲਿਆ ਕਿ ਹਾਂ ਮੈਂ ਸਾਂਢੂ ਦਾ ਦੋਸਤ ਬੋਲਦਾ ਹਾਂ। ਉਸ ਨੇ ਕਿਹਾ ਕਿ ਉਹ ਇੰਡੀਆ ਆ ਰਿਹਾ ਹੈ। ਕੁਝ ਪੈਸੇ ਭੇਜਣੇ ਹਨ। ਆਪਣਾ ਖਾਤਾ ਨੰਬਰ ਭੇਜ ਦਿਓ। ਇਸ ਉੱਤੇ ਵਿਮਲ ਨੇ ਖਾਤਾ ਨੰਬਰ ਉਸ ਨੂੰ ਭੇਜ ਦਿੱਤਾ। ਠੱਗ ਨੇ 23 ਲੱਖ ਰੁਪਏ ਜਮ੍ਹਾ ਕਰਨ ਦੀ ਜਾਅਲੀ ਰਸੀਦ ਉਸ ਨੂੰ ਭੇਜ ਦਿੱਤੀ। ਪੀੜਤ ਨੇ ਬੈਂਕ ਜਾ ਕੇ ਪਤਾ ਕੀਤਾ ਤਾਂ ਖਾਤੇ ਵਿੱਚ ਕੋਈ ਪੈਸਾ ਨਹੀਂ ਸੀ। ਠੱਗ ਦਾ ਫਿਰ ਫੋਨ ਆਇਆ ਕਿ ਪੈਸੇ ਆਉਣ ਵਿੱਚ ਦੇਰ ਲੱਗੇਗੀ। ਤੁਸੀਂ ਇੰਝ ਕਰੋ ਕਿ ਤੁਸੀਂ ਦੋ ਲੱਖ ਰੁਪਏ ਮੈਨੂੰ ਭੇਜ ਦਿਓ।ਉਨ੍ਹਾਂ ਦੱਸਿਆ ਕਿ ਡੇਢ ਲੱਖ ਰੁਪਏ ਉਸ ਨੇ ਆਪਣੇ ਦੋਸਤ ਕੋਲੋਂ ਫੜ ਕੇ ਉਸ ਨੂੰ ਭੇਜ ਦਿੱਤੇ ਤੇ ਪੰਜਾਹ ਹਜ਼ਾਰ ਰੁਪਏ ਆਪਣੀ ਬੇਟੀ ਦੇ ਖਾਤੇ ਵਿੱਚੋਂ ਉਸ ਨੂੰ ਟਰਾਂਸਫਰ ਕੀਤੇ। ਇਸ ਪਿੱਛੋਂ ਜਦ ਉਸ ਨੂੰ ਫੋਨ ਕੀਤਾ ਤਾਂ ਠੱਗ ਨੇ ਫੋਨ ਨਹੀਂ ਚੁੱਕਿਆ। ਇਸ ਨਾਲ ਉਸ ਨੂੰ ਠੱਗੀ ਦਾ ਅਹਿਸਾਸ ਹੋਇਆ। ਉਕਤ ਵਿਅਕਤੀ ਕੋਲ ਉਸ ਦੀ ਬੇਟੀ ਦਾ ਮੋਬਾਈਲ ਨੰਬਰ ਵੀ ਗਿਆ ਤਾਂ ਉਸ ਨੇ ਕਿਹਾ ਕਿ ਮੈਨੂੰ ਪਰੇਸ਼ਾਨ ਨਾ ਕਰੋ, ਨਹੀਂ ਤਾਂ ਤੁਹਾਡੀ ਬੇਟੀ ਦੀ ਫੋਟੋ ਸੋਸ਼ਲ ਮੀਡੀਆ ਉੱਤੇ ਵਾਇਰਲ ਕਰ ਦਿਆਂਗਾ। ਉਸ ਦਾ ਫੋਨ ਉਸ ਨੇ ਹੈਕ ਕਰ ਲਿਆ ਹੈ।