ਡੇਰਾ ਬਾਬਾ ਨਾਨਕ, 23 ਮਈ (ਪੋਸਟ ਬਿਊਰੋ)- ਗੋਭੀ ਦੀ ਬਿਜਾਈ ਕਰਨ ਵਿੱਚ ਪੰਜਾਬ, ਜੰਮੂ ਅਤੇ ਹਿਮਾਚਲ ਵਿੱਚ ਡੇਰਾ ਬਾਬਾ ਨਾਨਕ ਮਸ਼ਹੂਰ ਹੈ, ਜਿੱਥੇ ਸਾਲ ਭਰ ਲਗਾਤਾਰ ਗੋਭੀ ਦੀ ਖੇਤੀ ਕਰ ਕੇ ਗੁਆਂਢੀ ਰਾਜਾਂ ਨੂੰ ਸਪਲਾਈ ਕੀਤੀ ਜਾਂਦੀ ਹੈ, ਪਰ ਇਸ ਵਾਰ ਦਰਜਨਾਂ ਕਿਸਾਨਾਂ ਦੀ ਕਰੀਬ ਸੱਠ ਕਿੱਲੇ ਗੋਭੀ ਨੂੰ ਫੁੱਲ ਨਾ ਪੈਣ ਕਾਰਨ ਕਿਸਾਨ ਗੋਭੀ ਨੂੰ ਖੇਤਾਂ ਵਿੱਚ ਵਾਹ ਰਹੇ ਹਨ ਅਤੇ ਉਨ੍ਹਾ ਦਾ ਇਸ ਵਾਰ ਲੱਖਾਂ ਰੁਪਏ ਦਾ ਨੁਕਸਾਨ ਹੋਇਆ ਹੈ।
ਗੋਭੀ ਵਾਲੇ ਕਿਸਾਨ ਗੁਰਨਾਮ ਸਿੰਘ ਪੱਖੋਕੇ ਟਾਹਲੀ ਸਾਹਿਬ, ਤਰਲੋਕ ਸਿੰਘ ਡੇਰਾ ਬਾਬਾ ਨਾਨਕ ਅਤੇ ਹੋਰ ਲੋਕ ਆਪਣੇ ਪਿੰਡਾਂ ਵਿੱਚ ਸਾਰਾ ਸਾਲ ਲਗਾਤਾਰ ਵੱਖ-ਵੱਖ ਮੌਸਮਾਂ ਵਿੱਚ ਆਪਣੇ ਖੇਤਾਂ ਵਿੱਚ ਗੋਭੀ ਬੀਜਦੇ ਹਨ। ਇਸ ਵਾਰ ਗੋਭੀ ਵਾਲੇ ਕਿਸਾਨਾਂ ਨੇ ਜਨਵਰੀ ਦੇ ਆਖਰੀ ਹਫਤੇ ਅਤੇ ਫਰਵਰੀ ਦੇ ਪਹਿਲੇ ਹਫਤੇਗਰਮੀ ਦੇ ਮੌਸਮ ਵਾਲੀ ਗੋਭੀ ਦੀ ਬਿਜਾਈ ਕੀਤੀ ਸੀ ਅਤੇ ਇਸ ਦੌਰਾਨ ਉਨ੍ਹਾਂ ਨੇ ਸੱਤਰ ਹਜ਼ਾਰ ਰੁਪਏ ਪ੍ਰਤੀ ਕਿਲੋ ਗੋਭੀ ਦਾ ਬੀਜ ਖਰੀਦਿਆ ਸੀ। ਉਨ੍ਹਾਂ ਦੱਸਿਆ ਕਿ ਇਸ ਵਾਰ ਦਾ ਬੀਜ ਘਟੀਆ ਹੋਣ ਕਾਰਨ ਉਕਤ ਪਿੰਡਾਂ ਦੇ ਵੱਖ-ਵੱਖ ਕਿਸਾਨਾਂ ਦੀ ਕਰੀਬ ਸੱਠ ਕਿੱਲੇ ਗੋਭੀ ਨੂੰ ਫੁੱਲ ਨਹੀਂ ਪਏ। ਗੁਰਨਾਮ ਸਿੰਘ ਅਤੇ ਉਸ ਦੇ ਸਾਥੀਆਂ ਨੇ ਦੱਸਿਆ ਕਿ ਪਿਛਲੇ ਸਾਲ ਮਈ ਵਿੱਚ ਗੋਭੀ ਦੀ ਕਟਾਈ ਵੱਡੇ ਪੱਧਰ ਉੱਤੇ ਹੋਣ ਕਾਰਨ ਇਸ ਦੀ ਸਪਲਾਈ ਪੰਜਾਬ ਦੀਆਂ ਵੱਖ-ਵੱਖ ਮੰਡੀਆਂ ਦੇ ਨਾਲ ਜੰਮੂ ਤੇ ਹਿਮਾਚਲ ਦੀਆਂ ਮੰਡੀਆਂ ਵਿੱਚ ਵੀ ਕੀਤੀ ਸੀ, ਪਰ ਇਸ ਵਾਰ ਪ੍ਰਤੀ ਏਕੜ ਗੋਭੀ ਤੇ ਪੰਜਾਹ ਹਜ਼ਾਰ ਰੁਪਏ ਖਰਚ ਆਉਣ ਦੇ ਬਾਵਜੂਦ ਫੁੱਲ ਨਹੀਂ ਪਏ। ਉਨ੍ਹਾ ਦੱਸਿਆ ਕਿ ਇਸ ਵਾਰ ਗੋਭੀ ਦਾ ਰੇਟ ਚੰਗਾ ਹੋਣ ਕਾਰਨ ਉਨ੍ਹਾਂ ਨੂੰ ਪ੍ਰਤੀ ਏਕੜ ਦੋ ਤੋਂ ਢਾਈ ਲੱਖ ਰੁਪਏ ਦੀ ਗੋਭੀ ਵਿਕਣ ਦੀ ਆਸ ਸੀ, ਪਰ ਘਟੀਆ ਬੀਜ ਹੋਣ ਕਾਰਨ ਉਨ੍ਹਾਂ ਦੀ ਫਸਲ ਨੂੰ ਫੁੱਲ ਨਾ ਪੈਣ ਕਾਰਨ ਉਹ ਮਜਬੂਰਨ ਖੇਤਾਂ ਵਿੱਚ ਗੋਭੀ ਵਾਹੁਣ ਲੱਗ ਪਏ ਹਨ ਅਤੇ ਬਹੁਤ ਨੁਕਸਾਨ ਹੋਇਆ ਹੈ।