ਟਾਂਡਾ ਉੜਮੁੜ, 18 ਮਈ (ਪੋਸਟ ਬਿਊਰੋ)- ਨੇੜਲੇ ਪਿੰਡ ਅਹੀਆਪੁਰ ਨਾਲ ਸਬੰਧਤ ਪੁਰੀ ਪਰਵਾਰ ਦੀ ਧੀ ਅਮਰੀਕਾ ਵਿੱਚ ਮਿਸ ਇੰਡੀਆ ਕੈਲੇਫੋਰਨੀਆ-2022 ਬਣੀ ਹੈ। ਪਰਸੋਂ ਕੈਲੇਫੋਰਨੀਆ ਦੇ ਮਿਲੀਪਟਸ ਸ਼ਹਿਰ ਵਿੱਚ ਮੁਕਾਬਲੇ ਦੌਰਾਨ ਉਸ ਨੂੰ ਇਸ ਖਿਤਾਬ ਨਾਲ ਨਵਾਜ਼ਿਆ ਗਿਆ ਹੈ।
ਸੱਤ ਸਾਲ ਪਹਿਲਾਂ ਅਮਰੀਕਾ ਜਾ ਵੱਸੇ ਨੀਰਜ ਪੁਰੀ ਅਤੇ ਬਿੰਦੂ ਪੁਰੀ ਨੇ ਆਪਣੀ ਧੀ ਦੀ ਇਸ ਸਫਲਤਾ ਦੇ ਬਾਰੇ ਦੱਸਿਆ ਕਿ ਉਹ ਮਾਈ ਡ੍ਰੀਮ ਟੀ ਵੀ ਅਤੇ ਮਾਈ ਡ੍ਰੀਮ ਗਲੋਬਲ ਫਾਊਂਡੇਸ਼ਨ ਵੱਲੋਂ ਫਾਊਂਡਰ ਰਸ਼ਮੀ ਬੇਦੀ ਅਤੇ ਸਟੇਟ ਡਾਇਰੈਕਟਰ ਕੈਲੇਫੋਰਨੀਆ ਦਿਵਿਆ ਮੋਵਾਰ ਦੀ ਅਗਵਾਈ ਵਿੱਚ ਕਰਵਾਏ ਮੁਕਾਬਲੇ ਦੇ ਫਾਈਨਲ ਵਿੱਚ ਗਈ ਤੇ 22 ਮੁਕਾਬਲੇਬਾਜ਼ਾਂ ਨੂੰ ਪਛਾੜ ਕੇ ਖਿਤਾਬ ਆਪਣੇ ਨਾਂਅ ਕੀਤਾ। ਉਸ ਨੂੰ ਬਾਲੀਵੁੱਡ ਅਭਿਨੇਤਰੀ ਸ਼ੀਬਾ ਸਬੀਰ ਨੇ ਸਨਮਾਨਤ ਕੀਤਾ ਹੈ। ਪੁਰੀ ਜੋੜੇ ਨੇ ਦੱਸਿਆ ਕਿ ਸੇਜਲ ਆਪਣੇ ਭਰਾ ਹਾਰਦਿਕ ਨਾਲ ਦਸੂਹੇ ਦੇ ਕੈਂਬਰਿਜ਼ ਸਕੂਲ ਵਿੱਚ ਛੇਵੀਂ ਤਕ ਪੜ੍ਹਾਈ ਕਰ ਕੇ ਉਸ ਨਾਲ ਅਮਰੀਕਾ ਆਈ ਸੀ ਤੇ ਅੱਜਕੱਲ੍ਹ ਡੈਂਟਿਸਟ ਦੀ ਪੜ੍ਹਾਈ ਕਰ ਰਹੀ ਹੈ। ਸੇਜਲ ਨੇ ਦੱਸਿਆ ਕਿ ਉਸ ਨੇ ਪੰਜਾਬੀ ਸਟਾਰ ਕਲਾਕਾਰ ਦਲਜੀਤ ਦੁਸਾਂਝ ਦੇ ਗੀਤ ਵਿੱਚ ਐਕਟਿੰਗ ਕੀਤੀ ਤੇ ਉਹ ਮਾਡਲਿੰਗ ਵਿੱਚ ਨਾਂਅ ਕਮਾਉਣ ਦੇ ਨਾਲ ਬਾਲੀਵੁੱਡ ਵਿੱਚ ਕੰਮ ਕਰਨ ਦੇ ਸੁਫਨੇ ਨੂੰ ਪੂਰਾ ਕਰਨ ਲੱਗੀ ਹੋਈ ਹੈ ਅਤੇ ਇਸ ਸਫਲਤਾ ਨਾਲ ਉਸ ਵਿੱਚ ਨਵੀਂ ਊਰਜਾ ਦਾ ਸੰਚਾਰ ਹੋਇਆ ਹੈ।