ਅੰਮ੍ਰਿਤਸਰ, 17 ਮਈ (ਪੋਸਟ ਬਿਊਰੋ)- ਭਾਰਤ ਨੇ ਅਫ਼ਗਾਨਿਸਤਾਨ ਦੇ ਨਾਗਰਿਕਾਂ ਦੀ ਮਦਦ ਲਈ ਅਟਾਰੀ ਸਰਹੱਦ ਤੋਂ ਵਾਇਆ ਪਾਕਿਸਤਾਨ ਕੱਲ੍ਹ ਚੌਥੀ ਖੇਪ ਦੇ ਕਣਕ ਨਾਲ ਭਰੇ 40 ਟਰੱਕ ਅਫ਼ਗ਼ਾਨਿਸਤਾਨ ਭੇਜੇ ਹਨ। ਇਹ ਕਣਕ ਲੈਣ ਲਈ ਕੱਲ੍ਹ ਸਵੇਰੇ ਭਾਰਤੀ ਅਟਾਰੀ ਸਰਹੱਦ ਉੱਤੇ ਪੁੱਜੇ ਅਫ਼ਗ਼ਾਨੀ ਟਰੱਕਾਂ ਵਿੱਚ ਕਣਕ ਦੀ ਲਦਾਈ ਕਰ ਕੇ ਕੱਲ੍ਹ ਸ਼ਾਮ ਅਫ਼ਗ਼ਾਨਿਸਤਾਨੀ ਟਰੱਕਾਂ ਨੂੰ ਹਰੀ ਝੰਡੀ ਲਹਿਰਾ ਕੇ ਰਵਾਨਾ ਕੀਤਾ ਗਿਆ।
ਇਸ ਬਾਰੇ ਭਾਰਤ ਦੇ ਕਸਟਮ ਕਮਿਸ਼ਨਰ ਨੇ ਦੱਸਿਆ ਕਿ ਭਾਰਤ ਸਰਕਾਰ ਨੇਦੋ ਮਹੀਨੇ ਪਹਿਲਾਂ 22 ਫਰਵਰੀ ਨੂੰ ਅਫ਼ਗ਼ਾਨਿਸਤਾਨ ਸਰਕਾਰ ਦੀ ਮਦਦ ਲਈ ਉਥੋਂ ਦੇ ਨਾਗਰਿਕਾਂ ਲਈ ਤੋਹਫ਼ੇ ਵਜੋਂ ਪਹਿਲੀ ਖੇਪ ਕਣਕ ਭੇਜੀ ਸੀ ਉਸੇ ਲੜੀ ਹੇਠ ਕੱਲ੍ਹ ਚੌਥੀ ਖੇਪ ਦੇ ਭਰੇ 40 ਵੱਡੇ ਟਰੱਕ, ਜਿਨ੍ਹਾਂ ਵਿੱਚ ਦੋ ਹਜ਼ਾਰ ਮੀਟਰਕ ਟਨ ਕਣਕ ਹੈ, ਅਫ਼ਗ਼ਾਨਿਸਤਾਨ ਨੂੰ ਭੇਜੇ ਜਾ ਰਹੇ ਹਨ।ਉਨ੍ਹਾਂ ਦੱਸਿਆ ਕਿ ਅਫ਼ਗ਼ਾਨਿਸਤਾਨ ਵੱਲੋਂ ਭੇਜੇ ਜਾ ਰਹੇ ਟਰੱਕਾਂ ਵਿੱਚ ਲੋਡ ਕਰ ਕੇ ਆਉਣ ਵਾਲੇ ਦਿਨਾਂ ਵਿੱਚ 20 ਹਜ਼ਾਰ ਮੀਟਰਕ ਟਨ ਕਣਕ ਹੋਰ ਭੇਜੀ ਜਾਵੇਗੀ।