ਐਡਮੰਟਨ, 12 ਮਈ (ਪੋਸਟ ਬਿਊਰੋ) : ਕੰਜ਼ਰਵੇਟਿਵ ਲੀਡਰਸਿ਼ਪ ਦੀ ਦੌੜ ਵਿੱਚ ਸ਼ਾਮਲ ਉਮੀਦਵਾਰਾਂ ਦਰਮਿਆਨ ਬੁੱਧਵਾਰ ਨੂੰ ਪਹਿਲੀ ਰਸਮੀ ਬਹਿਸ ਹੋਈ।ਇਨ੍ਹਾਂ ਉਮੀਦਵਾਰਾਂ ਵਿੱਚ ਡੂੰਘੀਆਂ ਵੰਡੀਆਂ ਸਾਫ ਨਜ਼ਰ ਆਈਆਂ।
ਐਡਮੰਟਨ ਕਨਵੈਂਸ਼ਨ ਸੈਂਟਰ ਵਿੱਚ 1000 ਤੋਂ ਵੱਧ ਲੋਕ ਇਨ੍ਹਾਂ ਉਮੀਦਵਾਰਾਂ ਦੇ ਵਿਚਾਰ ਜਾਨਣ ਲਈ ਇੱਕਠੇ ਹੋਏ ਸਨ।ਸੱਭ ਤੋਂ ਵੱਧ ਤਾੜੀਆਂ ਲੰਮੇਂ ਸਮੇਂ ਤੋਂ ਚੱਲੇ ਆ ਰਹੇ ਕੰਜ਼ਰਵੇਟਿਵ ਐਮਪੀ ਪਿਏਰ ਪੌਲੀਏਵਰ ਲਈ ਵੱਜੀਆਂ। ਉਨ੍ਹਾਂ ਆਖਿਆ ਕਿ ਉਹ ਦੇਸ਼ ਦੇ ਲੋਕਾਂ ਨੂੰ ਆਪਣੀਆਂ ਜਿ਼ੰਦਗੀਆਂ ਦੀ ਕਮਾਨ ਖੁਦ ਸਾਂਭਣ ਦੀ ਆਜ਼ਾਦੀ ਦੇਣਾ ਚਾਹੁੰਦੇ ਹਨ।ਉਨ੍ਹਾਂ ਆਖਿਆ ਕਿ ਉਹ ਮਹਿੰਗਾਈ ਨਾਲ ਵੀ ਲੜਨਾ ਚਾਹੁੰਦੇ ਹਨ।ਬਹਿਸ ਦੌਰਾਨ ਉਨ੍ਹਾਂ ਬੈਂਕ ਆਫ ਕੈਨੇਡਾ ਦੇ ਗਵਰਨਰ ਟਿੱਫ ਮੈਕਲਮ ਨੂੰ ਲੰਮੇਂ ਹੱਥੀਂ ਲੈਂਦਿਆਂ ਆਖਿਆ ਕਿ ਉਹ ਸੱਭ ਤੋਂ ਪਹਿਲਾਂ ਉਨ੍ਹਾਂ ਨੂੰ ਹਟਾਉਣ ਦਾ ਕੰਮ ਕਰਨਗੇ ਕਿਉਂਕਿ ਮਹਿੰਗਾਈ ਦੀ ਦਰ ਕਈ ਦਹਾਕਿਆਂ ਵਿੱਚ ਇਸ ਸਮੇਂ ਸੱਭ ਤੋਂ ਜਿ਼ਆਦਾ ਹੈ।
ਕਿਊਬਿਕ ਦੇ ਸਾਬਕਾ ਪ੍ਰੀਮੀਅਰ ਜੀਨ ਚਾਰੈਸਟ ਨੇ ਆਖਿਆ ਕਿ ਐਮਪੀ ਦੀਆਂ ਟਿੱਪਣੀਆਂ ਬੜੀਆਂ ਗੈਰਜਿ਼ੰਮੇਵਰਾਨਾ ਹਨ ਤੇ ਉਨ੍ਹਾਂ ਵੱਲੋਂ ਸਿਸਟਮ ਉੱਤੇ ਬੇਭਰੋਸਗੀ ਪ੍ਰਗਟਾਈ ਗਈ ਹੈ। ਦੇਸ਼ ਭਰ ਵਿੱਚ ਹਜ਼ਾਰਾਂ ਦੀ ਭੀੜ ਇੱਕਠੀ ਕਰਨ ਵਾਲੇ ਪੌਲੀਏਵਰ ਉੱਤੇ ਵੱਖ ਵੱਖ ਉਮੀਦਵਾਰਾਂ ਵੱਲੋਂ ਗਰਭਪਾਤ ਬਾਰੇ ਉਨ੍ਹਾਂ ਦੇ ਵਿਚਾਰਾਂ ਤੇ ਕ੍ਰਿਪਟੋਕਰੰਸੀ ਬਿਟਕੁਆਇਨ ਦੀ ਪੈਰਵੀ ਕਰਨ ਕਾਰਨ ਵਾਰੀ ਵਾਰੀ ਉਂਗਲਾਂ ਉਠਾਈਆਂ ਗਈਆਂ। ਚਾਰੈਸਟ ਨੇ ਪਿੱਛੇ ਜਿਹੇ ਚੁਣੀ ਗਈ ਓਨਟਾਰੀਓ ਦੀ ਐਮਪੀ ਲੈਸਲਿਨ ਲੁਈ ਸਮੇਤ ਪੌਲੀਏਵਰ ਉੱਤੇ ਕੈਨੇਡੀਅਨਜ਼ ਨੂੰ ਡਿਜੀਟਲ ਕਰੰਸੀ ਵਿੱਚ ਨਿਵੇਸ਼ ਕਰਨ ਲਈ ਉਤਸਾਹਿਤ ਕਰਨ ਦੇ ਦੋਸ਼ ਲਾਏ।
ਬਰੈਂਪਟਨ ਦੇ ਮੇਅਰ ਪੈਟ੍ਰਿਕ ਬ੍ਰਾਊਨ ਨੇ ਆਖਿਆ ਕਿ ਮੈਜਿਕ ਇੰਟਰਨੈੱਟ ਮਨੀ ਜਿਵੇਂ ਕਿ ਬਿਟਕੁਆਇਨ ਕਾਰਨ ਕਾਫੀ ਉਤਰਾਅ ਚੜ੍ਹਾਅ ਆ ਰਹੇ ਹਨ ਤੇ ਪੌਲੀਏਵਰ ਨੂੰ ਕੈਨੇਡਾ ਦੇ ਕਮਜ਼ੋਰ ਨਿਵੇਸ਼ਕਾਂ ਨੂੰ ਆਪਣੀ ਮਿਹਨਤ ਦੀ ਕਮਾਈ ਇਸ ਪਾਸੇ ਲਾਉਣ ਲਈ ਨਹੀਂ ਆਖਣਾ ਚਾਹੀਦਾ।ਜਵਾਬ ਵਿੱਚ ਪੌਲੀਏਵਰ ਨੇ ਆਖਿਆ ਕਿ ਉਹ ਕੈਨੇਡੀਅਨਜ਼ ਨੂੰ ਬਿਟਕੁਆਇਨ ਵਿੱਚ ਨਿਵੇਸ਼ ਕਰਨ ਲਈ ਹੱਲਾਸ਼ੇਰੀ ਨਹੀਂ ਦੇ ਰਹੇ ਪਰ ਨਿਵੇਸ਼ਕਾਂ ਨੂੰ ਇਹ ਹੱਕ ਹੋਣਾ ਚਾਹੀਦਾ ਹੈ ਕਿ ਉਨ੍ਹਾਂ ਆਪਣਾ ਪੈਸਾ ਕਿੱਥੇ ਖਰਚ ਕਰਨਾ ਹੈ।
ਪੌਲੀਏਵਰ ਨੇ ਆਖਿਆ ਕਿ ਉਨ੍ਹਾਂ ਦੀ ਅਗਵਾਈ ਵਾਲੀ ਸਰਕਾਰ ਗਰਭਪਾਤ ਤੱਕ ਪਹੁੰਚ ਉੱਤੇ ਪਾਬੰਦੀ ਸਬੰਧੀ ਕਾਨੂੰਨ ਨਾ ਹੀ ਪੇਸ਼ ਕਰੇਗੀ ਤੇ ਨਾ ਹੀ ਪਾਸ ਕਰੇਗੀ।ਚਾਰੈਸਟ ਨੇ ਆਖਿਆ ਕਿ ਉਹ ਗਰਭਪਾਤ ਸਬੰਧੀ ਅਧਿਕਾਰਾਂ ਦੇ ਸਮਰਥਕ ਹਨ।