ਓਟਵਾ, 8 ਮਈ (ਪੋਸਟ ਬਿਊਰੋ) : ਫਾਰਮਾਸੇਵ ਐਡਵਾਂਸਡ ਰਲੀਫ ਆਈ ਡਰੌਪਸ ਅਤੇ ਕੌਂਪਲੀਮੈਂਟਸ ਐਡਵਾਂਸਡ ਰਲੀਫ ਆਈ ਡਰੌਪਸ ਦੇ ਇੱਕ ਇੱਕ ਲੌਟ ਨੂੰ ਪੈਕਿੰਗ ਦੀ ਗਲਤੀ ਕਾਰਨ ਵਾਪਿਸ ਮੰਗਵਾ ਲਿਆ ਗਿਆ ਹੈ।
ਹੈਲਥ ਕੈਨੇਡਾ ਦਾ ਕਹਿਣਾ ਹੈ ਕਿ ਇਨ੍ਹਾਂ ਸ਼ੀਸ਼ੀਆਂ ਵਿੱਚੋਂ ਕੁੱਝ ਵੀ ਅਜਿਹੀ ਸਮੱਗਰੀ ਸੀ ਜਿਹੜੀ ਲੇਬਲ ਉੱਤੇ ਨਹੀਂ ਸੀ ਦਰਜ। ਏਜੰਸੀ ਨੇ ਆਖਿਆ ਕਿ ਪ੍ਰਭਾਵਿਤ ਸ਼ੀਸ਼ੀਆਂ ਵਿੱਚ ਨੈਫਾਜ਼ੋਲੀਨ ਐਚਸੀਆਈ ਜਾਂ ਗਲਿਸਰੀਨ ਹੋ ਸਕਦੀ ਹੈ, ਜਿਨ੍ਹਾਂ ਕਾਰਨ ਐਲਰਜੀ ਹੋ ਸਕਦੀ ਸੀ।ਇਹ ਐਲਰਜੀ ਮੁੱਖ ਤੌਰ ਉੱਤੇ ਧੱਫੜ, ਖਾਜ ਜਾਂ ਸੋਜ਼ ਆਦਿ ਦੇ ਰੂਪ ਵਿੱਚ ਚਿਹਰੇ, ਜੀਭ ਤੇ ਗਲੇ ਵਿੱਚ ਹੋ ਸਕਦੀ ਸੀ।
ਵਾਪਿਸ ਮੰਗਵਾਈਆਂ ਗਈਆਂ ਸ਼ੀਸ਼ੀਆਂ ਉੱਤੇ ਲੌਟ ਨੰਬਰ ਏਆਰ 21 ਸੀ 03 ਜਾਂ ਆਰਐਲ 21 ਡੀ 01 ਲਿਖਿਆ ਹੋ ਸਕਦਾ ਹੈ।ਟੇਵਾ ਕੈਨੇਡਾ ਲਿਮਟਿਡ ਦੀਆਂ ਇਹ ਬੋਤਲਾਂ ਆਰਜ਼ੀ ਤੌਰ ਉੱਤੇ ਅੱਖਾਂ ਦੀ ਲਾਲੀ ਜਾਂ ਮਾਮੂਲੀ ਜਲਣ, ਡਰਾਈਨੈੱਸ ਤੇ ਖਾਜ ਆਦਿ ਤੋਂ ਰਾਹਤ ਦੇਣ ਲਈ ਵਰਤੀਆਂ ਜਾਂਦੀਆਂ ਹਨ। ਇਨ੍ਹਾਂ ਦੀ ਵਰਤੋਂ ਬਾਲਗਾਂ ਤੇ ਛੇ ਸਾਲ ਤੋਂ ਉੱਪਰ ਉਮਰ ਦੇ ਬੱਚਿਆਂ ਲਈ ਕਰਨ ਦੀ ਹਦਾਇਤ ਲੇਬਲ ਉੱਤੇ ਦਿੱਤੀ ਗਈ ਹੈ।