ਓਟਵਾ, 5 ਮਈ (ਪੋਸਟ ਬਿਊਰੋ) : ਟੋਰੀ ਲੀਡਰਸਿ਼ਪ ਦੌੜ ਵਿੱਚ ਸ਼ਾਮਲ ਕੰਜ਼ਰਵੇਟਿਵ ਐਮਪੀ ਪਿਏਰ ਪੌਲੀਏਵਰ ਤੇ ਕਿਊਬਿਕ ਦੇ ਸਾਬਕਾ ਪ੍ਰੀਮੀਅਰ ਜੀਨ ਚਾਰੈਸਟ ਨੇ ਪਹਿਲੀ ਗੈਰ ਰਸਮੀ ਬਹਿਸ ਵਿੱਚ ਇੱਕ ਦੂਜੇ ਦੇ ਸਿਆਸੀ ਰਿਕਾਰਡ ਉੱਤੇ ਜੰਮ ਕੇ ਧਾਵਾ ਬੋਲਿਆ।
ਪੌਲੀਏਵਰ, ਕੈਨੇਡੀਅਨਜ਼ ਨੂੰ ਵਧੇਰੇ ਆਜ਼ਾਦੀ ਦੇਣ ਦੇ ਵਾਅਦੇ ਨਾਲ ਆਪਣੀ ਚੋਣ ਮੁਹਿੰਮ ਚਲਾ ਰਹੇ ਹਨ। ਦੇਸ਼ ਭਰ ਵਿੱਚ ਉਨ੍ਹਾਂ ਵੱਲੋਂ ਕੀਤੀਆਂ ਜਾ ਰਹੀਆਂ ਰੈਲੀਆਂ ਵਿੱਚ ਹਜ਼ਾਰਾਂ ਦੀ ਗਿਣਤੀ ਵਿੱਚ ਲੋਕ ਜੁਟ ਰਹੇ ਹਨ। ਕੰਜ਼ਰਵੇਟਿਵ ਸਮਰਥਕਾਂ ਨਾਲ ਭਰੇ ਕਮਰੇ ਵਿੱਚ ਛੇ ਉਮੀਦਵਾਰਾਂ ਵਿੱਚੋਂ ਹਾਜ਼ਰ ਹੋਏ ਪੰਜ ਉਮੀਦਵਾਰਾਂ ਦਰਮਿਆਨ ਚੱਲੀ ਬਹਿਸ ਵਿੱਚ ਪੌਲੀਏਵਰ ਨੇ ਚਾਰੈਸਟ ਉੱਤੇ ਨਿਸ਼ਾਨਾ ਸਾਧੀ ਰੱਖਿਆ।
ਇੱਕ ਵਾਰੀ ਕਿਊਬਿਕ ਦੀ ਲਿਬਰਲ ਪਾਰਟੀ ਦੀ ਅਗਵਾਈ ਕਰਨ ਵਾਲੇ ਚਾਰੈਸਟ ਨੂੰ ਓਟਵਾ ਏਰੀਆ ਨਾਲ ਸਬੰਧਤ ਐਮਪੀ ਪੌਲੀਏਵਰ ਨੇ ਵਾਰੀ ਵਾਰੀ ਲਿਬਰਲ ਆਖਿਆ। ਚਾਰੈਸਟ ਨੇ ਆਪਣੇ ਰਿਕਾਰਡ ਨੂੰ ਸਾਫ ਸੁਥਰਾ ਦੱਸਦਿਆਂ ਆਖਿਆ ਕਿ ਕਿਊਬਿਕ ਵਿੱਚ ਉਹੀ ਸਨ ਜਿਨ੍ਹਾਂ ਨੇ ਇਨਕਮ ਟੈਕਸ ਵਿੱਚ ਕਟੌਤੀ ਕੀਤੀ ਤੇ ਕ੍ਰੈਡਿਟ ਰੇਟਿੰਗ ਏਜੰਸੀ ਨੇ ਅਸਲ ਵਿੱਚ ਇਹ ਆਖਿਆ ਸੀ ਕਿ ਵੱਡੇ ਮੰਦਵਾੜੇ ਵਿੱਚੋਂ ਨਿਕਲਣ ਲਈ ਕਿਊਬਿਕ ਵਾਸੀਆਂ ਦੀ ਹੋਰਨਾਂ ਪ੍ਰੋਵਿੰਸਾਂ ਦੇ ਮੁਕਾਬਲੇ ਅਸੀਂ ਬਿਹਤਰ ਮਦਦ ਕੀਤੀ।
ਇਸ ਉੱਤੇ ਪੌਲੀਏਵਰ ਨੇ ਆਖਿਆ ਕਿ ਚਾਰੈਸਟ ਨੇ ਕਈ ਹੋਰ ਟੈਕਸਾਂ ਵਿੱਚ ਵਾਧਾ ਕੀਤਾ, ਜਿਨ੍ਹਾਂ ਵਿੱਚ ਗੈਸ ਟੈਕਸ ਤੇ ਸੇਲਜ਼ ਟੈਕਸ ਮੁੱਖ ਹਨ। ਉਨ੍ਹਾਂ ਆਖਿਆ ਕਿ ਪ੍ਰੀਮੀਅਰ ਰਹਿੰਦਿਆਂ ਚਾਰੈਸਟ ਨੇ ਕਿਊਬਿਕ ਨੂੰ ਕਰਜ਼ਈ ਕਰ ਦਿੱਤਾ। ਇੱਕ ਵਾਰੀ ਤਾਂ ਪੌਲੀਏਵਰ ਨੇ ਚਾਰੈਸਟ ਨੂੰ ਅਤੀਤ ਵਿੱਚ ਚੀਨ ਦੀ ਟੈਲੀਕੌਮ ਕੰਪਨੀ ਹੁਆਵੇ ਨਾਲ ਕੀਤੇ ਕੰਮ ਲਈ ਵੀ ਵਾਰੀ ਵਾਰੀ ਸਵਾਲ ਕੀਤੇ। ਉਨ੍ਹਾਂ ਆਖਿਆ ਕਿ ਇਸ ਕੰਪਨੀ ਨਾਲ ਕੰਮ ਕਰਦਿਆਂ ਹੋਇਆਂ ਚਾਰੈਸਟ ਨੂੰ ਕਿੰਨੇ ਪੈਸੇ ਮਿਲੇ ਇਸ ਬਾਰੇ ਉਨ੍ਹਾਂ ਸਾਨੂੰ ਕਦੇ ਨਹੀਂ ਦੱਸਿਆ। ਪੌਲੀਏਵਰ ਨੇ ਆਖਿਆ ਕਿ ਇਹ ਉਹੀ ਕੰਪਨੀ ਹੈ ਜਿਸ ਦੇ ਸਾਫਟਵੇਅਰ ਤੇ ਹਾਰਡਵੇਅਰ ਉੱਤੇ ਫਾਈਵ ਆਈਸ ਦੇਸ਼ਾਂ ਵਿੱਚੋਂ ਚਾਰ ਨੇ ਪਾਬੰਦੀ ਲਾਈ ਹੋਈ ਹੈ। ਉਨ੍ਹਾਂ ਆਖਿਆ ਕਿ ਕਈ ਮਾਮਲਿਆਂ ਵਿੱਚ ਇਹ ਦੋਸ਼ ਹਨ ਕਿ ਆਪਣੇ ਨੈੱਟਵਰਕ ਰਾਹੀਂ ਇਹ ਕੰਪਨੀ ਹੋਰਨਾਂ ਦੇਸ਼ਾਂ ਵਿੱਚ ਜਾਸੂਸੀ ਕਰਦੀ ਹੈ।
ਇਸ ਬਹਿਸ ਦਾ ਆਯੋਜਨ ਕੈਨੇਡਾ ਸਟਰਾਂਗ ਐਂਡ ਫਰੀ ਨੈੱਟਵਰਕ ਪੁਲਿਟੀਕਲ ਐਡਵੋਕੇਸੀ ਗਰੁੱਪ ਵੱਲੋਂ ਕੀਤਾ ਗਿਆ ਸੀ। ਇਸ ਦੌਰਾਨ ਟਰੱਕਰਜ਼ ਦੇ ਕੌਨਵੌਏ ਮੁਜ਼ਾਹਰਿਆਂ, ਕੋਵਿਡ-19 ਵੈਕਸੀਨ ਤੇ ਮਾਸਕ ਸਬੰਧੀ ਨਿਯਮਾਂ ਉੱਤੇ ਵੀ ਬਹਿਸ ਕੀਤੀ ਗਈ।