ਅੰਮ੍ਰਿਤਸਰ, 29 ਅਪ੍ਰੈਲ (ਪੋਸਟ ਬਿਊਰੋ)- ਕਾਊਂਟਰ ਇੰਟੈਲੀਜੈਂਸ ਦੇ ਆਪਰੇਸ਼ਨ ਸੈਲ ਨੇ ਦੋ ਲੜਕਿਆਂ ਦੇ ਨਾਲ ਇੱਕ ਵਿਦਿਆਰਥਣ ਨੂੰ ਛੇ ਕਿਲੋ ਹੈਰੋਇਨ ਸਮੇਤ ਗ੍ਰਿਫਤਾਰ ਕੀਤਾ ਹੈ। ਲੜਕੀ ਸ਼ਹਿਰ ਦੇ ਨਾਮੀ ਕਾਲਜ ਦੀ ਟਾਪਰ ਦੱਸੀ ਜਾ ਰਹੀ ਹੈ। ਟੀਮ ਨੇ ਗੁਪਤ ਸੂਚਨਾ ਉੱਤੇ ਬੁੱਧਵਾਰ ਸ਼ਾਮ ਐਸ਼ਬੈਰੀ ਅਪਾਰਟਮੈਂਟ ਦੇ ਫਲੈਟਾਂ ਉੱਤੇ ਛਾਪਾ ਮਾਰਿਆ ਤਾਂ ਦੋ ਲੜਕਿਆਂ ਤੇ ਇੱਕ ਲੜਕੀ ਨੂੰ ਛੇ ਕਿਲੋਗਰਾਮ ਹੈਰੋਇਨ ਸਮੇਤ ਗ੍ਰਿਫਤਾਰ ਕੀਤਾ ਗਿਆ। ਉਨ੍ਹਾਂ ਦੇ ਕਬਜ਼ੇ ਵਿੱਚੋਂ ਇੱਕ ਫਾਰਚੂਨਰ ਕਾਰ ਵੀ ਬਰਾਮਦ ਹੋਈ। ਲੜਕਿਆਂ ਦੀ ਪਛਾਣ ਦੀਪਕ ਅਤੇ ਮਹਿਕ ਰਾਏ ਪਿੰਡ ਮੁਹਾਵਾ ਥਾਣਾ ਘਰਿੰਡਾ ਜ਼ਿਲ੍ਹਾ ਅੰਮ੍ਰਿਤਸਰ ਅਤੇ ਲੜਕੀ ਦੀ ਪਛਾਣ ਲਵਪ੍ਰੀਤ ਕੌਰ ਵਾਸੀ ਕੋਟਕਪੂਰਾ ਵਜੋਂ ਹੋਈ ਹੈ।
ਦੀਪਕ ਤੇ ਮਹਿਕ ਦੋਵੇਂ ਚਚੇਰੇ ਭਰਾ ਹਨ, ਜਦ ਕਿ ਲਵਪ੍ਰੀਤ ਕੌਰ ਸ਼ਹਿਰ ਦੇ ਇੱਕ ਨਾਮੀ ਕਾਲਜ ਦੀ ਐਮ ਐਸ ਸੀ (ਬਾਇਓਟੈਕ) ਦੀ ਵਿਦਿਆਰਥਣ ਹੈ। ਉਹ ਕਾਲਜ ਦੀ ਟਾਪਰ ਹੈ। ਮਹਿਕ ਆਈਲੈਟਸ ਕਰ ਰਿਹਾ ਹੈ, ਜੋ ਡੇਢ ਸਾਲ ਪਹਿਲਾਂ ਲਵਪ੍ਰੀਤ ਦੇ ਸੰਪਰਕ ਵਿੱਚ ਆਇਆ ਤੇ ਦੋਵਾਂ ਵਿੱਚ ਦੋਸਤੀ ਹੋ ਗਈ। ਇਸ ਤੋਂ ਬਾਅਦ ਇਹ ਤਿੰਨੇ ਹੈਰੋਇਨ ਦੀ ਸਪਲਾਈ ਵਿੱਚ ਲੱਗ ਗਏ। ਦੀਪਕ ਅਤੇ ਮਹਿਕ ਦੋਵੇਂ ਤਿੰਨ-ਚਾਰ ਸਾਲਾਂ ਤੋਂ ਸਮੱਗਲਰਾਂ ਦੇ ਸੰਪਰਕ ਵਿੱਚ ਸਨ। ਇਸ ਸਬੰਧ ਵਿੱਚ ਸਟੇਟ ਸਪੈਸ਼ਲ ਆਪਰੇਸ਼ਨ ਸੈਲ ਵਿੱਚ ਤਿੰਨਾਂ ਖਿਲਾਫ ਕੇਸ ਦਰਜ ਕੀਤਾ ਗਿਆ ਹੈ।