ਕਿਊਬਿਕ, 12 ਜਨਵਰੀ (ਪੋਸਟ ਬਿਊਰੋ) : ਕਿਊਬਿਕ ਸਰਕਾਰ ਵੱਲੋਂ ਗੈਰਵੈਕਸੀਨੇਟਿਡ ਲੋਕਾਂ ਉੱਤੇ ਟੈਕਸ ਲਾਉਣ ਦੀ ਦਿੱਤੀ ਗਈ ਚੇਤਾਵਨੀ ਤੋਂ ਬਾਅਦ ਮੰਗਲਵਾਰ ਨੂੰ ਕੋਵਿਡ-19 ਦੀ ਪਹਿਲੀ ਡੋਜ਼ ਲਵਾਉਣ ਲਈ ਪ੍ਰੋਵਿੰਸ ਦੇ 7000 ਲੋਕਾਂ ਨੇ ਆਪਣੇ ਨਾਂ ਰਜਿਸਟਰ ਕਰਵਾਏ।
ਕਿਊਬਿਕ ਦੇ ਸਿਹਤ ਮੰਤਰੀ ਕ੍ਰਿਸਚੀਅਨ ਡੂਬੇ ਨੇ ਟਵੀਟ ਕਰਕੇ ਦੱਸਿਆ ਕਿ ਵੈਕਸੀਨੇਸ਼ਨ ਕਰਵਾਉਣ ਵਾਲੇ ਐਨੇ ਲੋਕ ਕਈ ਦਿਨਾਂ ਵਿੱਚ ਪਹਿਲੀ ਵਾਰੀ ਅੱਗੇ ਆਏ ਹਨ। ਉਨ੍ਹਾਂ ਇਹ ਵੀ ਦੱਸਿਆ ਕਿ 5000 ਅਪੁਆਇੰਟਮੈਂਟਸ ਸੋਮਵਾਰ ਨੂੰ ਵੀ ਲਈਆਂ ਗਈਆਂ।ਉਨ੍ਹਾਂ ਆਖਿਆ ਕਿ ਇਹ ਕਾਫੀ ਉਤਸ਼ਾਹਵਰਧਕ ਹੈ। ਡੂਬੇ ਨੇ ਆਖਿਆ ਕਿ ਇਹ ਅਪੁਆਇੰਟਮੈਂਟਸ ਸਾਰੇ ਉਮਰ ਵਰਗ ਦੇ ਲੋਕਾਂ ਵੱਲੋਂ ਲਈਆਂ ਗਈਆਂ ਹਨ ਤੇ ਸਿਰਫ ਮੰਗਲਵਾਰ ਨੂੰ ਹੀ 107,000 ਡੋਜ਼ਾਂ ਲਾਈਆਂ ਗਈਆਂ।
ਉਸੇ ਦਿਨ ਹੀ ਕਿਊਬਿਕ ਦੇ ਪ੍ਰੀਮੀਅਰ ਫਰੈਂਕੌਇਸ ਲੀਗਾਲਟ ਨੇ ਐਲਾਨ ਕੀਤਾ ਸੀ ਕਿ ਜਿਹੜੇ ਲੋਕ ਗੈਰ ਮੈਡੀਕਲ ਕਾਰਨਾਂ ਕਾਰਨ ਕੋਵਿਡ-19 ਖਿਲਾਫ ਵੈਕਸੀਨੇਸ਼ਨ ਨਹੀਂ ਲਵਾ ਰਹੇ ਉਨ੍ਹਾਂ ਤੋਂ ਪ੍ਰੋਵਿੰਸ਼ੀਅਲ ਸਰਕਾਰ ਟੈਕਸ ਵਸੂਲ ਕਰੇਗੀ ਉਹ ਵੀ ਵਿਆਜ਼ ਸਮੇਤ।ਬਾਅਦ ਵਿੱਚ ਉਨ੍ਹਾਂ ਇਹ ਵੀ ਆਖਿਆ ਕਿ ਉਹ ਜੁਰਮਾਨਾ ਤੈਅ ਕਰਨ ਲਈ ਆਪਣੇ ਵਿੱਤ ਮੰ਼ਤਰੀ ਤੇ ਲੀਗਲ ਐਡਵਾਈਜ਼ਰ ਤੋਂ ਸਲਾਹ ਲੈ ਰਹੇ ਹਨ। ਪ੍ਰੀਮੀਅਰ 50 ਜਾਂ 100 ਡਾਲਰ ਜੁਰਮਾਨਾਂ ਲਾਉਣ ਤੋਂ ਪਹਿਲਾਂ ਹੀ ਇਨਕਾਰ ਕਰ ਚੁੱਕੇ ਹਨ। ਉਨ੍ਹਾਂ ਆਖਿਆ ਕਿ ਇਹ ਕਾਫੀ ਘੱਟ ਹੈ।