ਓਟਵਾ, 15 ਫਰਵਰੀ (ਪੋਸਟ ਬਿਊਰੋ) : ਕੈਨੇਡਾ ਦੀਆਂ ਕੋਵਿਡ-19 ਵੈਕਸੀਨੇਸ਼ਨ ਦੀਆਂ ਕੋਸਿ਼ਸ਼ਾਂ ਨੂੰ ਇਸ ਹਫਤੇ ਹੁਲਾਰਾ ਮਿਲਣ ਵਾਲਾ ਹੈ। ਇੱਕ ਮਹੀਨੇ ਤੱਕ ਫਾਈਜ਼ਰ-ਬਾਇਓਐਨਟੈਕ ਵੱਲੋਂ ਵੈਕਸੀਨ ਦੀ ਡਲਿਵਰੀ ਵਿੱਚ ਆਈ ਕਮੀ ਕਾਰਨ ਫੈਡਰਲ ਸਰਕਾਰ ਨੇ ਹੁਣ ਇੱਕ ਵਾਰੀ ਫਿਰ ਜਲਦ ਹਾਸਲ ਹੋਣ ਜਾ ਰਹੀ ਵੈਕਸੀਨ ਨੂੰ ਵੰਡਣ ਲਈ ਕਮਰ ਕੱਸ ਲਈ ਹੈ।
ਪਬਲਿਕ ਹੈਲਥ ਏਜੰਸੀ ਆਫ ਕੈਨੇਡਾ ਵੱਲੋਂ ਆਪਣੀ ਵੈੱਬਸਾਈਟ ਉੱਤੇ ਆਖਿਆ ਗਿਆ ਕਿ ਉਨ੍ਹਾਂ ਨੂੰ ਆਸ ਹੈ ਕਿ ਇਸ ਹਫਤੇ ਫਾਈਜ਼ਰ-ਬਾਇਓਐਨਟੈਕ ਦੀਆਂ 335,000 ਡੋਜ਼ਾਂ ਹਾਸਲ ਹੋ ਜਾਣਗੀਆਂ। ਦੂਜੇ ਪਾਸੇ ਕੰਪਨੀ ਦਾ ਕਹਿਣਾ ਹੈ ਕਿ ਇਹ ਅੰਕੜਾ 400,000 ਦੇ ਨੇੜੇ ਤੇੜੇ ਹੋਵੇਗਾ। ਅਜਿਹਾ ਇਸ ਲਈ ਕਿਉਂਕਿ ਹੈਲਥ ਏਜੰਸੀ ਦੇ ਅੰਕੜੇ ਪੰਜ ਡੋਜ਼ਾਂ ਪ੍ਰਤੀ ਵਾਇਲ ਉੱਤੇ ਆਧਾਰਿਤ ਹਨ ਫਿਰ ਵੀ ਫੈਡਰਲ ਸਰਕਾਰ ਨੇ ਪਿੱਛੇ ਜਿਹੇ ਫਾਈਜ਼ਰ ਵੱਲੋਂ  ਕੀਤੀ ਗਈ ਇਹ ਦਰਖੁਆਸਤ ਸਵੀਕਾਰ ਲਈ ਸੀ ਕਿ ਪ੍ਰਤੀ ਵਾਇਲ ਛੇ ਡੋਜ਼ਾਂ ਹਨ।  
ਮਹਾਂਮਾਰੀ ਸੁ਼ਰੂ ਹੋਣ ਤੋਂ ਲੈ ਕੇ ਹੁਣ ਤੱਕ ਕੈਨੇਡਾ ਨੂੰ ਵੈਕਸੀਨ ਦੀ ਇਹ ਸੱਭ ਤੋਂ ਵੱਡੀ ਖੇਪ ਹੋਵੇਗੀ। ਫਾਈਜ਼ਰ ਨੇ ਇੱਕ ਮਹੀਨੇ ਵੈਕਸੀਨ ਦੀ ਸਪਲਾਈ ਵਿੱਚ ਢਿੱਲ ਵਰਤਣ ਤੋਂ ਬਾਅਦ ਹੁਣ ਬੈਲਜੀਅਮ ਵਿੱਚ ਆਪਣੇ ਪਲਾਂਟ ਦਾ ਪਸਾਰ ਕਰ ਲਿਆ ਹੈ ਤੇ ਕੰਪਨੀ ਵੱਲੋਂ ਉਤਪਾਦਨ ਤੇਂ ਕਰਨ ਦਾ ਦਾਅਵਾ ਵੀ ਕੀਤਾ ਗਿਆ ਹੈ। ਕੈਨੇਡਾ ਨੂੰ 18 ਜਨਵਰੀ ਤੋਂ ਪਿਛਲੇ ਹਫਤੇ ਦਰਮਿਆਨ ਫਾਈਜ਼ਰ-ਬਾਇਓਐਨਟੈਕ ਦੀਆਂ 339,000 ਡੋਜ਼ਾਂ ਹੀ ਮਿਲੀਆਂ ਜਦਕਿ ਕਰਾਰ 1·15 ਮਿਲੀਅਨ ਡੋਜ਼ਾਂ ਦਾ ਹੋਇਆ ਸੀ।
ਫਾਈਜ਼ਰ ਵੱਲੋਂ ਵੀ ਮਾਰਚ ਦੇ ਅੰਤ ਤੱਕ 4 ਮਿਲੀਅਨ ਡੋਜ਼ਾਂ ਡਲਿਵਰ ਕਰਨ ਦਾ ਤਹੱਈਆ ਪ੍ਰਗਟਾਇਆ ਗਿਆ ਹੈ। ਪ੍ਰੋਵਿੰਸਾਂ ਤੇ ਟੈਰੇਟਰੀਜ਼ ਵੱਲੋਂ ਵੀ ਇਸ ਨਵੀਂ ਸਪਲਾਈ ਦਾ ਸਵਾਗਤ ਕੀਤਾ ਜਾਵੇਗਾ। ਅੱਜ ਤੱਕ ਕੈਨੇਡਾ ਨੂੰ ਫਾਈਜ਼ਰ ਕੋਲੋਂ 928,000 ਡੋਜ਼ਾਂ ਤੇ ਮੌਡਰਨਾ ਕੋਲੋਂ 515,000 ਡੋਜ਼ਾਂ ਹਾਸਲ ਹੋ ਚੁੱਕੀਆਂ ਹਨ।