ਓਟਵਾ, 14 ਜਨਵਰੀ (ਪੋਸਟ ਬਿਊਰੋ) : ਅਪਰੈਲ ਵਿੱਚ ਜਦੋਂ ਕੈਨੇਡਾ ਨੈਸ਼ਨਲ ਮਾਸ ਕੋਵਿਡ-19 ਇਮਿਊਨਾਈਜ਼ੇਸ਼ਨ ਦੇ ਦੂਜੇ ਗੇੜ ਵਿੱਚ ਦਾਖਲ ਹੋਵੇਗਾ ਤਾਂ ਫੈਡਰਲ ਅਧਿਕਾਰੀਆਂ ਨੂੰ ਹਰ ਹਫਤੇ ਦੇ ਹਿਸਾਬ ਨਾਲ ਮਨਜ਼ੂਰਸ਼ੁਦਾ ਵੈਕਸੀਨ ਦੀ ਇੱਕ ਮਿਲੀਅਨ ਤੋਂ ਵੀ ਵੱਧ ਡੋਜ਼ ਹਾਸਲ ਹੋਵੇਗੀ।
ਮੇਜਰ ਜਨਰਲ ਡੈਨੀ ਫੋਰਟਿਨ, ਜੋ ਕਿ ਪਬਲਿਕ ਹੈਲਥ ਏਜੰਸੀ ਆਫ ਕੈਨੇਡਾ ਤੋਂ ਵੈਕਸੀਨ ਦੀ ਵੰਡ ਦੀ ਨਿਗਰਾਨੀ ਤੇ ਅਗਵਾਈ ਕਰ ਰਹੇ ਹਨ, ਨੇ ਕੌਮੀ ਪੱਧਰ ਉੱਤੇ ਜਾਰੀ ਇਸ ਵੈਕਸੀਨ ਕੈਂਪੇਨ ਨੂੰ ਰੈਂਪ ਅੱਪ ਫੇਜ਼ ਦੱਸਿਆ। ਉਨ੍ਹਾਂ ਆਖਿਆ ਕਿ ਇਸ ਦੌਰਾਨ ਹੀ ਆਮ ਜਨਤਾ ਨੂੰ ਵੈਕਸੀਨ ਲਾਏ ਜਾਣ ਦਾ ਸਿਲਸਿਲਾ ਸ਼ੁਰੂ ਕੀਤਾ ਜਾਵੇਗਾ। ਇੱਕ ਕਿਆਫੇ ਮੁਤਾਬਕ ਅਪਰੈਲ ਅਤੇ ਜੂਨ ਦਰਮਿਆਨ ਕੈਨੇਡਾ ਨੂੰ 20 ਮਿਲੀਅਨ ਡੋਜ਼ਾਂ ਹਾਸਲ ਹੋਣ ਦੀ ਸੰਭਾਵਨਾ ਹੈ।
ਫੋਰਟਿਨ ਨੇ ਆਖਿਆ ਕਿ ਇਸ ਦੌਰਾਨ ਕੋਲਡ ਚੇਨ ਸਟੋਰੇਜ ਤੇ ਹੋਰ ਸਪਲਾਈ ਜਿਵੇਂ ਕਿ ਨੀਡਲਜ਼ ਤੇ ਬੈਂਡੇਜ ਆਦਿ ਉਪਲਬਧ ਕਰਵਾਇਆ ਜਾਣਾ ਵੀ ਯਕੀਨੀ ਬਣਾਇਆ ਜਾਵੇਗਾ। ਉਨ੍ਹਾਂ ਆਖਿਆ ਕਿ ਏਜੰਸੀ ਵਿਖੇ ਲਾਜਿਸਟਿਕਸ ਪਲੈਨਿੰਗ ਟੀਮ ਫੈਡਰਲ, ਪ੍ਰੋਵਿੰਸ਼ੀਅਲ, ਟੈਰੇਟੋਰੀਅਲ ਤੇ ਇੰਡੀਜੀਨਸ ਭਾਈਵਾਲਾਂ ਨਾਲ ਰਲ ਕੇ ਪ੍ਰੋਵਿੰਸਾਂ ਤੇ ਟੈਰੇਟਰੀਜ਼ ਵਿੱਚ ਇਮਿਊਨਾਈਜ਼ੇਸ਼ਨ ਦੀ ਉਪਲਬਧਤਾ ਤੇ ਇਮਿਊਨਾਈਜੇ਼ਸ਼ਨ ਸਮਰੱਥਾ ਦਰਮਿਆਨ ਤਾਲਮੇਲ ਬਿਠਾਉਣ ਦਾ ਕੰਮ ਕਰ ਰਹੀ ਹੈ।  
ਫੋਰਟਿਨ ਨੇ ਅੱਗੇ ਆਖਿਆ ਕਿ ਉਨ੍ਹਾਂ ਨੂੰ ਪੱਕਾ ਯਕੀਨ ਹੈ ਕਿ ਜਦੋਂ ਐਨੀ ਵੱਡੀ ਮਾਤਰਾ ਵਿੱਚ ਡੋਜ਼ਾਂ ਹਾਸਲ ਹੋਣੀਆਂ ਸੁ਼ਰੂ ਹੋ ਜਾਣਗੀਆਂ ਤਾਂ ਪ੍ਰੋਵਿੰਸ ਤੇ ਟੈਰੇਟਰੀਜ਼ ਵੀ ਲੋਕਾਂ ਨੂੰ ਵੱਡੀ ਪੱਧਰ ਉੱਤੇ ਵੈਕਸੀਨੇਟ ਕਰਨ ਲਈ ਤਿਆਰ ਹੋਣਗੇ। ਉਨ੍ਹਾਂ ਆਖਿਆ ਕਿ ਜਲਦ ਹੀ ਦੂਜੇ ਪੜਾਅ ਦੇ ਸਬੰਧ ਵਿੱਚ ਵਾਧੂ ਯੋਜਨਾਬੰਦੀ ਪ੍ਰੋਵਿੰਸਾਂ ਤੇ ਟੈਰੇਟਰੀਜ਼ ਨਾਲ ਸਾਂਝੀ ਕੀਤੀ ਜਾਵੇਗੀ।