ਓਟਵਾ, 8 ਨਵੰਬਰ (ਪੋਸਟ ਬਿਊਰੋ) : ਫੈਡਰਲ ਸਰਕਾਰ ਦਾ ਕਹਿਣਾ ਹੈ ਕਿ ਕੋਵਿਡ-19 ਮਹਾਂਮਾਰੀ ਦੌਰਾਨ ਜਿਨ੍ਹਾਂ ਯਾਤਰੀਆਂ ਦੀਆਂ ਫਲਾਈਟਸ ਰੱਦ ਹੋਈਆਂ ਹਨ ਉਨ੍ਹਾਂ ਨੂੰ ਰੀਫੰਡ ਕਰਨ ਲਈ ਕੈਨੇਡਾ ਦੀ ਏਅਰਲਾਈਨ ਇੰਡਸਟਰੀ ਦੀ ਜੋ ਵੀ ਮਦਦ ਹੋ ਸਕੇਗੀ ਉਹ ਕਰੇਗੀ|
ਟਰਾਂਸਪੋਰਟ ਮੰਤਰੀ ਮਾਰਕ ਗਾਰਨਿਊ ਨੇ ਐਲਾਨ ਕੀਤਾ ਕਿ ਇਸ ਹਫਤੇ ਓਟਵਾ ਵੱਲੋਂ ਇੰਡਸਟਰੀ ਨਾਲ ਗੱਲਬਾਤ ਕੀਤੀ ਜਾਵੇਗੀ| ਜ਼ਿਕਰਯੋਗ ਹੈ ਕਿ ਕੈਨੇਡਾ ਦੀ ਕਮਰਸ਼ੀਅਲ ਏਅਰਲਾਈਨਜ਼ ਨੂੰ ਕੋਵਿਡ-19 ਮਹਾਂਮਾਰੀ ਕਾਰਨ ਕਾਫੀ ਨੁਕਸਾਨ ਹੋਇਆ ਹੈ| ਟਰੈਵਲ ਸਬੰਧੀ ਪਾਬੰਦੀਆਂ ਦੇ ਚੱਲਦਿਆਂ ਤੇ ਬਿਮਾਰੀ ਦੇ ਡਰ ਤੋਂ 90 ਫੀ ਸਦੀ ਤੱਕ ਪੈਸੈਂਜਰਜ਼ ਦੀ ਗਿਣਤੀ ਘਟੀ ਹੈ| ਗਾਰਨਿਊ ਨੇ ਆਖਿਆ ਕਿ ਸਹਾਇਤਾ ਲਈ ਇੰਡਸਟਰੀ ਵੱਲੋਂ ਕੀਤੀ ਜਾ ਰਹੀ ਦਰਖ਼ੁਆਸਤ ਵੱਲ ਧਿਆਨ ਦੇਣ ਲਈ ਓਟਵਾ ਤਿਆਰ ਹੈ| ਇਸ ਲਈ ਸਰਕਾਰ ਲੋਨ ਮੁਹੱਈਆ ਕਰਵਾਕੇ ਤੇ ਹੋਰ ਮਦਦ ਕਰਕੇ ਦੇਸ਼ ਦੇ ਏਅਰ ਕੈਰੀਅਰਜ਼ ਨੂੰ ਇਸ ਸਖ਼ਤ ਮਾਹੌਲ ਵਿੱਚੋਂ ਬਾਹਰ ਕੱਢਣਾ ਚਾਹੁੰਦੀ ਹੈ|
ਪਰ ਉਨ੍ਹਾਂ ਇਹ ਵੀ ਆਖਿਆ ਕਿ ਸਰਕਾਰ ਕਿਸੇ ਵੀ ਤਰ੍ਹਾਂ ਦੀ ਮਦਦ ਲਈ ਸਖ਼ਤ ਸ਼ਰਤਾਂ ਵੀ ਰੱਖੇਗੀ| ਸਰਕਾਰ ਚਾਹੁੰਦੀ ਹੈ ਕਿ ਏਅਰਲਾਈਨਜ਼ ਪਹਿਲਾਂ ਤੋਂ ਹੀ ਬੁੱਕ ਟਿਕਟਾਂ ਲਈ ਉਨ੍ਹਾਂ ਕੋਲ ਜਮ੍ਹਾਂ ਕਈ ਮਿਲੀਅਨ ਡਾਲਰ ਮੋੜੇ ਤੇ ਰੀਜਨਲ ਰੂਟਜ਼ ਵੀ ਬਚਾਵੇ|