ਵੈਨਕੂਵਰ, 19 ਅਕਤੂਬਰ (ਪੋਸਟ ਬਿਊਰੋ) : ਸਰ੍ਹੀ ਦੇ ਇੱਕ ਘਰ ਵਿੱਚ ਵੀਕੈਂਡ ਉੱਤੇ ਜ਼ਹਿਰੀਲੀਆਂ ਦਵਾਈਆ ਦੀ ਓਵਰਡੋਜ਼ ਨਾਲ ਬੇਸੁੱਧ ਹੋਏ ਪੰਜ ਵਿਅਕਤੀਆਂ ਨੂੰ ਪੈਰਾਮੈਡਿਕਸ ਵੱਲੋਂ ਹੋਸ਼ ਵਿੱਚ ਲਿਆਂਦਾ ਗਿਆ|
ਸਰ੍ਹੀ ਆਰਸੀਐਮਪੀ ਦਾ ਕਹਿਣਾ ਹੈ ਕਿ ਵੀਕੈਂਡ ਉੱਤੇ ਰਾਤੀਂ 2:00 ਵਜੇ ਉਨ੍ਹਾਂ ਨੂੰ ਇੱਕ ਘਰ ਵਿੱਚ ਗੈਸ ਲੀਕ ਹੋਣ ਦੀ ਖਬਰ ਮਿਲੀ| ਮੌਕੇ ਉੱਤੇ ਪਹੁੰਚਣ ਉੱਤੇ ਉਨ੍ਹਾਂ ਨੇ ਪਾਇਆ ਕਿ ਉੱਥੇ ਕੋਈ ਗੈਸ ਲੀਕ ਨਹੀਂ ਸੀ ਹੋਈ| ਪਰ ਨਸ਼ਿਆਂ ਦੀ ਓਵਰਡੋਜ਼ ਕਾਰਨ ਪੰਜ ਵਿਅਕਤੀ ਬੇਹੋਸ਼ ਜ਼ਰੂਰ ਹੋਏ ਪਏ ਸਨ| ਪੁਲਿਸ ਨੇ ਦੱਸਿਆ ਕਿ ਸਰ੍ਹੀ ਫਾਇਰ ਡਿਪਾਰਟਮੈਂਟ, ਬੀਸੀ ਐਂਬੂਲੈਂਸ ਤੇ ਸਰ੍ਹੀ ਆਰਸੀਐਮਪੀ ਦੀ ਬਦੌਲਤ ਸਾਰੇ ਵਿਅਕਤੀਆਂ ਨੂੰ ਸਮਾਂ ਰਹਿੰਦਿਆਂ ਹੋਸ਼ ਵਿੱਚ ਲਿਆਂਦਾ ਗਿਆ| ਇਸ ਤੋਂ ਬਾਅਦ ਉਨ੍ਹਾਂ ਨੂੰ ਅਗਲੇਰੇ ਇਲਾਜ ਲਈ ਲੋਕਲ ਹਸਪਤਾਲ ਭੇਜ ਦਿੱਤਾ ਗਿਆ|
ਪੁਲਿਸ ਵੱਲੋਂ ਜਾਰੀ ਬਿਆਨ ਵਿੱਚ ਦੱਸਿਆ ਗਿਆ ਕਿ ਇੱਕ ਇੱਕ ਕਰਕੇ ਸਾਰੇ ਵਿਅਕਤੀਆਂ ਨੇ ਨਸ਼ੀਲੇ ਪਦਾਰਥ ਦਾ ਸੇਵਨ ਕੀਤਾ ਤੇ ਹੌਲੀ ਹੌਲੀ ਸਾਰਿਆਂ ਨੂੰ ਓਵਰਡੋਜ਼ ਹੋ ਗਈ| ਇੱਥੇ ਦੱਸਣਾ ਬਣਦਾ ਹੈ ਕਿ ਬੀਸੀ ਵਿੱਚ ਨਸ਼ਿਆਂ ਦੀ ਓਵਰਡੋਜ਼ ਦਾ ਸੰਕਟ ਪਹਿਲਾਂ ਹੀ ਚੱਲ ਰਿਹਾ ਹੈ| ਮਹਾਂਮਾਰੀ ਕਾਰਨ ਇੱਥੇ ਆਮ ਤੌਰ ਉੱਤੇ ਮਿਲਣ ਵਾਲੀ ਨਸ਼ਿਆਂ ਦੀ ਸਪਲਾਈ ਕੌਮਾਂਤਰੀ ਬਾਰਡਰ ਬੰਦ ਹੋਣ ਕਾਰਨ ਹੋਰ ਤੇਜ਼ ਹੋ ਗਈ ਹੈ|
ਆਰਸੀਐਮਪੀ ਨੇ ਦੱਸਿਆ ਕਿ ਜਦੋਂ ਇਹ ਸਾਰੇ ਲੋਕ ਬੇਹੋਸ਼ ਪਾਏ ਗਏ ਤਾਂ ਉਨ੍ਹਾਂ ਕੋਲੋਂ ਜਾਂ ਨੇੜਿਓਂ ਕੋਈ ਵੀ ਨਸ਼ੀਲਾ ਪਦਾਰਥ ਨਹੀਂ ਮਿਲਿਆ| ਇਸ ਲਈ ਉਹ ਇਹ ਨਹੀਂ ਦੱਸ ਪਾਏ ਕਿ ਕਿਸ ਨਸੇæ ਦੀ ਓਵਰਡੋਜ਼ ਕਾਰਨ ਇਹ ਸਾਰੇ ਬੇਹੋਸ਼ ਹੋਏ ਸਨ|