ਲਾਪਤਾ 4 ਸਾਲਾ ਬੱਚੀ ਦੀ ਗੁਆਂਢੀ
ਦੇ ਪੂਲ ਵਿੱਚੋਂ ਮਿਲੀ ਲਾਸ਼

ਮਾਂਟਰੀਅਲ, 10 ਅਗਸਤ (ਪੋਸਟ ਬਿਊਰੋ) : ਕਿਊਬਿਕ ਸਿਟੀ ਦੇ ਨੇੜਿਓ ਸ਼ੈਨਨ ਤੋਂ ਲਾਪਤਾ ਹੋਈ ਇੱਕ ਚਾਰ ਸਾਲਾ ਬੱਚੀ ਦੀ ਲਾਸ਼ ਐਤਵਾਰ ਰਾਤੀਂ 12:45 ਉੱਤੇ ਗੁਆਂਢੀ ਦੇ ਪੂਲ ਵਿੱਚੋਂ ਮਿਲੀ| ਇਹ ਜਾਣਕਾਰੀ ਸ਼ਰੇਤੇ ਡੂ ਕਿਊਬਿਕ ਦੀ ਤਰਜ਼ਮਾਨ ਮੈਰੀ ਮਿਸ਼ੇਲ ਮੂਰ ਨੇ ਦਿੱਤੀ|
ਮੂਰ ਨੇ ਆਖਿਆ ਕਿ ਲੀਅ ਫਿਸੈਟਸ ਨੂੰ ਸੀਪੀਆਰ ਵੀ ਦਿੱਤੀ ਗਈ ਤੇ ਉਸ ਨੂੰ ਤੁਰੰਤ ਹਸਪਤਾਲ ਲਿਜਾਇਆ ਗਿਆ ਜਿੱਥੇ ਉਸ ਦੀ ਮੌਤ ਦੀ ਪੁਸ਼ਟੀ ਕਰ ਦਿੱਤੀ ਗਈ| ਸੋਮਵਾਰ ਸਵੇਰੇ ਪੁਲਿਸ ਇਹ ਨਹੀਂ ਸੀ ਦੱਸ ਪਾ ਰਹੀ ਕਿ ਬੱਚੀ ਦੀ ਮੌਤ ਕਿਹੋ ਜਿਹੇ ਹਾਲਾਤ ਵਿੱਚ ਹੋਈ| ਮੌਕੇ ਉੱਤੇ ਕ੍ਰਾਈਮ ਸੀਨ ਟੈਕਨੀਸ਼ੀਅਨ, ਜਾਂਚਕਾਰ ਤੇ ਕੌਰੋਨਰ ਮੌਜੂਦ ਸਨ|
ਲਾਪਤਾ ਬੱਚੀ ਦੀ ਭਾਲ ਵਿੱਚ ਐਤਵਾਰ ਨੂੰ ਡੌਨਲਡਸਨ ਸਟਰੀਟ ਉੱਤੇ ਸ਼ਾਮੀਂ 5:00 ਵਜੇ ਪੁਲਿਸ ਤਾਇਨਾਤ ਕੀਤੀ ਗਈ ਸੀ| ਉਸ ਦੀ ਭਾਲ ਕਰਨ ਲਈ ਪੁਲਿਸ ਦੇ ਨਾਲ ਨਾਲ ਵਾਲੰਟੀਅਰ ਵੀ ਲੱਗੇ ਹੋਏ ਸਨ| ਇਨ੍ਹਾਂ ਤੋਂ ਇਲਾਵਾ ਕੈਨੇਡੀਅਨ ਹਥਿਆਰਬੰਦ ਸੈਨਾਵਾਂ ਦਾ ਹੈਲੀਕਾਪਟਰ ਵੀ ਫਿਸੈਟਸ ਦੀ ਭਾਲ ਵਿੱਚ ਲੱਗਿਆ ਹੋਇਆ ਸੀ|