ਨੋਵਾ ਸਕੋਸ਼ੀਆ ਦੇ ਪ੍ਰੀਮੀਅਰ ਸਟੀਫਨ ਮੈਕਨੀਲ
ਨੇ ਅਹੁਦਾ ਛੱਡਣ ਦਾ ਕੀਤਾ ਐਲਾਨ

ਹੈਲੀਫੈਕਸ, 6 ਅਗਸਤ (ਪੋਸਟ ਬਿਊਰੋ) : ਨੋਵਾ ਸਕੋਸ਼ੀਆ ਦੇ ਪ੍ਰੀਮੀਅਰ ਸਟੀਫਨ ਮੈਕਨੀਲ ਨੇ ਅਹੁਦਾ ਛੱਡਣ ਦਾ ਐਲਾਨ ਕੀਤਾ ਹੈ|
ਵੀਰਵਾਰ ਨੂੰ ਹੈਲੀਫੈਕਸ ਵਿੱਚ ਪ੍ਰੈੱਸ ਬ੍ਰੀਫਿੰਗ ਦੌਰਾਨ ਮੈਕਨੀਲ ਨੇ ਇਹ ਐਲਾਨ ਕੀਤਾ| ਮੈਕਨੀਲ ਨੇ ਆਖਿਆ ਕਿ ਸਤਾਰਾਂ ਸਾਲਾਂ ਦਾ ਅਰਸਾ ਕਾਫੀ ਲੰਮਾਂ ਹੁੰਦਾ ਹੈ| ਉਨ੍ਹਾਂ ਆਖਿਆ ਕਿ ਉਹ ਆਪਣੇ ਕੰਮ ਨਾਲ ਬਹੁਤ ਪਿਆਰ ਕਰਦੇ ਹਨ| ਉਨ੍ਹਾਂ ਆਖਿਆ ਕਿ ਉਨ੍ਹਾਂ ਆਪਣੇ ਕੰਮ ਦੇ ਹਰ ਦਿਨ ਦਾ ਆਨੰਦ ਮਾਣਿਆ ਤੇ ਹਰ ਦਿਨ ਪ੍ਰੋਵਿੰਸ ਦੇ ਲੋਕਾਂ ਨੇ ਉਨ੍ਹਾਂ ਨੂੰ ਪ੍ਰੇਰਿਤ ਕੀਤਾ| ਪਰ ਇਹ ਸਾਰੀ ਉਮਰ ਚੱਲਣ ਵਾਲਾ ਕਰੀਅਰ ਨਹੀਂ ਹੈ|
ਮੈਕਨੀਲ ਨੇ ਆਖਿਆ ਕਿ ਉਨ੍ਹਾਂ ਇਸ ਸਾਲ ਦੇ ਸ਼ੁਰੂ ਵਿੱਚ ਹੀ ਅਹੁਦਾ ਛੱਡਣ ਬਾਰੇ ਸੋਚਿਆ ਸੀ ਪਰ ਕੋਵਿਡ-19 ਮਹਾਂਮਾਰੀ ਕਾਰਨ ਉਨ੍ਹਾਂ ਆਪਣਾ ਇਹ ਫੈਸਲਾ ਟਾਲ ਦਿੱਤਾ| ਉਨ੍ਹਾਂ ਆਖਿਆ ਕਿ ਉਹ ਫੌਰੀ ਤੌਰ ਉੱਤੇ ਆਪਣਾ ਅਹੁਦਾ ਨਹੀਂ ਛੱਡਣਗੇ| ਉਹ ਕੋਵਿਡ-19 ਮਹਾਂਮਾਰੀ ਦੌਰਾਨ ਪ੍ਰੋਵਿੰਸ ਦੀ ਅਗਵਾਈ ਕਰਦੇ ਰਹਿਣਗੇ ਤੇ ਇਸ ਦੌਰਾਨ ਲਿਬਰਲ ਪਾਰਟੀ ਨੂੰ ਸਮਾਂ ਦੇਣਾ ਚਾਹੁੰਦੇ ਹਨ ਕਿ ਉਹ ਆਪਣੀ ਕੈਂਪੇਨ ਦੀ ਤਿਆਰੀ ਕਰ ਲਵੇ ਤੇ ਨਵਾਂ ਆਗੂ ਚੁਣ ਲਵੇ|
ਉਨ੍ਹਾਂ ਆਖਿਆ ਕਿ ਜਦੋਂ ਤੱਕ ਅਗਲਾ ਲੀਡਰ ਨਹੀਂ ਚੁਣ ਲਿਆ ਜਾਂਦਾ ਉਦੋਂ ਤੱਕ ਉਹ ਆਪਣੇ ਲੋਕਾਂ ਨੂੰ ਸੇਧ ਦਿੰਦੇ ਰਹਿਣਗੇ| ਮੈਕਨੀਲ 2013 ਵਿਚ ਪ੍ਰੀਮੀਅਰ ਚੁਣੇ ਗਏ ਸਨ ਤੇ 2017 ਵਿੱਚ ਉਹ ਮੁੜ ਚੁਣੇ ਗਏ|